Read Moroccan Standard Translation الرُّؤْيَا 14 Bible Online

الرُّؤْيَا 14 - Moroccan Standard Translation bible

الرُّؤْيَا 14

¹الْفَصْلْ رْبَعْطَاشْ وْمْنْ بَعْدْ، شْفْتْ وْهُوَ يْبَانْ لِيَّ وَاحْدْ الْخْرُوفْ وَاقْفْ فُوقْ جْبَلْ صِهْيَوْنْ، وْمْعَاهْ مْيَة وْرْبْعَة وْرْبْعِينْ أَلْفْ وَاحْدْ مْكْتُوبَة عْلَى جْبَاهِيهُمْ سْمِيّْةْ الْخْرُوفْ وْسْمِيّْةْ بَّاهْ.

²وْسْمَعْتْ وَاحْدْ الصُّوتْ جَايْ مْنْ السّْمَا بْحَالْ صُوتْ الْمَا دْيَالْ الشّْلَّالَاتْ، وْبْحَالْ الصُّوتْ دْ الرَّعْدْ الْقْوِي. وْالصُّوتْ اللِّي سْمَعْتُه كَيْشْبَهْ لْلنَّغْمَة دْيَالْ الْݣِيتَارْ مْلِّي كَيْضْرْبُو عْلِيهْ الْمُوسِيقِيِّينْ،

³وْكَانُو كَيْرَنّْمُو تَرْنِيمَة جْدِيدَة قُدَّامْ الْعَرْشْ وْقُدَّامْ الرّْبْعَة دْ الْمْخْلُوقَاتْ وْقُدَّامْ الشّْيُوخْ الْمْسْؤُولِينْ. وْحْتَّى وَاحْدْ مَا قْدَرْ يْتّْعَلّْمْ التَّرْنِيمَة مْنْ غِيرْ هَادُوكْ الْمْيَة وْرْبْعَة وْرْبْعِينْ أَلْفْ اللِّي تّْشْرَاوْ مْنْ الْأَرْضْ.

⁴هَادُو هُمَ اللِّي مَا فْسْدُوشْ مْعَ الْعْيَالَاتْ وْبْقَاوْ نْقِيِّينْ، وْهَادُو هُمَ اللِّي كَيْتْبْعُو الْخْرُوفْ فِينْ مَّا مْشَى. هَادُو رَاهُمْ مْشْرِيِّينْ مْنْ بِينْ النَّاسْ، وْتّْهْدَاوْ لْلَّهْ وْلْلْخْرُوفْ بْحَالْ الْغْلَّة اللّْوّْلَى.

⁵وْعَمّْرْ فُمّْهُمْ مَا نْطَقْ بْالْكْدُوبْ، وْمَا فِيهُمْ حْتَّى عِيبْ.

⁶وْمْنْ بَعْدْ، شْفْتْ مَلَاكْ آخُرْ كَيْطِيرْ فْالسّْمَا، جَايْبْ مْعَاهْ وَاحْدْ الْبْشَارَة دَايْمَة، بَاشْ يْخَبّْرْ بِيهَا اللِّي سَاكْنِينْ فْالْأَرْضْ مْنْ كُلّْ أُمَّة وْقْبِيلَة وْلُغَة وْشَعْبْ.

⁷وْكَانْ كَيْبَرّْحْ بْوَاحْدْ الصُّوتْ قْوِي وْكَيْݣُولْ: «خَافُو اللَّهْ وْعْطِيوْهْ الْعَزّْ، حِيتْ جَاتْ سَاعْةْ الْحْسَابْ دْيَالُه، إِيوَا سْجْدُو لْلِّي خْلَقْ السّْمَا وْالْأَرْضْ وْالْبْحَرْ وْالْعْيُونْ دْ الْمَا».

⁸وْتْبْعُه الْمَلَاكْ التَّانِي كَيْݣُولْ: «تْخَرّْبَاتْ! تْخَرّْبَاتْ بَابِلْ الْكْبِيرَة اللِّي سْقَاتْ الشّْعُوبْ كُلّْهُمْ مْنْ خْمَرْ الْغَضَبْ دْ الْفْسَادْ دْيَالْهَا!».

⁹وْتْبَعْهُمْ الْمَلَاكْ التَّالْتْ كَيْݣُولْ بْوَاحْدْ الصُّوتْ قْوِي: «اللِّي سْجَدْ لْهَادَاكْ الْحَيَوَانْ وْلْلصَّنَمْ دْيَالُه، وْقْبَلْ الْعَلَامَة دْيَالُه عْلَى جْبَهْتُه وْلَا عْلَى يْدُّه،

¹⁰رَاهْ حْتَّى هُوَ غَيْشْرَبْ مْنْ خْمَرْ الْغَضَبْ دْ اللَّهْ اللِّي تّْخْوَى فْالْكَاسْ دْ الْغَضَبْ دْيَالُه بْلَا مَا يْتّْخَلّْطْ، وْغَيْتّْعَدّْبْ بْالْعَافْيَة وْالْكْبْرِيتْ قُدَّامْ الْمَلَايْكَة الْمْقَدّْسِينْ وْقُدَّامْ الْخْرُوفْ.

¹¹وْغَيْطْلَعْ دْخَّانْ عْدَابْهُمْ دِيمَا وْعْلَى الدّْوَامْ، وْمَا غَتْكُونْشْ الرَّاحَة لَا لِيلْ وَلَا نْهَارْ عَنْدْ هَادُوكْ اللِّي كَيْسَجْدُو لْلْحَيَوَانْ وْلْلصَّنَمْ دْيَالُه، وْاللِّي قْبْلُو الْعَلَامَة دْيَالْ سْمِيتُه».

¹²وْهْنَا فِينْ كَيْبَانْ الصّْبَرْ دْيَالْ الْمْقَدّْسِينْ اللِّي كَيْدِيرُو بْوْصِيَّاتْ اللَّهْ، وْاللِّي تَابْتِينْ فْإِيمَانْهُمْ بْيَسُوعْ.

¹³وْمْنْ بَعْدْ، سْمَعْتْ وَاحْدْ الصُّوتْ مْنْ السّْمَا كَيْݣُولْ: «كْتَبْ: سْعْدَاتْ هَادُوكْ اللِّي مْنْ دَابَا كَيْمُوتُو وْهُمَ مْآمْنِينْ بْالرَّبّْ». «إِيِّهْ» كَيْݣُولْ رُوحْ اللَّهْ: «غَيْرْتَاحُو مْنْ تَمَارَة دْيَالْهُمْ، حِيتْ أَعْمَالْهُمْ كَيْتْبْعُوهُمْ».

¹⁴وْمْنْ بَعْدْ، شْفْتْ وْبَانْتْ لِيَّ وَاحْدْ السّْحَابَة بِيضَا، وْعْلَى السّْحَابَة ݣَالْسْ شِي وَاحْدْ كَيْشْبَهْ لْوَلْدْ الْإِنْسَانْ، عْلَى رَاسُه تَاجْ دْيَالْ الدّْهَبْ وْفْيْدُّه مْنْجَلْ مَاضِي.

¹⁵وْخْرَجْ مْنْ بِيتْ اللَّهْ مَلَاكْ آخُرْ، كَيْغَوّْتْ بْصُوتْ عَالِي وْكَيْݣُولْ لْهَادَاكْ اللِّي ݣَالْسْ عْلَى السّْحَابَة: «خُدْ الْمْنْجَلْ دْيَالْكْ وْحْصَدْ، عْلَاحْقَّاشْ وَقْتْ الْحْصَادْ وْصَلْ، حِيتْ حْصَادْ الْأَرْضْ وْجَدْ».

¹⁶وْدَوّْزْ هَادَاكْ اللِّي ݣَالْسْ عْلَى السّْحَابَة الْمْنْجَلْ دْيَالُه عْلَى الْأَرْضْ، وْتّْحْصْدَاتْ الْأَرْضْ،

¹⁷وْخْرَجْ مَلَاكْ آخُرْ مْنْ بِيتْ اللَّهْ اللِّي فْالسّْمَا، وْحْتَّى هُوَ عَنْدُه مْنْجَلْ مَاضِي.

¹⁸وْخْرَجْ مَلَاكْ آخُرْ مْنْ الْمَدْبَحْ عَنْدُه السُّلْطَة عْلَى الْعَافْيَة، وْغَوّْتْ بْصُوتْ عَالِي وْݣَالْ لْهَادَاكْ اللِّي هَازّْ الْمْنْجَلْ الْمَاضِي: «خُدْ الْمْنْجَلْ دْيَالْكْ الْمَاضِي وْقَطّْعْ عْنَاقْدْ الدَّالْيَاتْ دْيَالْ الْأَرْضْ، عْلَاحْقَّاشْ الْعْنَبْ دْيَالْهُمْ طَابْ».

¹⁹وْدَوّْزْ الْمَلَاكْ الْمْنْجَلْ دْيَالُه عْلَى الْأَرْضْ، وْقَطّْعْ عْنَاقْدْ الدَّالْيَاتْ دْيَالْ الْأَرْضْ وْرْمَاهُمْ فْالْمْعَصْرَة الْكْبِيرَة دْيَالْ غَضَبْ اللَّهْ.

²⁰وْتّْعْفَسْ عْلَى الْعْنَبْ فْالْمْعَصْرَة عْلَى بْرَّا دْ الْمْدِينَة، وْخْرَجْ الدّْمْ مْنْ الْمْعَصْرَة وْوْصَلْ لْفُمّْ الْخِيلْ، تْقْرِيبًا عْلَى تْلْتْ مْيَةْ كِيلُومِتْرْ.