Read Moroccan Standard Translation الرُّؤْيَا 18 Bible Online

الرُّؤْيَا 18 - Moroccan Standard Translation bible

الرُّؤْيَا 18

¹الْفَصْلْ تْمَنْطَاشْ وْمْنْ بَعْدْ هَادْشِّي، شْفْتْ وَاحْدْ الْمَلَاكْ آخُرْ نَازْلْ مْنْ السّْمَا، عَنْدُه سُلْطَة كْبِيرَة، وْالْعَزّْ دْيَالُه ضْوَّى الْأَرْضْ.

²وْهُوَ يْغَوّْتْ عْلَى حَرّْ جْهْدُه وْݣَالْ: «تْخَرّْبَاتْ، تْخَرّْبَاتْ بَابِلْ الْكْبِيرَة! وْوْلَّاتْ مْسْكُونَة بْالشَّيَاطِينْ وْبْݣَاعْ الْأَرْوَاحْ الْمْنْجُوسِينْ، وْبْݣَاعْ نْوَاعْ الطّْيُورْ الْمْنْجُوسِينْ وْالْمْكْرُوهِينْ،

³عْلَاحْقَّاشْ الشّْعُوبْ كُلّْهُمْ شَرْبُو مْنْ خْمَرْ فْسَادْهَا، وْمُلُوكْ الْأَرْضْ فْسْدُو مْعَاهَا، وْتُجَّارْ الدّْنْيَا تّْغْنَاوْ مْنْ كْتْرَةْ الْخِيرْ دْيَالْهَا».

⁴وْسْمَعْتْ وَاحْدْ الصُّوتْ آخُرْ مْنْ السّْمَا كَيْݣُولْ: «خَرْجُو آ الشَّعْبْ دْيَالِي مْنّْهَا، بَاشْ مَا تْشَارْكُوشْ فْدْنُوبْهَا، وْمَا يْضْرْبُوكُمْشْ مْصَايْبْهَا.

⁵عْلَاحْقَّاشْ دْنُوبْهَا تْعَرّْمُو حْتَّى وْصْلُو لْلسّْمَا، وْاللَّهْ مَا نْسَاشْ الْإِتْمْ دْيَالْهَا،

⁶دِيرُو مْعَاهَا كِمَا دَارْتْ هِيَ، وْرْدُّو لِيهَا جُوجْ دْ الْمَرَّاتْ دَاكْشِّي اللِّي دَارْتْ، خَلّْطُو لِيهَا جُوجْ دْ الْمَرَّاتْ فْالْكَاسْ اللِّي خَلّْطَاتْ فِيهْ.

⁷عْلَى قْدّْ مَا تّْمْتّْعَاتْ وْعْطَاتْ الْعَزّْ لْرَاسْهَا، عَدّْبُوهَا وْرَدُّوهَا حْزِينَة. عْلَاحْقَّاشْ كَتْݣُولْ فْخَاطْرْهَا: أَنَا ݣَالْسَة هْنَا بْحَالْ شِي مَلِكَة، وْأَنَا مَاشِي هْجَّالَة وْعَمّْرْنِي مَا غَنْكُونْ حْزِينَة.

⁸دَاكْشِّي عْلَاشْ غَيْنَزْلُو عْلِيهَا فْنْهَارْ وَاحْدْ هَادْ الْمْصَايْبْ: الطَّاعُونْ، وْالْحُزْنْ، وْالجُّوعْ، وْبْالْعَافْيَة غَتّْحْرَقْ، عْلَاحْقَّاشْ اللِّي حْكَمْ عْلِيهَا هُوَ الرَّبّْ الْإِلَاهْ الْقْوِي.

⁹وْغَيْبْكِيوْ وْيْنْوّْحُو عْلِيهَا مُلُوكْ الْأَرْضْ اللِّي فْسْدُو وْتّْمَتّْعُو مْعَاهَا، مْلِّي غَيْشُوفُو الدّْخَّانْ دْيَالْهَا وْهِيَ كَتّْحْرَقْ،

¹⁰وْغَيْوَقْفُو مْنْ بْعِيدْ، عْلَاحْقَّاشْ غَيْكُونُو خَايْفِينْ مْنْ عْدَابْهَا وْغَيْݣُولُو: يَا وِيلْكْ! يَا وِيلْكْ! آ مْدِينَة بَابِلْ الْكْبِيرَة! آ الْمْدِينَة الْقْوِيَّة! حِيتْ غِيرْ فْسَاعَة وَحْدَة نْزَلْ عْلِيكْ الْعِقَابْ.

¹¹وْغَيْبْكِيوْ وْيْنْوّْحُو عْلِيهَا تُجَّارْ الدّْنْيَا، عْلَاحْقَّاشْ حْتَّى وَاحْدْ مَا بْقَى كَيْشْرِي سْلَعْتْهُمْ.

¹²هَادْ السّْلْعَة فِيهَا الدّْهَبْ وْالْفْضَّة وْالْعْقِيقْ الْغَالِي وْاللُّؤْلُؤْ، وْالْكْتَّانْ وْالتُّوبْ الْمْدَادِي وْالْحْرِيرْ وْالتُّوبْ الْحْمَرْ، وْالْعُودْ الْحُرّْ، وْالْمَّاعْنْ دْ الْعَاجْ وْالْمَّاعْنْ دْ الْخْشَبْ الْغَالِي، وْالنّْحَاسْ وْالْحْدِيدْ وْالرّْخَامْ،

¹³وْالْقَرْفَة وْالْعَطْرِيَة، وْالرِّيحَة وْالْمُرّْ وْبْخُورْ اللُّبَانْ، وْالْخْمَرْ وْالزِّيتْ، وْالدّْݣِيݣْ وْالْݣْمْحْ، وْالْبْهَايْمْ وْالْغْنَمْ، وْالْخِيلْ وْالْكْرَارْسْ، وْالْعْبِيدْ وْالْمْشْدُودِينْ فْالْحَرْبْ.

¹⁴وْالتُّجَارْ غَيْݣُولُو لِيهَا: الْغْلَّة اللِّي كَيْتّْشْهَّاهَا خَاطْرْكْ مَا بْقَاتْشْ عَنْدْكْ، وْمْشَاتْ لِيكْ الرَّفَاهِيَّة وْالْعَزّْ اللِّي كْنْتِ عَايْشَة فِيهُمْ، وْهَادْشِّي عَمّْرَكْ مَا غَتْلْقَايْهْ!

¹⁵التُّجَّارْ اللِّي تّْغْنَاوْ مْنْ الْبِيعْ وْالشّْرَا دْيَالْ هَادْ السّْلْعَة، غَيْوَقْفُو مْنْ بْعِيدْ، حِيتْ خَايْفِينْ مْنْ عْدَابْهَا، وْغَيْبْكِيوْ وْيْنْوّْحُو.

¹⁶وْغَيْݣُولُو: يَا وِيلْكْ! يَا وِيلْكْ! آ هَادْ الْمْدِينَة الْكْبِيرَة! اللِّي كَانْتْ لَابْسَة الْكْتَّانْ وْالتُّوبْ الْمْدَادِي وْالْحْمَرْ، وْمْتّْزَيّْنَة بْالدّْهَبْ وْالْعْقِيقْ الْغَالِي وْاللُّؤْلُؤْ!

¹⁷وْغِيرْ فْسَاعَة وَحْدَة ضَاعْ ݣَاعْ هَادْ الْخِيرْ. وْݣَاعْ الرِّيَّاسْ دْيَالْ السّْفِينَاتْ وْالنَّاسْ اللِّي كَيْسَافْرُو فْالْبْحَرْ وْالْبْحَّارَة، وْاللِّي كَيْتّْرَزّْقُو مْنْ الْبْحَرْ، وْقْفُو مْنْ بْعِيدْ،

¹⁸وْمْلِّي شَافُوهَا كَتّْحْرَقْ وْدْخَّانْهَا طَالْعْ، غَوّْتُو وْݣَالُو: آشْ مْنْ مْدِينَة كَانْتْ بْحَالْ هَادْ الْمْدِينَة الْكْبِيرَة؟

¹⁹وْرْمَاوْ التّْرَابْ عْلَى رَاسْهُمْ وْبْدَاوْ كَيْبْكِيوْ بْالْغْوَاتْ وْكَيْنْوّْحُو وْهُمَ كَيْݣُولُو: يَا وِيلْكْ! يَا وِيلْكْ! آ الْمْدِينَة الْكْبِيرَة! اللِّي مْنْ خِيرْهَا تّْغْنَاوْ ݣَاعْ صْحَابْ السّْفِينَاتْ دْ الْبْحَرْ! وْفْسَاعَة وَحْدَة تّْخَرّْبَاتْ!

²⁰فْرْحِي لِيهَا آ السّْمَا! فْرْحُو آ الْمْقَدّْسِينْ وْالرُّسُلْ وْالْأَنْبِيَا، عْلَاحْقَّاشْ اللَّهْ عَاقْبْهَا عْلَى دَاكْشِّي اللِّي دَارْتْ لِيكُمْ».

²¹وْخْدَا وَاحْدْ الْمَلَاكْ قْوِي حَجْرَة بْحَالْ شِي رْحَى كْبِيرَة، وْرْمَاهَا فْالْبْحَرْ وْݣَالْ: «هَكَّا غَتّْرْمَى بَابِلْ الْمْدِينَة الْكْبِيرَة بْقُوَّة وْمَا غَيْبْقَاشْ لِيهَا لَاتَرْ.

²²وْمَا غَتْبْقَاشْ تّْسْمَعْ فِيكْ الْمُوسِيقَى دْيَالْ اللِّي كَيْعَزْفُو الْݣِيتَارْ وْاللِّي كَيْغَنِّيوْ وْاللِّي كَيْنَفْخُو فْاللِّيرَة وْالْبُوقْ، وْمَا غَيْبْقَى فِيكْ حْتَّى شِي صْنَايْعِي كِمَا كَانْتْ صْنَعْتُه، وْمَا غَيْبْقَاشْ يْتّْسْمَعْ فِيكْ مَازَالْ صُوتْ الرّْحَى.

²³وْمَا غَيْبْقَاشْ ضَوّْ الْقْنْدِيلْ يْضَوِّي فِيكْ، وَلَا غَيْتّْسْمَعْ فِيكْ صُوتْ شِي عْرِيسْ وْعْرُوسَة، عْلَاحْقَّاشْ التُّجَّارْ دْيَالْكْ كَانُو هُمَ الْكْبَارْ فْالدّْنْيَا، وْبْالسّْحُورْ دْيَالْكْ تّْخَدْعُو ݣَاعْ الشّْعُوبْ،

²⁴وْفِيكْ تّْلْقَا دْمّْ الْأَنْبِيَا وْدْمّْ الْمْقَدّْسِينْ وْݣَاعْ هَادُوكْ اللِّي تّْقْتْلُو فْالْأَرْضْ».