Read Moroccan Standard Translation الرُّؤْيَا 12 Bible Online

الرُّؤْيَا 12 - Moroccan Standard Translation bible

الرُّؤْيَا 12

¹الْفَصْلْ طْنَاشْ وْبَانْتْ عَلَامَة كْبِيرَة فْالسّْمَا: وَاحْدْ الْمْرَاة لَابْسَة الشّْمْسْ، وْالْقَمَرْ تَحْتْ رْجْلِيهَا، وْعْلَى رَاسْهَا تَاجْ فِيهْ طْنَاشْرْ نْجْمَة،

²وْكَانْتْ حَامْلَة وْكَتْغَوّْتْ مْنْ قُوَّةْ الْوْجَعْ دْيَالْ الْوْلَادَة.

³وْبَانْتْ عَلَامَة خْرَى فْالسّْمَا: وَاحْدْ الْوَحْشْ كْبِيرْ، لُونُه حْمَرْ، وْعَنْدُه سْبْعَة دْ الرّْيُوسْ، وْعَشْرَة دْ الْݣْرُونْ، وْعْلَى كُلّْ رَاسْ تَاجْ،

⁴وْجْرّْ بْقَزِّيبْتُه التُّلُتْ دْيَالْ النّْجُومْ اللِّي فْالسّْمَا، وْلَاحْهُمْ لْلْأَرْضْ. وْوْقَفْ قُدَّامْ الْمْرَاة اللِّي كَانْتْ قْرِيبَة تْوْلَدْ بَاشْ يْفْرَسْ هَادِيكْ التّْرَبْيَة اللِّي غَتّْزَادْ.

⁵وْمْنْ بَعْدْ، وْلْدَاتْ الْمْرَاة وَلْدْ، هُوَ اللِّي غَيْحْكَمْ الشّْعُوبْ كُلّْهُمْ بْقْطِيبْ دْيَالْ الْحْدِيدْ، وْتّْخْطَفْ وَلْدْهَا لْعَنْدْ اللَّهْ وْلْلْعَرْشْ دْيَالُه.

⁶وْهَرْبَاتْ الْمْرَاة لْلصَّحْرَا، فِينْ وَجّْدْ لِيهَا اللَّهْ الْبْلَاصَة بَاشْ يْتّْهَلَّى فِيهَا لْمُدَّةْ أَلْفْ وْمْيَتَايْنْ وْسْتِّينْ يُومْ.

⁷وْنَاضْتْ وَاحْدْ الْحَرْبْ فْالسّْمَا بِينْ مِيخَائِيلْ وْالْمَلَايْكَة دْيَالُه مْعَ الْوَحْشْ وْالْمَلَايْكَة دْيَالُه،

⁸وَلَكِنْ الْوَحْشْ تّْغْلَبْ، وْمَا بْقَاتْشْ عَنْدْهُمْ مَازَالْ بْلَاصَة فْالسّْمَا.

⁹وْالْوَحْشْ الْكْبِيرْ اللِّي هُوَ اللّْفْعَى الْقْدِيمَة، اللِّي كَيْتّْسْمَّى إِبْلِيسْ وْالشِّيطَانْ، وْاللِّي كَيْخْدَعْ الدّْنْيَا كُلّْهَا، تّْرْمَى لْلْأَرْضْ، وْتّْرْمَاوْ مْعَاهْ الْمَلَايْكَة دْيَالُه.

¹⁰وْسْمَعْتْ وَاحْدْ الصُّوتْ قْوِي فْالسّْمَا كَيْݣُولْ: «هَادَا هُوَ وَقْتْ النّْجَا وْالْقُوَّة وْالْمُلْكْ دْيَالْ إِلَاهْنَا، وْالسُّلْطَة دْ الْمَسِيحْ دْيَالُه، عْلَاحْقَّاشْ تّْرْمَى لْلْأَرْضْ هَادَاكْ اللِّي كَانْ كَيْتَّهْمْ خُوتْنَا قُدَّامْ الْإِلَاهْ دْيَالْنَا لِيلْ وْنْهَارْ.

¹¹وْهُمَ غْلْبُوهْ بْدْمّْ الْخْرُوفْ وْبْالشّْهَادَة دْيَالْهُمْ، حِيتْ حْيَاتْهُمْ مَا عْزَّاتْشْ عْلِيهُمْ لْدَرَجْةْ كَانُو مُوجُودِينْ بَاشْ يْمُوتُو.

¹²عْلَى هَادْشِّي، فْرْحِي آ السَّمَاوَاتْ وْاللِّي سَاكْنِينْ فِيهَا. الْوِيلْ لِيكُمْ آ اللِّي سَاكْنِينْ فْالْأَرْضْ وْالْبْحَرْ، عْلَاحْقَّاشْ إِبْلِيسْ نْزَلْ لْعَنْدْكُمْ وْهُوَ غْضْبَانْ بْزَّافْ، وْعَارْفْ بْلِّي وَقْتُه قْصِيرْ».

¹³وْمْلِّي الْوَحْشْ شَافْ رَاسُه بْلِّي تّْرْمَى لْلْأَرْضْ، بْدَا كَيْتّْعَدَّى عْلَى الْمْرَاة اللِّي وْلْدَاتْ الْوَلْدْ.

¹⁴وَلَكِنْ تّْعْطَاوْ لْلْمْرَاة الجّْنَاوْحْ دْيَالْ النّْسَرْ الْكْبِيرْ بَاشْ تْطِيرْ لْلصَّحْرَا، لْلْبْلَاصَة الْمْوَجّْدَة لِيهَا فِينْ غَتْلْقَا التَّهَلُّو تْلْتْ سْنِينْ وْنَصّْ وْهِيَ بْعِيدَة عْلَى اللّْفْعَى.

¹⁵وْخَرّْجَاتْ اللّْفْعَى مْنْ فُمّْهَا الْمَا كَيْجْرِي بْحَالْ شِي وَادْ وْرَا الْمْرَاة بَاشْ يْجَرّْهَا.

¹⁶وَلَكِنْ عْتْقَاتْ الْأَرْضْ الْمْرَاة، وْحْلَّاتْ فُمّْهَا وْبْلْعَاتْ الْمَا كُلُّه دْيَالْ الْوَادْ اللِّي خَرّْجُه الْوَحْشْ مْنْ فُمُّه.

¹⁷وْهَاجْ الْوَحْشْ عْلَى الْمْرَاة، وْمْشَى يْتّْحَارْبْ مْعَ اللِّي بْقَاوْ مْنْ تْرِّيكْتْهَا، اللِّي كَيْدِيرُو بْوْصِيَّاتْ اللَّهْ وْكَيْشَهْدُو لْيَسُوعْ.

¹⁸وْوْقَفْ الْوَحْشْ عْلَى الرّْمْلَة فْجَنْبْ الْبْحَرْ.