Read Moroccan Standard Translation الرُّؤْيَا 16 Bible Online

الرُّؤْيَا 16 - Moroccan Standard Translation bible

الرُّؤْيَا 16

¹الْفَصْلْ سْطَّاشْ وْمْنْ بَعْدْ، سْمَعْتْ وَاحْدْ الصُّوتْ قْوِي مْنْ بِيتْ اللَّهْ كَيْݣُولْ لْلْمَلَايْكَة السّْبْعَة: «سِيرُو وْكْبُّو عْلَى الْأَرْضْ الْكِيسَانْ السّْبْعَة دْيَالْ غَضَبْ اللَّهْ».

²وْمْشَى الْمَلَاكْ اللّْوّْلْ وْكْبّْ كَاسُه عْلَى الْأَرْضْ، وْبَانْ حْبُوبْ خَايْبْ وْكَيْحْرَقْ فْالنَّاسْ اللِّي عَنْدْهُمْ الْعَلَامَة دْ الْحَيَوَانْ وْاللِّي كَيْسَجْدُو لْلصَّنَمْ دْيَالُه.

³وْكْبّْ الْمَلَاكْ التَّانِي كَاسُه عْلَى الْبْحَرْ، وْهُوَ يْوَلِّي دْمّْ بْحَالْ دْمّْ الْمْيّْتْ، وْمَاتْ كُلّْ مْخْلُوقْ حَيّْ فْالْبْحَرْ.

⁴وْكْبّْ الْمَلَاكْ التَّالْتْ كَاسُه عْلَى الْوِيدَانْ وْعْلَى الْعْيُونْ دْ الْمَا، وْهُمَ يْوَلِّيوْ دْمّْ.

⁵وْسْمَعْتْ مَلَاكْ الْمَا كَيْݣُولْ: «نْتَ عَادْلْ فْحْكَامْكْ آ الْقُدُّوسْ اللِّي كَايْنْ وْاللِّي كَانْ، عْلَاحْقَّاشْ هَكَّا حْكَمْتِي.

⁶هُمَ سْيّْلُو دْمّْ الْمْقَدّْسِينْ وْالْأَنْبِيَا، وْنْتَ عْطِيتِيهُمْ الدّْمْ بَاشْ يْشَرْبُوهْ، رَاهْ هَادْشِّي اللِّي كَيْسْتَاهْلُو!».

⁷وْسْمَعْتْ وَاحْدْ الصُّوتْ جَايْ مْنْ الْمَدْبَحْ كَيْݣُولْ: «بْالصَّحْ، آ الرَّبّْ الْإِلَاهْ الْقَادْرْ عْلَى كُلّْشِي! رَاهْ حْكَامْكْ عَادْلَة وْحَقّْ».

⁸وْكْبّْ الْمَلَاكْ الرَّابْعْ كَاسُه عْلَى الشّْمْسْ، وْهُوَ يْتّْعْطَى لِيهَا بَاشْ تْحْرَقْ النَّاسْ بْالْعَافْيَة.

⁹وْتّْحَرْقُو النَّاسْ مْنْ كْتْرَةْ السّْخُونِيَّة دْ الْعَافْيَة، وْݣَالُو كْلَامْ الْكُفْرْ عْلَى إِسْمْ اللَّهْ اللِّي عَنْدُه السُّلْطَة عْلَى هَادْ الْمْصَايْبْ، وْمَا تَابُوشْ بَاشْ يْعْطِيوْهْ الْعَزّْ.

¹⁰وْكْبّْ الْمَلَاكْ الْخَامْسْ كَاسُه عْلَى عَرْشْ الْحَيَوَانْ، وْهِيَ تْضْلَامْ الْمَمْلَكَة دْيَالُه. وْعَضُّو النَّاسْ لْسَانْهُمْ مْنْ كْتْرَةْ الْوْجَعْ،

¹¹وْݣَالُو كْلَامْ الْكُفْرْ عْلَى إِلَاهْ السّْمَا بْسْبَابْ الْوْجَعْ وْالْحْبُوبْ اللِّي فِيهُمْ، وْمَا تَابُوشْ مْنْ أَعْمَالْهُمْ.

¹²وْكْبّْ الْمَلَاكْ السَّادْسْ كَاسُه عْلَى وَادْ الْفُرَاتْ الْكْبِيرْ، وْهُوَ يْنْشَفْ مْنْ الْمَا دْيَالُه، بَاشْ يْوَلِّي طْرِيقْ لْلْمُلُوكْ اللِّي جَايِّينْ مْنْ الشَّرْقْ.

¹³وْشْفْتْ تْلَاتَة دْ الْأَرْوَاحْ مْنْجُوسِينْ كَيْشَبْهُو لْلجّْرَانْ، خَارْجِينْ مْنْ فُمّْ الْوَحْشْ وْمْنْ فُمّْ الْحَيَوَانْ وْمْنْ فُمّْ النّْبِي الْكْدَّابْ،

¹⁴حِيتْ هُمَ أَرْوَاحْ شَيَاطِينْ اللِّي كَيْدِيرُو الْعَلَامَاتْ، وْاللِّي كَيْمْشِيوْ عَنْدْ مُلُوكْ الدّْنْيَا كُلّْهَا بَاشْ يْجَمْعُوهُمْ لْلْحَرْبْ لْلنّْهَارْ الْكْبِيرْ دْيَالْ اللَّهْ الْقَادْرْ عْلَى كُلّْشِي.

¹⁵وْݣَالْ الرَّبّْ: «هَانِي جَايْ بْحَالْ شِي شْفَّارْ! سْعْدَاتْ اللِّي كَيْسْهَرْ وْكَيْحْضِي حْوَايْجُه بَاشْ مَا يْمْشِيشْ عْرْيَانْ وْيْتّْحَشّْمْ قُدَّامْ النَّاسْ».

¹⁶وْالْأَرْوَاحْ دْيَالْ الشَّيَاطِينْ جْمْعُو الْمُلُوكْ فْالْبْلَاصَة اللِّي سْمِيتْهَا بْالْعِبْرِيَّة «هَرْمَجِدُّونْ».

¹⁷وْكْبّْ الْمَلَاكْ السَّابْعْ كَاسُه فْالْهْوَا، وْهُوَ يْتّْسْمَعْ وَاحْدْ الصُّوتْ قْوِي جَايْ مْنْ الْعَرْشْ اللِّي فْبِيتْ اللَّهْ كَيْݣُولْ: «رَاهْ كُلّْشِي كْمَلْ!».

¹⁸وْكَانْ الْبَرْقْ وْالصُّوتْ وْالرَّعْدْ. وْضْرَبْ زْلْزَالْ قْوِي، عَمّْرْ الْأَرْضْ مَا عَرْفَاتْ بْحَالُه مْنْ النّْهَارْ اللِّي وْلَّى فِيهْ بْنَادْمْ فْالْأَرْضْ.

¹⁹وْتّْقَسْمَاتْ الْمْدِينَة الْكْبِيرَة عْلَى تْلَاتَة، وْطَاحُو مْدُونْ الشّْعُوبْ، وْتّْفَكّْرْ اللَّهْ بَابِلْ الْمْدِينَة الْكْبِيرَة بَاشْ يْشَرّْبْهَا الْكَاسْ اللِّي كَيْغْلِي بْالْخْمَرْ دْ الْغَضَبْ دْيَالُه.

²⁰وْݣَاعْ الْجَزِيرَاتْ هَرْبُو، وْالجّْبَالْ غْبْرُو،

²¹وْطَاحْ تْبْرُورِي تْقِيلْ بْزَّافْ مْنْ السّْمَا عْلَى النَّاسْ. وْݣَالُو كْلَامْ الْكُفْرْ عْلَى اللَّهْ بْسْبَابْ هَادْ الْمُصِيبَة دْيَالْ التّْبْرُورِي، عْلَاحْقَّاشْ كَانْتْ صْعِيبَة بْزَّافْ.