Read Moroccan Standard Translation الرُّؤْيَا 11 Bible Online

الرُّؤْيَا 11 - Moroccan Standard Translation bible

الرُّؤْيَا 11

¹الْفَصْلْ حْضَاشْ وْمْنْ بَعْدْ تّْعْطَاتْنِي قْصْبَة دْ الْعْبَارْ كَتْشْبَهْ لْلعْصَا، وْتّْݣَالْ لِيَّ: «سِيرْ وْعْبَرْ بِيتْ اللَّهْ وْالْمَدْبَحْ، وْحْسَبْ هَادُوكْ اللِّي كَيْعَبْدُو فِيهْ.

²وْالْوْسْعَة دْيَالْ بِيتْ اللَّهْ اللِّي عْلَى بْرَّا خَلِّيهَا وْمَا تْعْبَرْهَاشْ، عْلَاحْقَّاشْ تّْعْطَاتْ لْلشّْعُوبْ اللِّي مَا كَيْآمْنُوشْ بْاللَّهْ، اللِّي غَيْخَرّْبُو الْمْدِينَة الْمْقَدّْسَة لْمُدَّةْ تْنِينْ وْرْبْعِينْ شْهَرْ.

³وْغَنْعْطِي السُّلْطَة لْجُوجْ دْ الشّْهُودْ دْيَاوْلِي، بَاشْ يْتّْنَبّْأُو لْمُدَّةْ أَلْفْ وْمْيَتَايْنْ وْسْتِّينْ يُومْ وْهُمَ لَابْسِينْ الْخِيشْ».

⁴وْهَادْ جُوجْ دْ الشّْهُودْ هُمَ جُوجْ دْ الشّْجْرَاتْ دْ الزِّيتُونْ وْجُوجْ دْ الْحَسْكَاتْ، وْهُمَ اللِّي وَاقْفِينْ قُدَّامْ رَبّْ الْأَرْضْ.

⁵وْإِلَا بْغَا شِي وَاحْدْ يْآدِيهُمْ، كَتْخْرَجْ الْعَافْيَة مْنْ فُمّْهُمْ وْكَتَاكُلْ عْدْيَانْهُمْ. وْإِلَا بْغَا شِي وَاحْدْ يْآدِيهُمْ، بْحَالْ هَكَّا خَاصُّه يْتّْهْلَكْ.

⁶وْهَادْ الشّْهُودْ عَنْدْهُمْ السُّلْطَة بَاشْ يْسَدُّو السّْمَا بَاشْ مَا تْطِيحْشْ الشّْتَا فْلِيَّامْ اللِّي غَيْتّْنَبّْأُو فِيهَا، وْعَنْدْهُمْ السُّلْطَة بَاشْ يْرَدُّو الْمَا دْمّْ، وْيْسَلّْطُو ݣَاعْ الْمْصَايْبْ عْلَى الْأَرْضْ وَقْتْمَا بْغَاوْ.

⁷وْمْلِّي غَيْكَمّْلُو الشّْهَادَة دْيَالْهُمْ، رَاهْ الْحَيَوَانْ اللِّي غَادِي يْطْلَعْ مْنْ الْهَاوِيَة غَيْتّْحَارْبْ مْعَاهُمْ وْغَيْغْلَبْهُمْ وْغَيْقْتَلْهُمْ.

⁸وْالدَّاتْ دْيَالْهُمْ غَتْبْقَى مْرْمِيَّة فْوَسْطْ الْمْدِينَة الْكْبِيرَة اللِّي كَيْشَبّْهُوهَا بْسَدُومْ وْمِصْرْ، وْاللِّي فِيهَا تّْصْلَبْ الْإِلَاهْ دْيَالْهُمْ.

⁹وْغَيْشُوفُو النَّاسْ مْنْ ݣَاعْ الشّْعُوبْ، وْالْقْبَايْلْ، وْاللُّغَاتْ، وْالْأُمَمْ، الدَّاتْ دْيَالْهُمْ لْمُدَّةْ تْلْتْ يَّامْ وْنَصّْ، وْمَا غَادِيشْ يْخَلِّيوْهُمْ يْتّْدْفْنُو.

¹⁰وْغَيْفَرْحُو سُكَّانْ الْأَرْضْ وْغَيْحْتَفْلُو، وْغَيْعْطِيوْ الْهْدِيَّاتْ لْبَعْضِيَّاتْهُمْ، عْلَاحْقَّاشْ هَادْ جُوجْ دْ الْأَنْبِيَا كَانُو كَيْعَدّْبُو سُكَّانْ الْأَرْضْ بْزَّافْ.

¹¹وْمْنْ بَعْدْ تْلْتْ يَّامْ وْنَصّْ، رْجْعَاتْ رُوحْ الْحَيَاةْ مْنْ عَنْدْ اللَّهْ لْهَادُوكْ الجُّوجْ اللِّي مَاتُو، وْوْقْفُو عْلَى رْجْلِيهُمْ، وْتّْخَلْعُو هَادُوكْ اللِّي كَانُو كَيْشُوفُو فِيهُمْ.

¹²وْسْمْعُو بْجُوجْ وَاحْدْ الصُّوتْ قْوِي مْنْ السّْمَا كَيْݣُولْ لِيهُمْ: «طْلْعُو لّْهْنَا». وْطْلْعُو لْلسّْمَا فْالسّْحَابْ وْعْدْيَانْهُمْ كَيْشُوفُو فِيهُمْ.

¹³وْفْدِيكْ السَّاعَة وْقَعْ وَاحْدْ الزّْلْزَالْ قْوِي، وْطَاحْ الْعُشُرْ دْيَالْ الْمْدِينَة، وْمَاتُو بْالزّْلْزَالْ سْبْعَالَافْ وَاحْدْ، وْاللِّي بْقَاوْ كَانُو خَايْفِينْ، وْعْطَاوْ الْعَزّْ لْإِلَاهْ السّْمَا.

¹⁴الْوِيلْ التَّانِي دَازْ، وْهَا الْوِيلْ التَّالْتْ قْرِيبْ يْجِي.

¹⁵وْنْفَخْ الْمَلَاكْ السَّابْعْ فْالْبُوقْ دْيَالُه، وْتّْسَمْعَاتْ صْوَاتْ قْوِيَّة فْالسّْمَا كَتْݣُولْ: «الْمَمْلَكَة دْيَالْ الدّْنْيَا وْلَّاتْ دْيَالْ رَبّْنَا وْالْمَسِيحْ دْيَالُه، وْغَيْمْلَكْ دِيمَا وْعْلَى الدّْوَامْ».

¹⁶وْالرّْبْعَة وْعْشْرِينْ شِيخْ مْسْؤُولْ، اللِّي كُلّْ وَاحْدْ فِيهُمْ ݣَالْسْ عْلَى الْعَرْشْ دْيَالُه قُدَّامْ اللَّهْ، تّْحْنَاوْ عْلَى وْجُوهْهُمْ وْسْجْدُو لْلَّهْ

¹⁷وْهُمَ كَيْݣُولُو: «كَنْشَكْرُوكْ آ الرَّبّْ الْإِلَاهْ الْقَادْرْ عْلَى كُلّْشِي اللِّي كَايْنْ وْاللِّي كَانْ، عْلَاحْقَّاشْ بَيّْنْتِي الْقُوَّة دْيَالْكْ الْكْبِيرَة، وْرْسِّيتِي الْمُلْكْ دْيَالْكْ.

¹⁸وْتّْقَلّْقُو الشّْعُوبْ اللِّي مَاشِي يْهُودْ، وْهُوَ يْنْزَلْ الْغَضَبْ دْيَالْكْ، وْجَا الْوَقْتْ اللِّي فِيهْ غَيْتّْحَاسْبُو الْمُوتَى، وْيْتّْجَازَاوْ عْبِيدْكْ الْأَنْبِيَا وْالْمْقَدّْسِينْ وْاللِّي كَيْحْتَرْمُو الْإِسْمْ دْيَالْكْ، الصّْغَارْ وْالْكْبَارْ، وْيْتّْهَلْكُو اللِّي كَيْخَرّْبُو الْأَرْضْ».

¹⁹وْتّْحَلّْ بِيتْ اللَّهْ اللِّي فْالسّْمَا، وْبَانْ فِيهْ تَابُوتْ الْعَهْدْ دْيَالُه، وْهُوَ يْوْقَعْ بَرْقْ وْصُوتْ وْرَعْدْ وْزْلْزَالْ وْتْبْرُورِي قْوِي.