Read Moroccan Standard Translation يُوحَنَّا اللّْوّْلَى 2 Bible Online

يُوحَنَّا اللّْوّْلَى 2 - Moroccan Standard Translation bible

يُوحَنَّا اللّْوّْلَى 2

¹الْفَصْلْ التَّانِي آ وْلِيدَاتِي، كَنْكْتَبْ لِيكُمْ هَادْ الْأُمُورْ بَاشْ مَا تْدَنْبُوشْ. وْإِلَا شِي وَاحْدْ فِيكُمْ دْنَبْ رَاهْ عَنْدْنَا اللِّي يْشْفَعْ فِينَا عَنْدْ الْآبْ، هُوَ يَسُوعْ الْمَسِيحْ الصَّالِحْ.

²وْهُوَ الدّْبِيحَة اللِّي تْقَدّْمَاتْ بَاشْ يْتّْغَفْرُو بِيهَا دْنُوبْنَا. مَاشِي غِيرْ دْنُوبْنَا، وَلَكِنْ حْتَّى دْنُوبْ ݣَاعْ النَّاسْ.

³وْهَكَّا كَنْعَرْفُو بْلِّي عْرَفْنَاهْ، إِلَا كَنْدِيرُو بْالْوْصِيَّاتْ دْيَالُه.

⁴وْاللِّي كَيْݣُولْ: «رَانِي عْرَفْتُه» وْمَا كَيْدِيرْشْ بْالْوْصِيَّاتْ دْيَالُه، رَاهْ هُوَ كْدَّابْ وْمَا فِيهْشْ الْحَقّْ.

⁵وَلَكِنْ اللِّي كَيْدِيرْ بْكْلَامُه، رَاهْ فْالْحَقِيقَة كْمْلَاتْ فِيهْ الْمْحَبَّة دْ اللَّهْ. وْبْهَادْشِّي كَنْعَرْفُو بْلِّي حْنَا تَابْتِينْ فِيهْ.

⁶وْاللِّي كَيْݣُولْ بْلِّي هُوَ تَابْتْ فِيهْ خَاصُّه يْعِيشْ حْتَّى هُوَ كِمَا عَاشْ الْمَسِيحْ.

⁷آ خُوتِي الْعْزَازْ، رَانِي مَا كَنْكْتَبْشْ لِيكُمْ وْصِيَّة جْدِيدَة، وَلَكِنْ وْصِيَّة قْدِيمَة كَانْتْ عَنْدْكُمْ مْنْ الْبْدُو. وْهَادْ الْوْصِيَّة الْقْدِيمَة هِيَ الْخْبَارْ اللِّي سْمَعْتُوهَا.

⁸وَاخَّا هَكَّاكْ، رَانِي كَنْكْتَبْ لِيكُمْ وْصِيَّة جْدِيدَة، وْهَادِي حَقِيقَة كَتْبَانْ فْالْمَسِيحْ وْفِيكُمْ: رَاهْ الضّْلَامْ كَيْتّْحَيّْدْ، وْالنُّورْ الْحْقِيقِي مْضَوِّي مْنْ قْبَلْ.

⁹وْاللِّي كَيْݣُولْ بْلِّي هُوَ فْالنُّورْ وَلَكِنْ كَيْكْرَهْ خُوهْ، رَاهْ هُوَ مَازَالْ فْالضّْلَامْ.

¹⁰اللِّي كَيْبْغِي خُوهْ رَاهْ هُوَ تَابْتْ فْالنُّورْ وْمَا فِيهْ حْتَّى حَاجَة اللِّي غَتْخَلِّيهْ يْعْتَرْ.

¹¹وَلَكِنْ اللِّي كَيْكْرَهْ خُوهْ رَاهْ هُوَ فْالضّْلَامْ، وْفْالضّْلَامْ كَيْمْشِي وْمَا كَيْعْرَفْشْ فِينْ غَادِي، عْلَاحْقَّاشْ الضّْلَامْ عْمَى عِينِيهْ.

¹²كَنْكْتَبْ لِيكُمْ آ الْوْلِيدَاتْ، عْلَاحْقَّاشْ اللَّهْ غْفَرْ دْنُوبْكُمْ بْفْضَلْ إِسْمْ الْمَسِيحْ.

¹³كْنْكْتَبْ لِيكُمْ آ الْبَّاوَاتْ، عْلَاحْقَّاشْ عْرَفْتُو الْمَسِيحْ اللِّي كَانْ مْنْ الْبْدُو. كَنْكْتَبْ لِيكُمْ آ الشَّبَابْ، عْلَاحْقَّاشْ غْلَبْتُو الشِّيطَانْ.

¹⁴كْتَبْتْ لِيكُمْ آ الْوْلَادْ، عْلَاحْقَّاشْ عْرَفْتُو الْآبْ، كْتَبْتْ لِيكُمْ آ الْبَّاوَاتْ، عْلَاحْقَّاشْ عْرَفْتُو الْمَسِيحْ اللِّي كَانْ مْنْ الْبْدُو. كْتَبْتْ لِيكُمْ آ الشَّبَابْ عْلَاحْقَّاشْ رَاكُمْ قْوِيِّينْ، وْكْلْمَةْ اللَّهْ تَابْتَة فِيكُمْ، وْغْلَبْتُو الشِّيطَانْ.

¹⁵مَا تْبْغِيوْشْ الدّْنْيَا وَلَا الْحْوَايْجْ اللِّي فْالدّْنْيَا. إِلَا شِي حَدّْ كَيْبْغِي الدّْنْيَا رَاهْ مَا فِيهْشْ الْمْحَبَّة دْيَالْ الْآبْ.

¹⁶عْلَاحْقَّاشْ ݣَاعْ الْأُمُورْ اللِّي فْالدّْنْيَا اللِّي هِيَ شَهْوَةْ الدَّاتْ، وْشَهْوَةْ الْعِينِينْ، وْالْإِفْتِخَارْ بْأُمُورْ الدّْنْيَا، مَا كَتْجِيشْ مْنْ الْآبْ وَلَكِنْ مْنْ الدّْنْيَا.

¹⁷وْالدّْنْيَا وْالشَّهَوَاتْ اللِّي فِيهَا مَا دَايْمِينْشْ، وَلَكِنْ اللِّي كَيْدِيرْ بْمُرَادْ اللَّهْ غَيْبْقَى عَايْشْ عْلَى الدّْوَامْ.

¹⁸آ الْوْلَادْ، هَادِي هِيَ السَّاعَة اللّْخْرَة. وْرَاكُمْ سْمَعْتُو بْلِّي الْعْدُو دْيَالْ الْمَسِيحْ جَايْ، وْدَابَا بَانُو بْزَّافْ دْيَالْ الْعْدْيَانْ دْ الْمَسِيحْ. وْبْهَادْشِّي كَنْعَرْفُو بْلِّي هَادِي هِيَ السَّاعَة اللّْخْرَة.

¹⁹مْنْ عَنْدْنَا خَرْجُو، وَلَكِنْ مَا كَانُوشْ مْنَّا، حِيتْ كُونْ كَانُو مْنَّا كُونْ بْقَاوْ مْعَانَا. وَلَكِنْ بْهَادْشِّي كَيْبَيّْنُو بْلِّي مَاشِي كُلّْهُمْ مْنَّا.

²⁰نْتُمَ خْدِيتُو الرُّوحْ الْقُدُسْ اللِّي عْطَاهْ لِيكُمْ الْمَسِيحْ وْرَاكُمْ كَتْعَرْفُو كُلّْشِي.

²¹وْأَنَا مَا كَنْكْتَبْشْ لِيكُمْ عْلَاحْقَّاشْ مَا كَتْعَرْفُوشْ الْحَقّْ، وَلَكِنْ عْلَاحْقَّاشْ كَتْعَرْفُوهْ، وْكَتْعَرْفُو بْلِّي الْكْدُوبْ كُلُّه مَا كَيْجِيشْ مْنْ الْحَقّْ.

²²شْكُونْ هُوَ الْكْدَّابْ مْنْ غِيرْ هَادَاكْ اللِّي كَيْنْكَرْ بْلِّي يَسُوعْ هُوَ الْمَسِيحْ؟ هَادَا هُوَ الْعْدُو دْيَالْ الْمَسِيحْ اللِّي كَيْنْكَرْ الْآبْ وْالْوَلْدْ.

²³اللِّي كَيْنْكَرْ الْوَلْدْ كَيْنْكَرْ الْآبْ حْتَّى هُوَ، وْاللِّي كَيْعْتَرْفْ بْالْوَلْدْ كَيْعْتَرْفْ بْالْآبْ حْتَّى هُوَ.

²⁴الْكْلَامْ اللِّي سْمَعْتُوهْ مْنْ اللّْوّْلْ خَاصُّه يْتْبَتْ فِيكُمْ. إِلَا تْبَتْ فِيكُمْ الْكْلَامْ اللِّي سْمَعْتُوهْ مْنْ اللّْوّْلْ، غَادِي تّْبْتُو حْتَّى نْتُمَ فْالْوَلْدْ وْفْالْآبْ.

²⁵وْهَادَا هُوَ الْوَعْدْ اللِّي وَاعْدْنَا بِيهْ الْمَسِيحْ: الْحَيَاةْ الدَّايْمَة.

²⁶كَنْكْتَبْ لِيكُمْ هَادْشِّي عْلَى هَادُوكْ اللِّي كَيْحَاوْلُو يْغَلّْطُوكُمْ.

²⁷وَلَكِنْ نْتُمَ رَاهْ الرُّوحْ الْقُدُسْ اللِّي خْدِيتُوهْ مْنْ الْمَسِيحْ تَابْتْ فِيكُمْ، وْهَادَا عْلَاشْ رَاكُمْ مَا مْحْتَاجِينْشْ لْلِّي يْعَلّْمْكُمْ، حِيتْ الرُّوحْ الْقُدُسْ كَيْعَلّْمْكُمْ كُلّْشِي، وْهُوَ صَادْقْ وْمَا فِيهْشْ الْكْدُوبْ. تْبْتُو فْالْمَسِيحْ كِمَا عَلّْمْكُمْ الرُّوحْ الْقُدُسْ.

²⁸وْدَابَا آ الْوْلَادْ، تْبْتُو فِيهْ، بَاشْ مْلِّي يْبَانْ فْالدّْنْيَا تْكُونْ عَنْدْنَا التِّقَة، وْمَا نْحَشْمُوشْ قُدَّامُه مْلِّي يْرْجَعْ.

²⁹إِلَا كَتْعَرْفُو بْلِّي الْمَسِيحْ صَالِحْ، إِيوَا خَاصّْكُمْ تْعَرْفُو بْلِّي كُلّْ وَاحْدْ كَيْدِيرْ الْأَعْمَالْ اللِّي كَتْرْضِي اللَّهْ رَاهْ تّْوْلَدْ مْنْ اللَّهْ.