Read Moroccan Standard Translation يُوحَنَّا التَّالْتَة 1 Bible Online

يُوحَنَّا التَّالْتَة 1 - Moroccan Standard Translation bible

يُوحَنَّا التَّالْتَة 1

¹مْنْ يُوحَنَّا الْمْسْؤُولْ الْكْبِيرْ دْ الْكْنِيسَة، لْخُويَا الْعْزِيزْ غَايُوسْ اللِّي كَنْبْغِيهْ فْالْحَقّْ.

²آ خُويَا الْعْزِيزْ، كَنْتّْمَنَّى تْكُونْ بِخِيرْ وْعْلَى خِيرْ، وْتْكُونْ صَحّْتْكْ مْزْيَانَة، كِمَا حْيَاتْكْ الرُّوحِيَّة مْزْيَانَة.

³فْرَحْتْ بْزَّافْ مْلِّي جَاوْ شِي خُوتْ، وْشْهْدُو لِيكْ بْلِّي نْتَ تَابْتْ فْالْحَقّْ وْكَتْعِيشْ فْالْحَقّْ.

⁴رَاهْ الْفَرْحَة دْيَالِي مَا لِيهَا مْتِيلْ مْلِّي كَنْسْمَعْ بْلِّي وْلَادِي كَيْعِيشُو فْالْحَقّْ.

⁵آ خُويَا الْعْزِيزْ، نْتَ أَمِينْ فْكُلّْ حَاجَة كَتْدِيرْهَا مْعَ الْخُوتْ الْمُومْنِينْ وْخُصُوصًا الْبْرَّانِيِّينْ،

⁶اللِّي شْهْدُو بْالْمْحَبَّة دْيَالْكْ قُدَّامْ الْكْنِيسَة. إِيوَا رَاهْ مْزْيَانْ تْعَاوْنْهُمْ بَاشْ يْكَمّْلُو السّْفَرْ دْيَالْهُمْ كِمَا كَيْبْغِي اللَّهْ،

⁷حِيتْ عْلَى وْدّْ إِسْمْ الرَّبّْ خَرْجُو، وْهُمَ مَا كَيَاخْدُو حْتَّى حَاجَة مْنْ عَنْدْ النَّاسْ اللِّي مَاشِي مُومْنِينْ.

⁸عْلَى هَادْشِّي، بْحَالْ هَادْ النَّاسْ خَاصّْنَا نْرَحّْبُو بِيهُمْ، بَاشْ نْشَارْكُوهُمْ فْالْخْدْمَة دْيَالْ الْحَقّْ.

⁹رَانِي كْتَبْتْ شِي حَاجَة لْلْكْنِيسَة، وَلَكِنْ دِيُوتْرِيفِسْ اللِّي كَيْبْغِي يْكُونْ مْسْؤُولْ عْلِيهُمْ، مَا قْبَلْشْ كْلَامْنَا.

¹⁰وْعْلَى هَادْشِّي، مْلِّي نْجِي غَنْتّْكَلّْمْ عْلَى دَاكْشِّي اللِّي كَيْدِيرْ، وْعْلَى كِيفَاشْ كَيْتّْكَلّْمْ عْلِينَا بْكْلَامْ خَايْبْ. وْفُوقْ مْنْ هَادْشِّي مَا كَيْرَحّْبْشْ حْتَّى بْالْخُوتْ الْمُومْنِينْ إِلَا جَاوْ، وْمَا كَيْخَلِّيشْ اللِّي يْرَحّْبْ بِيهُمْ، وْكَيْجَرِّي عْلِيهُمْ مْنْ الْكْنِيسَة.

¹¹آ خُويَا الْعْزِيزْ، مَا تّْبَعْشْ الشَّرّْ وَلَكِنْ تْبَعْ الْخِيرْ، حِيتْ اللِّي كَيْدِيرْ الْخِيرْ رَاهْ مْنْ اللَّهْ، وْاللِّي كَيْدِيرْ الشَّرّْ رَاهْ مَا عْرَفْشْ اللَّهْ.

¹²أَمَّا دِيمِتْرِيُوسْ رَاهْ ݣَاعْ النَّاسْ كَيْشَهْدُو لِيهْ بْالْخِيرْ، وْالْحَقّْ بْرَاسُه كَيْشْهَدْ لِيهْ، وْحْتَّى حْنَا كَنْشَهْدُو لِيهْ، وْرَاكْ كَتْعْرَفْ بْلِّي الشّْهَادَة دْيَالْنَا صْحِيحَة.

¹³عَنْدِي بْزَّافْ دْ الْأُمُورْ مَا نْكْتَبْ لِيكْ، وَلَكِنْ مَا بْغِيتْشْ نْكْتَبْهَا لِيكْ بْالْمْدَادْ وْالرِّيشَة.

¹⁴وْكَنْتّْمَنَّى نْشُوفْكْ قْرِيبْ وْنْتّْكَلّْمُو وْجَهْ لْوْجَهْ.

¹⁵وْكَنْطْلَبْ مْنْ اللَّهْ يْعْطِيكْ الْهْنَا. رَاهْ كَيْسَلّْمُو عْلِيكْ ݣَاعْ الْخُوتْ. سَلّْمْ عْلَى الْخُوتْ الْعْزَازْ، كُلّْ وَاحْدْ بْسْمِيتُه.