Read Moroccan Standard Translation يُوحَنَّا اللّْوّْلَى 4 Bible Online

يُوحَنَّا اللّْوّْلَى 4 - Moroccan Standard Translation bible

يُوحَنَّا اللّْوّْلَى 4

¹الْفَصْلْ الرَّابْعْ آ خُوتِي الْعْزَازْ، مَا تِّيقُوشْ فْكُلّْ وَاحْدْ كَيْݣُولْ بْاللِّي عَنْدُه الرُّوحْ الْقُدُسْ، وَلَكِنْ جَرّْبُو الْأَرْوَاحْ اللِّي عَنْدْهُمْ بَاشْ تْعَرْفُو وَاشْ هُمَ مْنْ اللَّهْ، عْلَاحْقَّاشْ بْزَّافْ دْ الْأَنْبِيَا الْكْدَّابِينْ جَاوْ لْلدّْنْيَا.

²وْهَا كِيفَاشْ تْعَرْفُو رُوحْ اللَّهْ: كُلّْ رُوحْ كَيْعْتَرْفْ بْلِّي يَسُوعْ الْمَسِيحْ جَا فْالدَّاتْ رَاهْ هُوَ مْنْ اللَّهْ،

³وْكُلّْ رُوحْ مَا كَيْعْتَرْفْشْ بْيَسُوعْ، رَاهْ مَاشِي مْنْ اللَّهْ، وَلَكِنْ هُوَ الرُّوحْ دْيَالْ الْعْدُو دْ الْمَسِيحْ اللِّي سْمَعْتُو بْلِّي جَايْ، وْدَابَا رَاهْ هُوَ كَايْنْ فْالدّْنْيَا.

⁴نْتُمَ مْنْ اللَّهْ آ وْلِيدَاتِي، وْرَاكُمْ غْلَبْتُو الْأَنْبِيَا الْكْدَّابِينْ، عْلَاحْقَّاشْ هَادَاكْ اللِّي فِيكُمْ قْوَى مْنْ هَادَاكْ اللِّي فْالدّْنْيَا.

⁵هُمَ مْنْ هَادْ الدّْنْيَا، وْعْلَى هَادْشِّي كَيْتّْكَلّْمُو بْالْهَضْرَة دْيَالْ الدّْنْيَا، وْالدّْنْيَا كَتْسْمَعْ لِيهُمْ.

⁶حْنَا مْنْ اللَّهْ، وْاللِّي كَيْعْرَفْ اللَّهْ كَيْسْمَعْ لِينَا، وْاللِّي مَاشِي مْنْ اللَّهْ مَا كَيْسْمَعْشْ لِينَا. وْهَكَّا كَنْعَرْفُو الْفَرْقْ بِينْ رُوحْ الْحَقّْ وْرُوحْ الْبَاطْلْ.

⁷آ خُوتِي الْعْزَازْ، خَاصّْنَا نْبْغِيوْ بْعْضِيَّاتْنَا، عْلَاحْقَّاشْ الْمْحَبَّة كَتْجِي مْنْ اللَّهْ، وْاللِّي كَيْحَبّْ رَاهْ تّْوْلَدْ مْنْ اللَّهْ وْكَيْعْرَفْ اللَّهْ.

⁸وْاللِّي مَا كَيْحَبّْشْ مَا كَيْعْرَفْشْ اللَّهْ، عْلَاحْقَّاشْ اللَّهْ مْحَبَّة.

⁹وْهَا كِيفَاشْ بَانْتْ مْحَبَّةْ اللَّهْ فِينَا: اللَّهْ صِيفْطْ وَلْدُه الْوْحِيدْ لْلدّْنْيَا بَاشْ نْحْيَاوْ بِيهْ.

¹⁰وْهَادِي هِيَ الْمْحَبَّة: مَاشِي حْنَا اللِّي بْغِينَا اللَّهْ، وَلَكِنْ هُوَ اللِّي بْغَانَا وْصِيفْطْ وَلْدُه دْبِيحَة تْقَدّْمَاتْ بَاشْ يْتّْغَفْرُو بِيهَا دْنُوبْنَا.

¹¹آ خُوتِي الْعْزَازْ، إِلَا اللَّهْ بْغَانَا حْتَّى لْهَادْ الدَّرَجَة، رَاهْ خَاصّْنَا حْتَّى حْنَا نْبْغِيوْ بْعْضِيَّاتْنَا.

¹²عَمّْرْ شِي حَدّْ مَا شَافْ اللَّهْ، وْإِلَا كَنْبْغِيوْ بْعْضِيَّاتْنَا، اللَّهْ تَابْتْ فِينَا، وْمْحَبّْتُه مْكْمُولَة فِينَا.

¹³هَكَّا كَنْعَرْفُو بْلِّي حْنَا تَابْتِينْ فْاللَّهْ وْهُوَ فِينَا، عْلَاحْقَّاشْ عْطَانَا مْنْ الرُّوحْ دْيَالُه.

¹⁴وْحْنَا شْفْنَا وْكَنْشَهْدُو بْلِّي الْآبْ صِيفْطْ وَلْدُه بَاشْ يْنَجِّي ݣَاعْ النَّاسْ.

¹⁵وْكُلّْ مْنْ كَيْعْتَرْفْ بْلِّي يَسُوعْ هُوَ وَلْدْ اللَّهْ، اللَّهْ كَيْتْبَتْ فِيهْ وْهُوَ كَيْتْبَتْ فْاللَّهْ.

¹⁶وْحْنَا كَنْعَرْفُو وْكَنْآمْنُو بْلِّي اللَّهْ كَيْبْغِينَا. اللَّهْ مْحَبَّة، وْاللِّي كَيْتْبَتْ فْالْمْحَبَّة، كَيْتْبَتْ فْاللَّهْ وْاللَّهْ كَيْتْبَتْ فِيهْ.

¹⁷وْهَا كِيفَاشْ كْمْلَاتْ فِينَا الْمْحَبَّة: خَاصّْ تْكُونْ عَنْدْنَا تِقَة كْبِيرَة فْيُومْ الْحِسَابْ، عْلَاحْقَّاشْ حْيَاتْنَا كَتْشْبَهْ لْحَيَاةْ الْمَسِيحْ فْهَادْ الدّْنْيَا.

¹⁸الْخُوفْ مَا كَايْنْشْ فْالْمْحَبَّة، وَلَكِنْ الْمْحَبَّة الْمْكْمُولَة كَتْخَرّْجْ الْخُوفْ عْلَى بْرَّا، عْلَاحْقَّاشْ الْخُوفْ كَيْجِي مْلِّي كَيْكُونْ الْعِقَابْ. وْاللِّي كَيْخَافْ رَاهْ مَازَالْ مَا كْمْلَاتْ فِيهْ الْمْحَبَّة.

¹⁹حْنَا كَنْبْغِيوْ اللَّهْ، عْلَاحْقَّاشْ هُوَ اللِّي بْغَانَا اللّْوّْلْ.

²⁰إِلَا شِي وَاحْدْ ݣَالْ: «أَنَا كَنْبْغِي اللَّهْ» وْكَيْكْرَهْ خُوهْ، رَاهْ هُوَ كْدَّابْ، حِيتْ اللِّي مَا كَيْبْغِيشْ خُوهْ اللِّي كَيْشُوفُه، كِيفَاشْ يْقْدَرْ يْبْغِي اللَّهْ اللِّي عَمّْرُه مَا شَافُه؟

²¹وْهَادِي هِيَ الْوْصِيَّة اللِّي عْطَاهَا لِينَا اللَّهْ: اللِّي كَيْبْغِي اللَّهْ كَيْبْغِي خُوهْ حْتَّى هُوَ.