Read Moroccan Standard Translation الرُّؤْيَا 15 Bible Online

الرُّؤْيَا 15 - Moroccan Standard Translation bible

الرُّؤْيَا 15

¹الْفَصْلْ خْمْسْطَاشْ وْمْنْ بَعْدْ، شْفْتْ فْالسّْمَا عَلَامَة خْرَى كْبِيرَة وْعْجِيبَة: سْبْعَة دْ الْمَلَايْكَة هَازِّينْ سْبْعَة دْ الْمْصَايْبْ اللّْخْرِينْ، عْلَاحْقَّاشْ بِيهُمْ كْمَلْ غَضَبْ اللَّهْ.

²وْشْفْتْ شِي حَاجَة كَتْشْبَهْ لْلْبْحَرْ دْيَالْ الجَّاجْ مْخَلّْطْ بْالْعَافْيَة، وْهَادُوكْ اللِّي غْلْبُو الْحَيَوَانْ وْالصَّنَمْ دْيَالُه وْالْأَرْقَامْ اللِّي كَيْبَيّْنُو سْمِيتُه، وَاقْفِينْ عْلَى هَادْ الْبْحَرْ وْهَازِّينْ مْعَاهُمْ الْݣِيتَارَاتْ اللِّي عْطَاهُمْ اللَّهْ،

³كَيْغَنِّيوْ تَرْنِيمَةْ مُوسَى الْعَبْدْ دْيَالْ اللَّهْ، وْتَرْنِيمَةْ الْخْرُوفْ وْكَيْݣُولُو: «يَا رَبّْ، الْإِلَاهْ الْقَادْرْ عْلَى كُلّْشِي، رَاهْ أَعْمَالْكْ كْبِيرَة وْعْجِيبَة! وْطْرْقَانْكْ عَادْلَة وْحَقّْ آ مَلِكْ الشّْعُوبْ!

⁴شْكُونْ اللِّي مَا كَيْخَافْكْشْ آ رْبِّي وْمَا كَيْعْطِيشْ الْعَزّْ لْإِسْمْكْ؟ حِيتْ نْتَ بُوحْدْكْ اللِّي قُدُّوسْ، وْالشّْعُوبْ كُلّْهُمْ غَيْجِيوْ وْغَيْسَجْدُو قُدَّامْكْ، عْلَاحْقَّاشْ أَعْمَالْكْ اللِّي هِيَ حَقّْ بَانْتْ».

⁵وْمْنْ بَعْدْ هَادْشِّي شْفْتْ، وْهُوَ يْبَانْ لِيَّ بْلِّي بِيتْ اللَّهْ دْيَالْ خِيمْةْ الشّْهَادَة اللِّي فْالسّْمَا تّْحَلّْ،

⁶وْمْنُّه خَرْجُو الْمَلَايْكَة السّْبْعَة اللِّي عَنْدْهُمْ الْمْصَايْبْ السّْبْعَة، لَابْسِينْ كْتَّانْ نْقِي كَيْلْمَعْ، وْمْحَزّْمِينْ صْدَرْهُمْ بْحْزَامْ دْيَالْ الدّْهَبْ،

⁷وْوَاحْدْ مْنْ هَادُوكْ الْمْخْلُوقَاتْ الرّْبْعَة، عْطَى لْلْمَلَايْكَة السّْبْعَة سْبْعَة دْ الْكِيسَانْ دْيَالْ الدّْهَبْ، عَامْرِينْ بْغَضَبْ اللَّهْ الْحَيّْ دِيمَا وْعْلَى الدّْوَامْ.

⁸وْعْمَرْ بِيتْ اللَّهْ بْالدّْخَّانْ بْسْبَابْ الْعَزّْ وْالْقُوَّة دْيَالُه، وْحْتَّى وَاحْدْ مَا قْدَرْ يْدْخَلْ لْبِيتْ اللَّهْ، حْتَّى كْمْلُو الْمْصَايْبْ السّْبْعَة اللِّي جَايْبِينْهُمْ الْمَلَايْكَة السّْبْعَة.