Read Moroccan Standard Translation بُطْرُسْ اللّْوّْلَى 5 Bible Online

بُطْرُسْ اللّْوّْلَى 5 - Moroccan Standard Translation bible

بُطْرُسْ اللّْوّْلَى 5

¹الْفَصْلْ الْخَامْسْ وْكَنْطْلَبْ مْنْ الشّْيُوخْ دْيَالْ الْكْنِيسَة اللِّي مْعَاكُمْ، وْرَانِي شِيخْ بْحَالْهُمْ وْكْنْتْ شَاهْدْ عْلَى عْدَابْ الْمَسِيحْ، وْشْرِيكْ فْالْعَزّْ اللِّي غَيْبَانْ،

²رْدُّو الْبَالْ لْلْقَطْعَة دْيَالْ اللَّهْ اللِّي كَلّْفْكُمْ بِيهَا، مَاشِي بَزّْزْ وَلَكِنْ بْخَاطْرْكُمْ كِيفْ بْغَا اللَّهْ، وْمَاشِي بْالطّْمَعْ وَلَكِنْ بْالْمْحَبَّة.

³وْمَا تْفَرْضُوشْ السُّلْطَة دْيَالْكُمْ عْلَى هَادُوكْ اللِّي كَلّْفْكُمْ اللَّهْ بِيهُمْ، وَلَكِنْ كُونُو مْتَالْ لِيهُمْ.

⁴وْمْلِّي يْرْجَعْ الرَّاعِي الْكْبِيرْ، غَتَاخْدُو التَّاجْ دْ الْعَزّْ اللِّي مَا كَيْقْدَامْشْ.

⁵وْحْتَّى نْتُمَ آ الشُّبَّانْ، طِيعُو الشّْيُوخْ دْ الْكْنِيسَة. وْكُونُو كُلّْكُمْ مْتْوَاضْعِينْ مْعَ بْعْضِيَّاتْكُمْ حِيتْ كْتَابْ اللَّهْ كَيْݣُولْ: «اللَّهْ كَيْقَاوْمْ الْمْتْكَبّْرِينْ، وَلَكِنْ الْمْتْوَاضْعِينْ كَيْعْطِيهُمْ النِّعْمَة».

⁶إِيوَا عْلِيهَا تْوَاضْعُو تَحْتْ يْدّْ اللَّهْ الْقْوِيَّة بَاشْ يْعَلِّي شَانْكُمْ فْالْوَقْتْ دْيَالُه،

⁷حَطُّو ݣَاعْ هَمّْكُمْ عْلِيهْ، عْلَاحْقَّاشْ هُوَ اللِّي كَيْتّْهَلَّى فِيكُمْ.

⁸كُونُو عْلَى بَالْ وْمُّوݣْضِينْ! رَاهْ الْعْدُو دْيَالْكُمْ إِبْلِيسْ، دَايْرْ بْحَالْ السّْبَعْ الْهَايْجْ كَيْضُورْ وْكَيْقَلّْبْ عْلَى شِي وَاحْدْ بَاشْ يْفَرْسُه.

⁹إِيوَا قَاوْمُوهْ وْبْقَاوْ تَابْتِينْ فْالْإِيمَانْ، وْعَرْفُو بْلِّي خُوتْكُمْ الْمُومْنِينْ فْالدّْنْيَا كُلّْهَا كَيْقَاسِيوْ بْحَالْ هَادْ الْعْدَابْ.

¹⁰وْالْإِلَاهْ دْيَالْ النِّعْمَة كُلّْهَا اللِّي عَيّْطْ لِيكُمْ لْلْعَزّْ دْيَالُه الدَّايْمْ فْالْمَسِيحْ يَسُوعْ، قَادْرْ يْرَدّْكُمْ مْكْمُولِينْ وْتَابْتِينْ وْقْوِيِّينْ وْوَاقْفِينْ عْلَى الصَّحْ مْنْ بَعْدْمَا تْعَدّْبْتُو شِي وَقْتْ قْلِيلْ.

¹¹لِيهْ الْقُوَّة دِيمَا وْعْلَى الدّْوَامْ. آمِينْ.

¹²كْتَبْتْ لِيكُمْ هَادْ الرِّسَالَة الْقْصِيرَة عْلَى يْدّْ خُونَا سِلْوَانُسْ اللِّي كَنْعْتَبْرُه أَمِينْ، بَاشْ نْشَجّْعْكُمْ وْنْشْهَدْ لِيكُمْ بْلِّي هَادِي هِيَ نِعْمَةْ اللَّهْ الْحْقِيقِيَّة اللِّي نْتُمَ تَابْتِينْ فِيهَا.

¹³كَتْسَلّْمْ عْلِيكُمْ الجّْمَاعَة دْ الْمُومْنِينْ اللِّي خْتَارْهُمْ اللَّهْ وْاللِّي كَايْنِينْ فْبَابِلْ، وْكَيْسَلّْمْ عْلِيكُمْ حْتَّى وْلْدِي مَرْقُسْ.

¹⁴سَلّْمُو عْلَى بْعْضِيَّاتْكُمْ بْبُوسَة دْيَالْ الْمْحَبَّة. وْالْهْنَا يْكُونْ مْعَاكُمْ نْتُمَ كُلّْكُمْ اللِّي فْالْمَسِيحْ.