Read Moroccan Standard Translation بُطْرُسْ اللّْوّْلَى 4 Bible Online

بُطْرُسْ اللّْوّْلَى 4 - Moroccan Standard Translation bible

بُطْرُسْ اللّْوّْلَى 4

¹الْفَصْلْ الرَّابْعْ إِيوَا حِيتْ الْمَسِيحْ تّْعَدّْبْ فْالدَّاتْ، كُونُو حْتَّى نْتُمَ مُوجُودِينْ بَاشْ تْتْعَدّْبُو بْحَالُه. عْلَاحْقَّاشْ اللِّي تّْعَدّْبْ فْالدَّاتْ مَا كَيْبْقَاشْ يْدْنَبْ،

²بَاشْ يْعِيشْ دَاكْشِّي اللِّي بَاقِي فْحْيَاتُه مَاشِي عْلَى حْسَابْ الشَّهْوَة دْيَالْ النَّاسْ وَلَكِنْ عْلَى حْسَابْ مُرَادْ اللَّهْ.

³بَرَكَا عْلِيكُمْ مْنْ الْوَقْتْ اللِّي ضَيّْعْتُوهْ فْالْحْوَايْجْ اللِّي كَيْرْضِيوْ النَّاسْ اللِّي مَا كَيْآمْنُوشْ بْاللَّهْ، وْنْتُمَ عَايْشِينْ فْالْفْسَادْ وْالشَّهَوَاتْ وْالسّْكْرَة وْالْقْصَارَة وْالتّْعَرْبِيطَة وْالْعِبَادَة دْيَالْ الْأَصْنَامْ الْمْحَرّْمَة.

⁴وْرَاهُمْ دَابَا كَيْتّْعَجّْبُو حِيتْ مَا بْقِيتُوشْ كَتْشَارْكُوهُمْ فْالْفْسَادْ، وْهَادْشِّي عْلَاشْ كَيْعَايْرُوكُمْ.

⁵وَلَكِنْ غَيْعْطِيوْ الْحْسَابْ لْهَادَاكْ اللِّي مُوجُودْ بَاشْ يْحَاسْبْ الْحَيِّينْ وْالْمْيّْتِينْ.

⁶حِيتْ هَادْشِّي عْلَاشْ حْتَّى الْمْيّْتِينْ تْخَبّْرُو بْالْبْشَارَة، بَاشْ يْتّْحَاسْبُو فْالدَّاتْ بْحَالْ النَّاسْ، وْيْحْيَاوْ بْحَالْ اللَّهْ بْالرُّوحْ الْقُدُسْ.

⁷دَابَا رَاهْ قَرّْبْ اللّْخْرْ دْيَالْ كُلّْ حَاجَة، إِيوَا دِيرُو عْقَلْكُمْ وْكُونُو مْوَݣّْضِينْ بَاشْ تْقَدْرُو تْصَلِّيوْ.

⁸وْقْبَلْ مْنْ كُلّْشِي، بْغِيوْ بْعْضِيَّاتْكُمْ بْزَّافْ، عْلَاحْقَّاشْ الْمْحَبَّة كَتْسْتَرْ دْنُوبْ كْتَارْ.

⁹ضَايْفُو بْعْضِيَّاتْكُمْ بْلَا مَا تّْشْكَّاوْ.

¹⁰وْكُلّْ وَاحْدْ مْنّْكُمْ خَاصُّه يْخَدّْمْ الْمَوْهِبَة اللِّي تّْعْطَاتْ لِيهْ، بَاشْ تْعَاوْنُو بْعْضِيَّاتْكُمْ وْهَكَّا غَتْكُونُو مْسْؤُولِينْ مْزْيَانِينْ عْلَى النِّعْمَة دْيَالْ اللَّهْ الْمْتْنَوّْعَة.

¹¹إِلَا شِي حَدّْ كَيْتّْكَلّْمْ خَاصُّه يْتّْكَلّْمْ بْكْلَامْ اللَّهْ. وْإِلَا شِي حَدّْ كَيْخْدَمْ لْلَّهْ خَاصُّه يْخْدَمْ بْالْقُوَّة اللِّي كَيْعْطِيهْ اللَّهْ، بَاشْ يْتّْعْطَى الْعَزّْ لْلَّهْ فْكُلّْشِي بْيَسُوعْ الْمَسِيحْ، اللِّي لِيهْ الْعَزّْ وْالْقُوَّة دِيمَا وْعْلَى الدّْوَامْ. آمِينْ.

¹²آ خُوتِي الْعْزَازْ، مَا تّْعَجّْبُوشْ مْنْ الْمْحْنَة الصّْعِيبَة اللِّي كَتْدُوزُو فِيهَا بْحَالْ إِلَا رَاهَا شِي حَاجَة غْرِيبَة نْزْلَاتْ عْلِيكُمْ.

¹³وَلَكِنْ كِمَا كَتّْشَارْكُو مْعَ الْمَسِيحْ فْالْعْدَابْ دْيَالُه، فْرْحُو حْتَّى مْلِّي غَيْبَانْ الْعَزّْ دْيَالُه بَاشْ تْفَرْحُو كْتَرْ.

¹⁴سْعْدَاتْكُمْ إِلَا كَانُو كَيْعَايْرُوكُمْ عْلَى وْدّْ إِسْمْ الْمَسِيحْ، عْلَاحْقَّاشْ رُوحْ الْعَزّْ اللِّي هُوَ رُوحْ اللَّهْ كَيْسْكُنْ فِيكُمْ.

¹⁵مَا خَاصّْشْ يْكُونْ فِيكُمْ شِي حَدّْ كَيْتّْعَدّْبْ حِيتْ هُوَ قْتَّالْ وْلَا شْفَّارْ وْلَا مْشْرَارْ وْلَا فْضُولِي.

¹⁶وَلَكِنْ إِلَا تّْعَدّْبْ حِيتْ هُوَ مَسِيحِي، مَا خَاصُّوشْ يْحْشَمْ، رَاهْ خَاصُّه يْعْطِي الْعَزّْ لْلَّهْ عْلَى وْدّْ هَادْ الْإِسْمْ.

¹⁷عْلَاحْقَّاشْ هَادَا هُوَ الْوَقْتْ اللِّي غَيْبْدَا فِيهْ الْحْكَامْ مْنْ بِيتْ اللَّهْ. إِيوَا إِلَا كَانْ الْحْكَامْ غَيْبْدَا بِينَا، كِيفَاشْ غَيْكُونْ اللّْخْرْ دْيَالْ هَادُوكْ اللِّي مَا آمْنُوشْ بْإِنْجِيلْ اللَّهْ؟

¹⁸وْكِيفْ كَيْݣُولْ كْتَابْ اللَّهْ: «إِلَا كَانْ صْعِيبْ عْلَى اللِّي مْتَّاقِي اللَّهْ بَاشْ يْنْجَا، إِيوَا آشْ غَيْجْرَا لْلْمْشْرَارْ وْالْمُدْنِبْ؟».

¹⁹وْهَكَّا حْتَّى اللِّي كَيْتّْعَدّْبُو عْلَى وْدّْ مُرَادْ اللَّهْ، خَاصّْهُمْ يْسَلّْمُو حْيَاتْهُمْ لْلْخَالْقْ اللِّي أَمِينْ، وْيْدِيرُو أَعْمَالْ الْخِيرْ.