Read Moroccan Standard Translation بُطْرُسْ التَّانِيَّة 3 Bible Online

بُطْرُسْ التَّانِيَّة 3 - Moroccan Standard Translation bible

بُطْرُسْ التَّانِيَّة 3

¹الْفَصْلْ التَّالْتْ آ خُوتِي الْعْزَازْ، هَادِي هِيَ الرِّسَالَة التَّانْيَة اللِّي كَنْكْتَبْ لِيكُمْ، وْفِيهُم بْجُوجْ كَنْفَكّْرْكُمْ بْهَادْ الْأُمُورْ بَاشْ نْوَݣّْضْ أَفْكَارْكُمْ النّْقِيَّة.

²بَاشْ تْتْفَكّْرُو الْكْلَامْ اللِّي ݣَالُوهْ الْأَنْبِيَا الْمْقَدّْسِينْ مْنْ قْبَلْ، وْالْوْصِيَّاتْ دْيَالْ رَبّْنَا وْمُنَجِّينَا اللِّي وَصّْلُوهُمْ لِيكُمْ الرُّسُلْ دْيَالْكُمْ.

³وْقْبَلْ مْنْ كُلّْشِي، خَاصّْكُمْ تْعَرْفُو بْلِّي فْلِيَّامْ اللّْخْرَة غَيْجِيوْ شِي نَاسْ كَيْعِيشُو عْلَى حْسَابْ الشَّهَوَاتْ دْيَالْهُمْ، وْغَيْضَحْكُو عْلِيكُمْ.

⁴وْغَيْݣُولُو: «فِينْ هُوَ الْوَعْدْ بْالرّْجُوعْ دْيَالُه؟ حِيتْ هَادِي مُدَّة بَاشْ مَاتُو وَالِدِينَا، وْبَاقِي كُلّْشِي كِيفْ كَانْ مْنْ الْبْدُو مْلِّي خْلَقْ اللَّهْ الدّْنْيَا».

⁵رَاهْ بْهَادْشِّي كَيْدِيرُو بْحَالْ إِلَا مَا كَيْعَرْفُوشْ، بْلِّي مْنْ زْمَانْ، بْكْلْمَة وَحْدَة مْنْ اللَّهْ تّْخَلْقَاتْ السّْمَا وْتّْكَوّْنَاتْ الْأَرْضْ مْنْ الْمَا وْبْالْمَا.

⁶وْبْالْمَا نِيتْ غَرْقَاتْ الدّْنْيَا وْتّْهَلْكَاتْ مْنْ زْمَانْ.

⁷وَلَكِنْ السّْمَا وْالْأَرْضْ اللِّي كَايْنِينْ دَابَا رَاهُمْ مَحْفُوضِينْ بْنَفْسْ الْكْلْمَة بَاشْ يْتّْحَرْقُو بْالْعَافْيَة، وْغَيْبْقَاوْ حْتَّى لْيُومْ الْحِسَابْ اللِّي فِيهْ غَيْتّْهَلْكُو الْمُدْنِبِينْ.

⁸وَلَكِنْ آ خُوتِي الْعْزَازْ، مَا خَاصّْكُمْشْ تْنْسَاوْ هَادْ الْحَاجَة: نْهَارْ وَاحْدْ عَنْدْ الرَّبّْ بْحَالْ أَلْفْ عَامْ، وْأَلْفْ عَامْ بْحَالْ نْهَارْ وَاحْدْ.

⁹وْالرَّبّْ مَا كَيْتّْعَطّْلْشْ بَاشْ يْحَقَّقْ الْوَعْدْ دْيَالُه كِمَا كَيْفَكّْرُو شِي وْحْدِينْ، وَلَكِنْ كَيْصْبَرْ عْلِيكُمْ، حِيتْ مَا بْغَا حْتَّى وَاحْدْ يْتّْهْلَكْ، وَلَكِنْ بْغَا كُلّْشِي يْتُوبْ.

¹⁰وَلَكِنْ النّْهَارْ اللِّي غَيْجِي فِيهْ الرَّبّْ، غَيْكُونْ بْحَالْ الْمْجِي دْيَالْ شِي شْفَّارْ، وْفِيهْ غَيْفْنَاوْ السَّمَاوَاتْ بْوَاحْدْ الصُّوتْ قْوِي بْزَّافْ، وْغَيْتّْهْلَكْ ݣَاعْ دَاكْشِّي اللِّي فِيهُمْ بْالْعَافْيَة، وْغَتّْحْرَقْ الْأَرْضْ وْݣَاعْ دَاكْشِّي اللِّي فِيهَا.

¹¹إِيوَا إِلَا كَانْ ݣَاعْ هَادْشِّي غَيْتّْهْلَكْ، كِيفَاشْ خَاصّْكُمْ نْتُمَ تْكُونُو؟ رَاهْ خَاصّْكُمْ تْعِيشُو حَيَاةْ مْقَدّْسَة وْتْكُونُو مْتَّاقْيِينْ اللَّهْ.

¹²وْخَاصّْكُمْ تّْسْنَّاوْ وْتْطْلْبُو الْمْجِي دْيَالْ النّْهَارْ دْ الرَّبّْ دْغْيَا، عْلَاحْقَّاشْ فِيهْ غَيْتّْهَلْكُو السَّمَاوَاتْ بْالْعَافْيَة وْكُلْ حَاجَة خْرَى غَتْدُوبْ.

¹³وَلَكِنْ عْلَى حْسَابْ الْوَعْدْ دْيَالْ اللَّهْ، حْنَا كَنْتّْسَنَّاوْ سْمَا جْدِيدَة وْأَرْضْ جْدِيدَة فِينْ كَتْسْكُنْ التَّقْوَى.

¹⁴دَاكْشِّي عْلَاشْ آ خُوتِي الْعْزَازْ، مَا حَدّْكُمْ كَتّْسْنَّاوْ هَادْ الْأُمُورْ، دِيرُو جَهْدْكُمْ بَاشْ تْكُونُو بْلَا لُومْ وْبْلَا عِيبْ فْالْهْنَا مْعَ اللَّهْ.

¹⁵وْحْسْبُو الصّْبَرْ دْيَالْ رَبّْنَا وْجْبَة لْلنّْجَا، كِمَا كْتَبْ لِيكُمْ خُونَا الْعْزِيزْ بُولُسْ عْلَى حْسَابْ الْحْكْمَة اللِّي تّْعْطَاتْ لِيهْ،

¹⁶وْكِمَا كْتَبْ فْالرَّسَائِلْ دْيَالُه كُلّْهُمْ، مْلِّي تّْكَلّْمْ فِيهُمْ عْلَى هَادْ الْأُمُورْ. هَادْ الرَّسَائِلْ فِيهُمْ شِي حْوَايْجْ صْعَابْ يْتّْفَهْمُو، وْرَاهْ النَّاسْ اللِّي مَا كَيْفَهْمُوشْ وْمَا تَابْتِينْشْ فْالْإِيمَانْ كَيْبَدّْلُو الْمَعْنَى دْيَالْ هَادْشِّي كِمَا كَيْدِيرُو بْالْكْتُبْ لْخْرِينْ الْمْقَدّْسِينْ، وْهَكَّا كَيْهَلْكُو رَاسْهُمْ.

¹⁷وْنْتُمَ آ خُوتِي الْعْزَازْ، رَاكُمْ كَتْعَرْفُو هَادْشِّي مْنْ قْبَلْ، إِيوَا رْدُّو الْبَالْ بَاشْ مَا تّْبْعُوشْ التَّعْلِيمْ الْغَالْطْ دْيَالْ الْمُعَلِّمِينْ الْكْدَّابِينْ وْتْطِيحُو وْمَا تْبْقَاوْشْ تَابْتِينْ.

¹⁸وَلَكِنْ كْبْرُو فْالنِّعْمَة وْفْمَعْرِفَةْ رَبّْنَا وْمُنَجِّينَا يَسُوعْ الْمَسِيحْ، لِيهْ الْعَزّْ مْنْ دَابَا وْعْلَى الدّْوَامْ! آمِينْ.