Read Moroccan Standard Translation يَهُودَا 1 Bible Online

يَهُودَا 1 - Moroccan Standard Translation bible

يَهُودَا 1

¹أَنَا يَهُودَا الْعَبْدْ دْيَالْ يَسُوعْ الْمَسِيحْ، وْخُو يَعْقُوبْ، كَنْكْتَبْ لْهَادُوكْ اللِّي عَيّْطْ لِيهُمْ اللَّهْ الْآبْ وْكَيْبْغِيهُمْ، وْكَيْحْفَضْهُمْ لْيَسُوعْ الْمَسِيحْ،

²اللَّهْ يْكَتّْرْ لِيكُمْ الرَّحْمَة وْالْهْنَا وْالْمْحَبَّة.

³آ خُوتِي الْعْزَازْ، كْنْتْ كَنْتّْمَنَّى نْكْتَبْ لِيكُمْ عْلَى الْمُوضُوعْ دْيَالْ النّْجَا اللِّي كَنْتّْشَارْكُو فِيهْ كُلّْنَا، وَلَكِنْ دَابَا بَانْ لِيَّ بْلِّي خَاصّْنِي نْكْتَبْ لِيكُمْ بَاشْ نْشَجّْعْكُمْ تْكَافْحُو عْلَى وْدّْ الْإِيمَانْ اللِّي عْطَاهْ اللَّهْ فْمَرَّة لْلْمُومْنِينْ دْيَالُه الْمْقَدّْسِينْ.

⁴حِيتْ شِي نَاسْ فِيهُمْ الشَّرّْ تْسَلُّو فْوَسْطْكُمْ، وْرَاهُمْ كَيْحَوّْلُو النِّعْمَة دْيَالْ إِلَاهْنَا لْلْفْسَادْ، وْكَيْنَكْرُو السِّيّْدْ دْيَالْنَا الْوْحِيدْ، الرَّبّْ يَسُوعْ الْمَسِيحْ. هَادُو ݣَالْ عْلِيهُمْ الْكْتَابْ بْلِّي مْحْكُومْ عْلِيهُمْ مْنْ قْدِيمْ الزّْمَانْ.

⁵وَاخَّا كَتْعَرْفُو هَادْشِّي، بْغِيتْ نْفَكّْرْكُمْ بْلِّي الرَّبّْ مْنْ بَعْدْمَا نْجَّا الشَّعْبْ دْيَالُه مْنْ أَرْضْ مِصْرْ، هْلَكْ اللِّي مَا آمْنُوشْ بِيهْ.

⁶وْالْمَلَايْكَة اللِّي مَا تّْهَلَّاوْشْ فْالسُّلْطَة دْيَالْهُمْ وْسْمْحُو فْبْلَايْصْهُمْ، خْلَّاهُمْ الرَّبّْ مْرْبُوطِينْ دِيمَا بْالسّْنَاسْلْ فْالضّْلَامْ حْتَّى لْيُومْ الْحِسَابْ.

⁷وْحْتَّى سَدُومْ وْعَمُورَة وْالْمْدُونْ اللِّي مْجَاوْرِينْهُمْ، وْاللِّي دَارُو الْفْسَادْ بْنَفْسْ الطَّرِيقَة، وْتْبْعُو طْبِيعَة خْرَى، رَاهُمْ تْعَدّْبُو بْالنَّارْ الدَّايْمَة وْوْلَّاوْ مْتَالْ لْوْحْدِينْ خْرِينْ.

⁸وْرَاهْ هَادْشِّي اللِّي كَيْدِيرُو حْتَّى هَادْ النَّاسْ اللِّي كَيْتّْخَيّْلُو شِي حْوَايْجْ مَا كَايْنَاشْ، كَيْنَجّْسُو الدَّاتْ دْيَالْهُمْ، وْكَيْحْتَقْرُو سُلْطَةْ اللَّهْ، وْكَيْسَبُّو الْمَلَايْكَة دْ الْعَزّْ.

⁹وْرَاهْ مِيخَائِيلْ رَئِيسْ الْمَلَايْكَة مْلِّي تّْخَاصْمْ مْعَ إِبْلِيسْ وْتّْنَاقْشْ مْعَاهْ عْلَى الدَّاتْ دْيَالْ مُوسَى، مَا بْغَاشْ يْحْكَمْ عْلِيهْ وْيْݣُولْ فْحَقُّه كْلَامْ خَايْبْ وَلَكِنْ ݣَالْ لِيهْ: «الرَّبّْ غَيْعَاقْبْكْ!».

¹⁰وَلَكِنْ هَادْ النَّاسْ كَيْسَبُّو أَيّْ حَاجَة مَا عَارْفِينْهَاشْ، وْدَاكْشِّي اللِّي كَيْفَهْمُوهْ بْالطّْبِيعَة دْيَالْهُمْ اللِّي بْحَالْ وْحُوشْ الْغَابَة هُوَ بْنَفْسُه اللِّي كَيْتْسَبّْبْ لِيهُمْ فْالْهْلَاكْ.

¹¹يَا وِيلْ هَادْ النَّاسْ! عْلَاحْقَّاشْ تْبْعُو طْرِيقْ قَايِينْ، وْمْشَاوْ فْالْغَلَطْ بْحَالْ بَلْعَامْ عْلَى وْدّْ الْفْلُوسْ، وْتَارُو كِمَا تَارْ قُورَحْ وْتّْهَلْكُو.

¹²رَاهْ هَادُو خَطَرْ عْلِيكُمْ فْالْحَفَلَاتْ دْيَالْ الْمْحَبَّة، كَيْشَارْكُوكُمْ فِيهُمْ بْلَا حْشْمَة، وْكَيْعَمّْرُو كْرُوشْهُمْ. هُمَ بْحَالْ الْغْيَامْ بْلَا شْتَا وْدَافْعَاهْ الرِّيحْ. وْبْحَالْ شْجَرْ الْخْرِيفْ بْلَا غْلَّة، مْقَلّْعْ مْنْ جْدُورُه وْمْيّْتْ جُوجْ مْرَّاتْ.

¹³هُمَ بْحَالْ مَّاجْ الْبْحَرْ الْهَايْجَة اللِّي كَتْرْمِي الرّْغْوَة دْيَالْهَا، وْالنّْجُومْ الْمُّوضّْرَة اللِّي غَيْبْقَاوْ عْلَى الدّْوَامْ فْوَسْطْ الضّْلَامْ الْقْوِي.

¹⁴وْحْتَّى أَخْنُوخْ اللِّي هُوَ الْجِيلْ السَّابْعْ مْنْ آدَمْ تّْنَبّْأْ عْلِيهُمْ وْݣَالْ: «هَا هُوَ الرَّبّْ جَا مْعَ الْمَلَايِينْ دْ الْمْقَدّْسِينْ دْيَالُه!

¹⁵بَاشْ يْحْكَمْ عْلَى ݣَاعْ النَّاسْ، وْيْعَاقْبْ ݣَاعْ الْمْشْرَارِينْ عْلَى وْدّْ ݣَاعْ فْعَايْلْ الشَّرّْ اللِّي دَارُوهَا، وْعْلَى وْدّْ كُلّْ كْلْمَة دْ الْكُفْرْ ݣَالُوهَا فْحَقُّه هَادْ النَّاسْ الْمُدْنِبِينْ اللِّي مَا كَيْآمْنُوشْ».

¹⁶هَادُو كَيْݣَمْݣْمُو وْكَيْتّْشْكَّاوْ، وْكَيْتْبْعُو الشَّهْوَة دْيَالْهُمْ، وْكَيْهَضْرُو بْالْكِبْرْ، وْكَيْضَحْكُو فْوْجَهْ النَّاسْ عْلَى وْدّْ مْصْلَحْتْهُمْ.

¹⁷وَلَكِنْ نْتُمَ آ الْخُوتْ الْعْزَازْ، تْفَكّْرُو الْكْلَامْ اللِّي ݣَالُوهْ لِيكُمْ مْنْ قْبَلْ الرُّسُلْ دْيَالْ رَبّْنَا يَسُوعْ الْمَسِيحْ.

¹⁸مْلِّي ݣَالُو لِيكُمْ: «رَاهْ فْاللّْخْرْ دْيَالْ الزّْمَانْ غَادِي يْجِيوْ شِي وْحْدِينْ كَيْضَحْكُو عْلَى النَّاسْ وْتَابْعِينْ شَهْوَةْ الشَّرّْ دْيَالْهُمْ».

¹⁹هَادُو هُمَ اللِّي كَيْتّْسَبّْبُو فْالتَّفْرِقَة دْيَالْ النَّاسْ، وْالشَّهْوَة دْيَالْ الدَّاتْ دْيَالْهُمْ هِيَ اللِّي كَتّْحَكّْمْ فِيهُمْ، وْمَا فِيهُمْشْ رُوحْ اللَّهْ.

²⁰وَلَكِنْ نْتُمَ آ الْخُوتْ الْعْزَازْ، قْوِّيوْ حْيَاتْكُمْ فْإِيمَانْكُمْ الْمْقَدّْسْ، وْصَلِّيوْ فْالرُّوحْ الْقُدُسْ.

²¹تْبْتُو فْمْحَبَّةْ اللَّهْ، وْنْتُمَ كَتّْسْنَّاوْ رَحْمَةْ رَبّْنَا يَسُوعْ الْمَسِيحْ بَاشْ يْعْطِيكُمْ الْحَيَاةْ الدَّايْمَة.

²²وْحْنُّو عْلَى اللِّي كَيْشَكُّو.

²³وْعْتْقُو وْحْدِينْ خْرِينْ، وْبَعّْدُوهُمْ مْنْ الْعَافْيَة، وْحْنُّو عْلَى وْحْدِينْ خْرِينْ وْرَدُّو بَالْكُمْ مْنّْهُمْ، وْكْرْهُو حْتَّى اللّْبَاسْ اللِّي نَجّْسُوهْ بْدَاتْهُمْ.

²⁴وْلْلَّهْ اللِّي قَادْرْ يْحْضِيكُمْ بَاشْ مَا تْطِيحُوشْ، وْيْوَقَفّْكُمْ قُدَّامْ الْعَزّْ دْيَالُه بْلَا عِيبْ وْفْرْحَانِينْ.

²⁵لْلْإِلَاهْ الْوَاحْدْ، مُنَجِّينَا بْيَسُوعْ الْمَسِيحْ رَبّْنَا، يْكُونْ الْعَزّْ، وْالْجَلَالْ، وْالْقُوَّة، وْالسُّلْطَة، قْبَلْ مْنْ الزّْمَانْ وْدَابَا وْعْلَى الدّْوَامْ. آمِينْ.