Read Moroccan Standard Translation يُوحَنَّا اللّْوّْلَى 5 Bible Online

يُوحَنَّا اللّْوّْلَى 5 - Moroccan Standard Translation bible

يُوحَنَّا اللّْوّْلَى 5

¹الْفَصْلْ الْخَامْسْ اللِّي كَيْآمْنْ بْلِّي يَسُوعْ هُوَ الْمَسِيحْ رَاهْ تّْوْلَدْ مْنْ اللَّهْ. وْاللِّي كَيْبْغِي الْبُو رَاهْ كَيْبْغِي وْلَادُه حْتَّى هُمَ.

²وْهَكَّا كَنْعَرْفُو بْلِّي حْنَا كَنْبْغِيوْ وْلَادْ اللَّهْ، إِلَا كَنْبْغِيوْ اللَّهْ وْكَنْدِيرُو بْالْوْصِيَّاتْ دْيَالُه.

³حِيتْ هَادِي هِيَ الْمْحَبَّة دْيَالْ اللَّهْ: نْدِيرُو بْالْوْصِيَّاتْ دْيَالُه، وْرَاهْ الْوْصِيَّاتْ دْيَالُه مَاشِي صْعَابْ.

⁴عْلَاحْقَّاشْ اللِّي تّْوْلَدْ مْنْ اللَّهْ كَيْغْلَبْ الدّْنْيَا. وْاللِّي كَيْخَلِّينَا نْغَلْبُو الدّْنْيَا هُوَ إِيمَانْنَا.

⁵وْشْكُونْ اللِّي كَيْغْلَبْ هَادْ الدّْنْيَا، مْنْ غِيرْ هَادَاكْ اللِّي كَيْآمْنْ بْلِّي يَسُوعْ هُوَ وَلْدْ اللَّهْ؟

⁶يَسُوعْ الْمَسِيحْ هُوَ اللِّي جَا بْالْمَا وْالدّْمْ، مَاشِي بْالْمَا بُوحْدُه، وَلَكِنْ بْالْمَا وْالدّْمْ. وْالرُّوحْ الْقُدُسْ هُوَ اللِّي كَيْشْهَدْ، عْلَاحْقَّاشْ الرُّوحْ الْقُدُسْ هُوَ الْحَقّْ.

⁷رَاهْ كَايْنِينْ تْلَاتَة اللِّي كَيْشَهْدُو لْلْمَسِيحْ

⁸هُمَ: الرُّوحْ الْقُدُسْ، وْالْمَا، وْالدّْمْ. وْهَادْ التّْلَاتَة هُمَ فْوَاحْدْ.

⁹إِلَا كَنْقْبْلُو الشّْهَادَة دْيَالْ النَّاسْ، رَاهْ الشّْهَادَة دْيَالْ اللَّهْ كْبَرْ مْنْ كُلّْشِي، عْلَاحْقَّاشْ هَادِي هِيَ الشّْهَادَة اللِّي شْهَدْ بِيهَا لْوَلْدُه.

¹⁰اللِّي كَيْآمْنْ بْوَلْدْ اللَّهْ كَتْكُونْ هَادْ الشّْهَادَة تَابْتَة فِيهْ. وْاللِّي مَا كَيْآمْنْشْ بْاللَّهْ، كَيْرَدّْ اللَّهْ كْدَّابْ، عْلَاحْقَّاشْ مَا كَيْآمْنْشْ بْالشّْهَادَة اللِّي شْهَدْ بِيهَا لْوَلْدُه.

¹¹وْهَادِي هِيَ الشّْهَادَة: اللَّهْ عْطَانَا الْحَيَاةْ الدَّايْمَة، وْهَادْ الْحَيَاةْ هِيَ فْالْوَلْدْ دْيَالُه.

¹²اللِّي عَنْدُه وَلْدْ اللَّهْ عَنْدُه الْحَيَاةْ الدَّايْمَة، وْاللِّي مَا عَنْدُوشْ وَلْدْ اللَّهْ مَا عَنْدُوشْ الْحَيَاةْ الدَّايْمَة.

¹³كْتَبْتْ لِيكُمْ هَادْشِّي، بَاشْ تْعَرْفُو، نْتُمَ الْمُومْنِينْ بْإِسْمْ وَلْدْ اللَّهْ، بْلِّي عَنْدْكُمْ الْحَيَاةْ الدَّايْمَة.

¹⁴وْهَادِي هِيَ التِّقَة اللِّي عَنْدْنَا فْاللَّهْ: مْلِّي كَنْطْلْبُو شِي حَاجَة عْلَى حْسَابْ مُرَادُه كَيْسْتَاجْبْ لِينَا.

¹⁵وْإِلَا كْنَّا كَنْعَرْفُو بْلِّي اللَّهْ كَيْسْمَعْ لْكُلّْ حَاجَة كَنْطْلْبُوهَا مْنُّه، رَاهْ حْنَا كَنْعَرْفُو بْلِّي ݣَاعْ دَاكْشِّي اللِّي كَنْطْلْبُوهْ مْنُّه غَنَاخْدُوهْ.

¹⁶إِلَا شِي وَاحْدْ شَافْ خُوهْ كَيْدِيرْ شِي دَنْبْ مَا كَيْتّْسَبّْبْشْ فْالْمُوتْ، خَاصُّه يْطْلَبْ مْنْ اللَّهْ بَاشْ يْعْطِيهْ الْحَيَاةْ، وْهَادْشِّي رَاهْ غِيرْ لْلِّي دْنُوبْهُمْ مَا كَيْتّْسَبّْبُوشْ فْالْمُوتْ. وْكَايْنْ الدَّنْبْ اللِّي كَيْتّْسَبّْبْ فْالْمُوتْ، وْمَاشِي عْلَى وْدّْ هَادَا ݣْلْتْ بْلِّي خَاصّْنَا نْطْلْبُو اللَّهْ.

¹⁷كُلّْ إِتْمْ هُوَ دَنْبْ، وَلَكِنْ مَاشِي كُلَّ دَنْبْ كَيْدِّي لْلْمُوتْ.

¹⁸كَنْعَرْفُو بْلِّي كُلّْ وَاحْدْ تّْوْلَدْ مْنْ اللَّهْ مَا كَيْدِيرْشْ الدّْنُوبْ، وَلَكِنْ اللِّي تّْوْلَدْ مْنْ اللَّهْ كَيْحَفْضُه وْالشِّيطَانْ مَا كَيْمَسُّوشْ.

¹⁹كَنْعَرْفُو بْلِّي حْنَا مْنْ اللَّهْ، وْبْلِّي الدّْنْيَا كُلّْهَا تَحْتْ حْكَامْ الشِّيطَانْ.

²⁰وْكَنْعَرْفُو بْلِّي وَلْدْ اللَّهْ جَا وْعْطَانَا الْفَهْمْ بَاشْ نْعَرْفُو الْحَقّْ. وْحْنَا فْالْحَقّْ بْفْضَلْ وَلْدُه يَسُوعْ الْمَسِيحْ، اللِّي هُوَ الْإِلَاهْ الْحْقِيقِي وْالْحَيَاةْ الدَّايْمَة.

²¹آ وْلِيدَاتِي، حْضِيوْ رَاسْكُمْ مْنْ الْأَصْنَامْ!