Read Moroccan Standard Translation بُطْرُسْ التَّانِيَّة 1 Bible Online

بُطْرُسْ التَّانِيَّة 1 - Moroccan Standard Translation bible

بُطْرُسْ التَّانِيَّة 1

¹الْفَصْلْ اللّْوّْلْ أَنَا سِمْعَانْ بُطْرُسْ الْعَبْدْ وْالرَّسُولْ دْيَالْ يَسُوعْ الْمَسِيحْ، كَنْكْتَبْ لْهَادُوكْ اللِّي عَنْدْهُمْ إِيمَانْ غَالِي بْحَالْنَا بْفْضَلْ التَّقْوَى دْيَالْ إِلَاهْنَا وْمُنَجِّينَا يَسُوعْ الْمَسِيحْ.

²كَنْطْلَبْ مْنْ اللَّهْ بَاشْ يْكَتّْرْ فِيكُمْ النِّعْمَة وْالْهْنَا بْفْضَلْ الْمَعْرِفَة دْيَالْكُمْ لْلَّهْ وْرَبّْنَا يَسُوعْ.

³رَاهْ اللَّهْ بْالْقُدْرَة دْيَالُه الْإِلَاهِيَّة عْطَانَا كُلّْ مَا كَنْحْتَاجُو لِيهْ فْالْحَيَاةْ وْفْالتَّقْوَى، بَاشْ نْعَرْفُو هَادَاكْ اللِّي خْتَارْنَا بْالْعَزّْ وْالْخِيرْ دْيَالُه،

⁴اللِّي بِيهُمْ عْطَانَا الْحْوَايْجْ الْمْزْيَانِينْ وْالْغَالْيِينْ اللِّي وَاعْدْنَا بِيهُمْ، بَاشْ تْقَدْرُو تْشَارْكُو فْالطّْبِيعَة الْإِلَاهِيَّة، وْتْهَرْبُو مْنْ الْفْسَادْ اللِّي كَيْجِي مْنْ الشَّهْوَة اللِّي فْالدّْنْيَا.

⁵عْلَى هَادْشِّي، دِيرُو جَهْدْكُمْ بَاشْ تْزِيدُو عْلَى إِيمَانْكُمْ الْخِيرْ، وْعْلَى الْخِيرْ الْمَعْرِفَة،

⁶وْعْلَى الْمَعْرِفَة الرّْزَانَة، وْعْلَى الرّْزَانَة الصّْبَرْ، وْعْلَى الصّْبَرْ التَّقْوَى،

⁷وْعْلَى التَّقْوَى مْحَبَّةْ الْخُوتْ، وْعْلَى مْحَبَّةْ الْخُوتْ، الْمْحَبَّة.

⁸حِيتْ إِلَا كَانُو فِيكُمْ هَادْ الْأُمُورْ وْتّْزَادُو بْالْكْتْرَة، مَا غَيْخَلِّيوْكُمْشْ تْكُونُو مْعْݣَازِينْ وْلَا بْلَا غْلَّة بَاشْ تْعَرْفُو رَبّْنَا يَسُوعْ الْمَسِيحْ.

⁹وَلَكِنْ اللِّي مَا عَنْدُوشْ هَادْ الْأُمُورْ رَاهْ هُوَ عْمَى كَيْشُوفْ عْلَى قْدُّه، وْنْسَى بْلِّي رَاهْ تّْنَقَّى مْنْ دْنُوبُه الْقْدَامْ.

¹⁰هَادْشِّي عْلَاشْ آ الْخُوتْ، دِيرُو جَهْدْكُمْ بَاشْ تْبَيّْنُو بْلِّي اللَّهْ عَيّْطْ لِيكُمْ بْالصَّحْ وْخْتَارْكُمْ. حِيتْ إِلَا دْرْتُو هَادْشِّي عَمّْرْكُمْ مَا غَتْطِيحُو.

¹¹حِيتْ هَكَّا غَيْتّْحَلّْ لِيكُمْ الْبَابْ كَامْلْ بَاشْ تْدَخْلُو لْلْمَمْلَكَة الدَّايْمَة دْيَالْ رَبّْنَا وْمُنَجِّينَا يَسُوعْ الْمَسِيحْ.

¹²وْعْلَى هَادْشِّي، غَنْبْقَى دِيمَا نْفَكّْرْكُمْ بْهَادْ الْأُمُورْ، وَاخَّا كَتْعَرْفُوهُمْ وْتَابْتِينْ فْالْحَقّْ اللِّي عَنْدْكُمْ.

¹³وَلَكِنْ كَنْشُوفْ بْلِّي وَاجْبْ نْفَكّْرْكُمْ بْهَادْشِّي، مَا حَدّْنِي فْهَادْ الْحَيَاةْ.

¹⁴أَنَا عَارْفْ بْلِّي وْصَلْ الْوَقْتْ دْيَالِي فَاشْ غَنْرْحَلْ مْنْ هَادْ الْحَيَاةْ، كِيفْ بَيّْنْ لِيَّ رَبّْنَا يَسُوعْ الْمَسِيحْ.

¹⁵وْغَنْدِيرْ جْهْدِي كُلُّه بَاشْ بَعْدْمَا نْمُوتْ، تْبْقَاوْ دِيمَا تْفَكّْرُو فْهَادْ الْأُمُورْ.

¹⁶رَاهْ مْلِّي خَبّْرْنَاكُمْ عْلَى قُوَّةْ رَبّْنَا يَسُوعْ الْمَسِيحْ وْالْمْجِي دْيَالُه، مَا كْنَّاشْ كَنْعَاوْدُو لِيكُمْ الْخْرَايْفْ دْيَالْ الْكْدُوبْ. وَلَكِنْ شْفْنَا بْعِينِينَا الْعَظَمَة دْيَالُه.

¹⁷حِيتْ هُوَ خْدَا مْنْ اللَّهْ الْآبْ الْكَرَامَة وْالْعَزّْ مْلِّي تّْكَلّْمْ مْعَاهْ وَاحْدْ الصُّوتْ مْنْ عَنْدْ مُولْ الْعَزّْ الْكْبِيرْ وْݣَالْ: «هَادَا هُوَ وْلْدِي الْعْزِيزْ اللِّي بِيهْ فْرَحْتْ».

¹⁸وْحْنَا بْرَاسْنَا سْمَعْنَا هَادْ الصُّوتْ جَايْ مْنْ السّْمَا مْلِّي كْنَّا مْعَاهْ فْالجّْبَلْ الْمْقَدّْسْ.

¹⁹وْعَنْدْنَا كْلَامْ الْأَنْبِيَا اللِّي زَادْ أَكّْدْ لِينَا هَادْشِّي، عْلِيهَا رْدُّو الْبَالْ مْزْيَانْ، رَاهْ هُوَ بْحَالْ شِي قْنْدِيلْ كَيْضَوِّي فْبْلَاصَة مْضَلّْمَة، حْتَّى يْطْلَعْ النّْهَارْ وْتْبَانْ نْجْمَةْ الصّْبَاحْ فْقْلُوبْكُمْ.

²⁰وْقْبَلْ مْنْ كُلّْشِي، مْزْيَانْ تْعَرْفُو بْلِّي مَا كَايْنْ حْتَّى شِي وَاحْدْ اللِّي يْقْدَرْ يْفَسّْرْ مْنْ رَاسُه شِي نُبُوَّة مْنْ الْكْتَابْ.

²¹حِيتْ عَمّْرْ شِي نُبُوَّة مَا جَاتْ بْالْمُرَادْ دْيَالْ بْنَادْمْ، وَلَكِنْ شِي نَاسْ بْالْقُدْرَة دْيَالْ الرُّوحْ الْقُدُسْ تّْكَلّْمُو بْكْلَامْ اللَّهْ.