Read Moroccan Standard Translation بُطْرُسْ التَّانِيَّة 2 Bible Online

بُطْرُسْ التَّانِيَّة 2 - Moroccan Standard Translation bible

بُطْرُسْ التَّانِيَّة 2

¹الْفَصْلْ التَّانِي وَلَكِنْ كِمَا كَانُو فْشَعْبْ اللَّهْ أَنْبِيَا كْدَّابِينْ، هَكَّا غَيْكُونُو فِيكُمْ حْتَّى نْتُمَ مُعَلِّمِينْ كْدَّابِينْ غَيْجِيبُو تَعَالِيمْ غَالْطَة كَتْخَرّْبْ، وْغَيْنَكْرُو الرَّبّْ اللِّي شْرَاهُمْ، وْدْغْيَا غَيْجِيبُو الْهْلَاكْ لْرَاسْهُمْ.

²وْبْزَّافْ دْ النَّاسْ غَيْتْبْعُوهُمْ فْالْفْسَادْ دْيَالْهُمْ، وْبْسْبَابْهُمْ غَيْݣُولُو كْلَامْ الْكُفْرْ عْلَى طْرِيقْ الْحَقّْ.

³وْبْسْبَابْ الطّْمَعْ دْيَالْهُمْ كَيْسْتَغْلُّوكُمْ بْكْدُوبْهُمْ، وَلَكِنْ رَاهْ مْنْ مُدَّة طْوِيلَة تّْحْكَمْ عْلِيهُمْ بْالْعِقَابْ، وْالْهْلَاكْ دْيَالْهُمْ لَابْدّْ مْنُّه.

⁴اللَّهْ مَا حَنّْشْ عْلَى الْمَلَايْكَة اللِّي دَنْبُو، وَلَكِنْ رْمَاهُمْ فْجَهْنَّمْ مْكَتّْفِينْ فْالضّْلَامْ وْخْلَّاهُمْ حْتَّى لْيُومْ الْحِسَابْ.

⁵وْمَا حَنّْشْ عْلَى النَّاسْ دْ الزّْمَانْ الْقْدِيمْ، وَلَكِنْ نَزّْلْ الطُّوفَانْ عْلَى الْمْشْرَارِينْ وْنْجَّا تْمَنْيَة دْ النَّاسْ، مْنّْهُمْ نُوحْ اللِّي كَانْ كَيْخَبّْرْ بْالتَّقْوَى.

⁶وْمْنْ بَعْدْ عَاقْبْ اللَّهْ مْدِينْةْ سَدُومْ وْعَمُورَة وْحْرَقْهُمْ حْتَّى وْلَّاوْ رْمَادْ، بَاشْ يْكُونُو مْتَالْ لْلنَّاسْ الْمْشْرَارِينْ.

⁷وْعْتَقْ لُوطْ اللِّي كَانْ رَاجْلْ مْتَّاقِي اللَّهْ وْمَا كَانْشْ فْرْحَانْ بْسْبَابْ الْفْسَادْ اللِّي كَانُو عَايْشِينْ فِيهْ النَّاسْ الْفَاسْدِينْ.

⁸حِيتْ هَادْ الرَّاجْلْ اللِّي مْتَّاقِي اللَّهْ كَانْ سَاكْنْ فْوَسْطْهُمْ، كَيْشُوفْهُمْ وْكَيْسْمَعْهُمْ نْهَارْ عْلَى نْهَارْ، وْكَانْتْ نْفْسُه الْمْزْيَانَة كَتْتْعَدّْبْ بْسْبَابْ فْعَايْلْهُمْ الْفَاسْدَة.

⁹وْهَادْشِّي كَيْبَيّْنْ بْلِّي الرَّبّْ عَارْفْ كِيفَاشْ يْعْتَقْ النَّاسْ اللِّي مْتَّاقْيِينُه مْنْ الْمْحْنَة دْيَالْهُمْ، وْيْخَلِّي الْمُدْنِبِينْ حْتَّى لْيُومْ الْحِسَابْ بَاشْ يْعَاقْبْهُمْ،

¹⁰بْالْخُصُوصْ هَادُوكْ اللِّي تَابْعِينْ الشَّهْوَة الْفَاسْدَة دْيَالْ دَاتْهُمْ، وْكَيْحْتَقْرُو السُّلْطَة دْيَالْ اللَّهْ. هَادْ الْمُعَلِّمِينْ الْكْدَّابِينْ كَيْتِيقُو بْزَّافْ فْرَاسْهُمْ وْمْتْكَبّْرِينْ وْمَا كَيْخَافُوشْ يْسَبُّو الْمَلَايْكَة دْ الْعَزّْ.

¹¹وْوَاخَّا الْمَلَايْكَة عَنْدْهُمْ الْقُوَّة وْالْقُدْرَة كْتَرْ مْنّْهُمْ، مَا كَيْتَّهْمُوهُمْشْ بْكْلَامْ خَايْبْ قُدَّامْ الرَّبّْ.

¹²وَلَكِنْ هَادْ النَّاسْ، رَاهْ بْطْبِيعْتْهُمْ كَيْشَبْهُو لْلْحَيَوَانَاتْ دْ الْغَابَة اللِّي كَيْتّْوَلْدُو بَاشْ يْتّْصَيّْدُو وْيْتّْقْتْلُو. وْهَادْ النَّاسْ كَيْݣُولُو كْلَامْ خَايْبْ عْلَى الْأُمُورْ اللِّي مَا كَيْفَهْمُوهَاشْ، وْعْلِيهَا غَيْمُوتُو بْحَالْ هَادْ الْحَيَوَانَاتْ.

¹³وْعْلَى وْدّْ الضُّلْمْ دْيَالْهُمْ غَيَاخْدُو الْأُجْرَة دْيَالْهُمْ. رَاهُمْ كَيْلْقَاوْ الْفَرْحَة دْيَالْهُمْ مْلِّي كَيْدِيرُو الْفْسَادْ فْوَسْطْ النّْهَارْ، وْكَيْحَشّْمُو بِيكُمْ وْكَيْطِيّْحُو مْنْ قِيمْتْكُمْ مْلِّي كَيْشَارْكُو مْعَاكُمْ فْالْعْرَاضَاتْ، وْكَيْكُونُو فْرْحَانِينْ مْلِّي كَيْخَدْعُوكُمْ.

¹⁴عِينِيهُمْ عَامْرِينْ بْالْفْسَادْ، مَا كَيْشَبْعُوشْ مْنْ الدّْنُوبْ، وْكَيْخَدْعُو النَّاسْ الضّْعَافْ. وْقَلْبْهُمْ وْلّْفْ الطّْمَعْ. هُمَ وْلَادْ اللَّعْنَة.

¹⁵خْلَّاوْ الطّْرِيقْ الْمْقَادَّة وْتْلْفُو. وْمْشَاوْ فْطْرِيقْ بَلْعَامْ وَلْدْ بَصُورْ اللِّي قْبَلْ فْلُوسْ الْحْرَامْ.

¹⁶وَلَكِنْ رَاهْ خْدَا دَرْسْ عْلَى فْعَايْلُه، حِيتْ الْحْمَارْ اللِّي مَا كَيْهْضَرْشْ تّْكَلّْمْ بْصُوتْ بْنَادْمْ وْوَقّْفْ الْحْمَاقْ دْيَالْ هَادْ النّْبِي.

¹⁷هَادْ النَّاسْ رَاهُمْ بْحَالْ الْبْيَارْ بْلَا مَا، وْالْغْيَامْ اللِّي دَافْعَاهْ رِيحْ قْوِيَّة، عْلَى هَادْشِّي وَجّْدْ لِيهُمْ اللَّهْ وَاحْدْ الْبْلَاصَة مْضَلّْمَة بْزَّافْ.

¹⁸كَيْتّْكَلّْمُو بْكْلَامْ الْكِبْرْ اللِّي مَا فِيهْ فَايْدَة. وْبْالشَّهَوَاتْ دْيَالْهُمْ الْقْبِيحَة وْالْفْسَادْ كَيْخَدْعُو النَّاسْ اللِّي عَادْ هَرْبُو مْنْ الجّْمَاعَاتْ اللِّي عَايْشِينْ فْالدّْنُوبْ،

¹⁹كَيْوَاعْدُوهُمْ بْالْحُرِّيَّة وْهُمَ بْرَاسْهُمْ عْبِيدْ لْلْفْسَادْ، حِيتْ بْنَادْمْ عَبْدْ لْكُلّْ حَاجَة كَتّْسَلّْطْ عْلِيهْ.

²⁰حِيتْ إِلَا نْجَاوْ مْنْ الْفْسَادْ دْيَالْ هَادْ الدّْنْيَا مْلِّي عَرْفُو رَبّْنَا وْمُنَجِّينَا يَسُوعْ الْمَسِيحْ، وَلَكِنْ رْجْعُو كَيْدِّيوْهَا فْهَادْ الْأُمُورْ وْتّْغَلْبُو، غَادِي يْوَلِّيوْ فْاللّْخْرْ كْفَسْ مْنْ اللّْوّْلْ.

²¹رَاهْ حْسَنْ لِيهُمْ كُونْ مَا عَرْفُوشْ الطّْرِيقْ اللِّي كَتْدِّي لْطَاعْةْ اللَّهْ، فْعُوضْ مَا يْعَرْفُوهَا، وْمْنْ بَعْدْ يْرْجْعُو عْلَى الْوْصِيَّة الْمْقَدّْسَة اللِّي تّْعْطَاتْ لِيهُمْ.

²²وْرَاهْ جْرَا لِيهُمْ هَادْشِّي اللِّي كَيْݣُولُه الْمْتَالْ الصّْحِيحْ: «رْجَعْ الْكْلْبْ يَاكُلْ دَاكْشِّي اللِّي تْقِيَّ» وْالْمْتَالْ لَاخُرْ اللِّي كَيْݣُولْ: «الْحَلُّوفْ اللِّي تّْغْسَلْ رْجَعْ يْتّْمَرّْغْ فْالْغِيسْ».