Read Moroccan Standard Translation يُوحَنَّا اللّْوّْلَى 3 Bible Online

يُوحَنَّا اللّْوّْلَى 3 - Moroccan Standard Translation bible

يُوحَنَّا اللّْوّْلَى 3

¹الْفَصْلْ التَّالْتْ شُوفُو شْحَالْ كَيْبْغِينَا الْآبْ حْتَّى وْلِّينَا كَنْتّْسَمَّاوْ وْلَادْ اللَّهْ! وْفْالْحَقِيقَة حْنَا وْلَادُه، وْهَادْشِّي عْلَاشْ مَا كَيْعَرْفُونَاشْ النَّاسْ دْ الدّْنْيَا، عْلَاحْقَّاشْ مَا كَيْعَرْفُوشْ اللَّهْ.

²آ خُوتِي الْعْزَازْ، حْنَا دَابَا وْلَادْ اللَّهْ، وْمَازَالْ مَا بَانْ آشْنُو غَنْكُونُو مْنْ بَعْدْ، وَلَكِنْ كَنْعَرْفُو بْلِّي فْالْوَقْتْ اللِّي غَيْبَانْ فِيهْ الْمَسِيحْ، غَنْكُونُو بْحَالُه عْلَاحْقَّاشْ غَنْشُوفُوهْ كِمَا هُوَ.

³اللِّي عَنْدُه هَادْ الرّْجَا فْالْمَسِيحْ، كَيْوَلِّي نْقِي كِمَا الْمَسِيحْ نْقِي.

⁴اللِّي كَيْدِيرْ الدّْنُوبْ رَاهْ كَيْتّْعَدَّى عْلَى شْرَعْ اللَّهْ. حِيتْ الدَّنْبْ هُوَ التَّعَدُّو عْلَى شْرَعْ اللَّهْ.

⁵وْنْتُمَ كَتْعَرْفُو بْلِّي الْمَسِيحْ بَانْ بَاشْ يْحَيّْدْ الدّْنُوبْ، وْهُوَ مَا فِيهْ حْتَّى شِي دَنْبْ.

⁶كُلّْ وَاحْدْ كَيْتْبَتْ فِيهْ مَا كَيْدِيرْشْ الدّْنُوبْ، وْاللِّي كَيْدِيرْ الدّْنُوبْ عَمّْرُه مَا شَافُه وَلَا عَرْفُه.

⁷آ الْوْلِيدَاتْ، مَا تْخَلِّيوْشْ شِي وَاحْدْ يْغَلّْطْكُمْ، اللِّي كَيْدِيرْ الْأَعْمَالْ اللِّي كَتْرْضِي اللَّهْ رَاهْ مْتَّاقِي اللَّهْ بْحَالْ الْمَسِيحْ.

⁸وْاللِّي كَيْدِيرْ الدّْنُوبْ رَاهْ هُوَ مْنْ إِبْلِيسْ، عْلَاحْقَّاشْ مْنْ اللّْوّْلْ وْإِبْلِيسْ كَيْدِيرْ الدّْنُوبْ. هَادْشِّي عْلَاشْ جَا وَلْدْ اللَّهْ بَاشْ يْخَرّْبْ أَعْمَالْ إِبْلِيسْ.

⁹اللِّي تّْوْلَدْ مْنْ اللَّهْ رَاهْ مَا كَيْدِيرْشْ الدّْنُوبْ، عْلَاحْقَّاشْ الزّْرِّيعَة اللِّي زْرَعْهَا فِيهْ اللَّهْ كَتْتْبَتْ فِيهْ، وْمَا يْقْدَرْشْ يْدِيرْ الدّْنُوبْ عْلَاحْقَّاشْ تّْوْلَدْ مْنْ اللَّهْ.

¹⁰بْهَادْشِّي كَيْبَانُو وْلَادْ اللَّهْ وْوْلَادْ إِبْلِيسْ: اللِّي مَا كَيْدِيرْشْ الْأَعْمَالْ اللِّي كَتْرْضِي اللَّهْ وْحْتَّى اللِّي مَا كَيْبْغِيشْ خُوهْ رَاهْ هُوَ مَاشِي مْنْ اللَّهْ.

¹¹هَادِي هِيَ الْخْبَارْ اللِّي سْمَعْتُوهَا مْنْ اللّْوّْلْ: خَاصّْنَا نْبْغِيوْ بْعْضِيَّاتْنَا.

¹²مَاشِي بْحَالْ قَايِينْ اللِّي كَانْ مْنْ إِبْلِيسْ وْقْتَلْ خُوهْ. وْعْلَاشْ قْتْلُه؟ حِيتْ أَعْمَالُه كَانْتْ دْيَالْ الشَّرّْ، وْالْأَعْمَالْ دْيَالْ خُوهْ كَانْتْ مْزْيَانَة.

¹³إِيوَا آ خُوتِي، بْلَا مَا تْتّْعَجّْبُو إِلَا كْرْهُوكُمْ نَاسْ الدّْنْيَا.

¹⁴حْنَا كَنْعَرْفُو بْلِّي دْزْنَا مْنْ الْمُوتْ لْلْحَيَاةْ، عْلَاحْقَّاشْ كَنْبْغِيوْ خُوتْنَا. اللِّي مَا كَيْبْغِيشْ خُوهْ كَيْبْقَى تَحْتْ حْكَامْ الْمُوتْ.

¹⁵اللِّي كَيْكْرَهْ خُوهْ رَاهْ هُوَ قْتَّالْ، وْنْتُمَ كَتْعَرْفُو بْلِّي الْقْتَّالْ مَا غَتْكُونْشْ عَنْدُه الْحَيَاةْ الدَّايْمَة.

¹⁶بْهَادْشِّي عْرَفْنَا الْمْحَبَّة: يَسُوعْ عْطَى حْيَاتُه عْلَى وْدّْنَا. إِيوَا حْتَّى حْنَا خَاصّْنَا نْعْطِيوْ حْيَاتْنَا عْلَى وْدّْ خُوتْنَا.

¹⁷إِلَا كَانْ شِي وَاحْدْ لَبَاسْ عْلِيهْ، وْشَافْ خُوهْ مْحْتَاجْ، وْمَا حَنّْشْ عْلِيهْ، كِيفَاشْ غَتْكُونْ مْحَبَّةْ اللَّهْ تَابْتَة فِيهْ؟

¹⁸آ الْوْلِيدَاتْ، مَا خَاصّْشْ الْمْحَبَّة دْيَالْنَا تْكُونْ غِيرْ بْالْهَضْرَة وْلَا بْاللّْسَانْ، وَلَكِنْ خَاصّْهَا تْكُونْ بْالْأَعْمَالْ وْالْحَقّْ.

¹⁹هَكَّا غَنْعَرْفُو بْلِّي حْنَا مْنْ الْحَقّْ وْغَيْكُونْ قَلْبْنَا مْرْتَاحْ قُدَّامْ اللَّهْ.

²⁰وْإِلَا قَلْبْنَا تَّهْمْنَا، رَاهْ اللَّهْ كْبَرْ مْنْ قَلْبْنَا وْهُوَ كَيْعْرَفْ كُلّْشِي.

²¹آ خُوتِي الْعْزَازْ، إِلَا مَا كَانْشْ قَلْبْنَا كَيْتَّهْمْنَا، رَاهْ عَنْدْنَا تِقَة كْبِيرَة فْاللَّهْ.

²²وْݣَاعْ دَاكْشِّي اللِّي كَنْطْلْبُوهْ مْنُّه كَنَاخْدُوهْ، عْلَاحْقَّاشْ كَنْطِيعُو الْوْصِيَّاتْ دْيَالُه، وْكَنْدِيرُو دَاكْشِّي اللِّي كَيْرْضِيهْ.

²³وْهَادِي هِيَ الْوْصِيَّة دْيَالُه: خَاصّْنَا نْآمْنُو بْالْإِسْمْ دْيَالْ وَلْدُه يَسُوعْ الْمَسِيحْ، وْنْبْغِيوْ بْعْضِيَّاتْنَا كِمَا وْصَّانَا.

²⁴وْاللِّي كَيْطِيعْ الْوْصِيَّاتْ دْيَالْ اللَّهْ، رَاهْ كَيْتْبَتْ فْاللَّهْ وْاللَّهْ كَيْتْبَتْ فِيهْ. وْهَكَّا كَنْعَرْفُو بْلِّي اللَّهْ كَيْتْبَتْ فِينَا بْالرُّوحْ الْقُدُسْ اللِّي عْطَاهْ لِينَا.