Read Moroccan Standard Translation الرُّؤْيَا 19 Bible Online

الرُّؤْيَا 19 - Moroccan Standard Translation bible

الرُّؤْيَا 19

¹الْفَصْلْ تْسَعْطَاشْ وْمْنْ بَعْدْ هَادْشِّي، سْمَعْتْ وَاحْدْ الصُّوتْ قْوِي بْحَالْ صُوتْ شِي جْمَاعَة كْبِيرَة فْالسّْمَا كَيْݣُولْ: «هَلِّلُويَا! رَاهْ النّْجَا وْالْعَزّْ وْالْقُوَّة دْيَاوْلْ إِلَاهْنَا،

²حِيتْ حْكَامُه عَادْلَة وْعْلَى حَقّْ، عْلَاحْقَّاشْ حْكَمْ عْلَى الْفَاسْدَة الْكْبِيرَة اللِّي وْسّْخَاتْ الْأَرْضْ بْفْسَادْهَا، وْنْتَقْمْ مْنّْهَا حِيتْ قْتْلَاتْ عْبِيدُه».

³وْݣَالُو عَاوْتَانِي: «هَلِّلُويَا! رَاهْ الدّْخَّانْ دْيَالْهَا غَيْبْقَى طَالْعْ دِيمَا وْعْلَى الدّْوَامْ».

⁴وْرْكْعُو الرّْبْعَة وْعْشْرِينْ شِيخْ مْسْؤُولْ، هُمَ وْالرّْبْعَة دْ الْمْخْلُوقَاتْ، وْسْجْدُو لْلَّهْ اللِّي ݣَالْسْ عْلَى الْعَرْشْ، وْݣَالُو: «آمِينْ! هَلِّلُويَا!».

⁵وْخْرَجْ مْنْ الْعَرْشْ وَاحْدْ الصُّوتْ كَيْݣُولْ: «سَبّْحُو لْإِلَاهْنَا آ ݣَاعْ الْعْبِيدْ دْيَالُه، وْاللِّي كَيْخَافُوهْ، صْغَارْ وْكْبَارْ».

⁶وْسْمَعْتْ بْحَالْ شِي صُوتْ دْيَالْ وَاحْدْ الجّْمَاعَة كْبِيرَة، وْبْحَالْ صُوتْ الْمَا دْيَالْ الشّْلَّالَاتْ، وْبْحَالْ صُوتْ الرَّعْدْ الْقْوِي كَيْݣُولْ: «هَلِّلُويَا! عْلَاحْقَّاشْ الرَّبّْ إِلَاهْنَا الْقَادْرْ عْلَى كُلّْشِي هُوَ الْمَلِكْ.

⁷يَالَّاهْ نْفَرْحُو وْنْسَعْدُو وْنْعْطِيوْهْ الْعَزّْ! عْلَاحْقَّاشْ جَا وَقْتْ الْعَرْسْ دْيَالْ الْخْرُوفْ، وْالْعْرُوسَة دْيَالُه وَجّْدَاتْ رَاسْهَا.

⁸وْتّْعْطَى لِيهَا تْلْبَسْ كْتَّانْ نْقِي وْكَيْلْمَعْ، وْهَادْ الْكْتَّانْ هُوَ الْأَعْمَالْ الْمْزْيَانَة دْيَالْ الْمْقَدّْسِينْ».

⁹وْݣَالْ لِيَّ وَاحْدْ الْمَلَاكْ: «كْتَبْ: سْعْدَاتْ اللِّي مْعْرُوضِينْ لْلْعْشَا دْيَالْ عَرْسْ الْخْرُوفْ!» وْعَاوْدْ ݣَالْ لِيَّ: «هَادَا هُوَ كْلَامْ الْحَقّْ دْيَالْ اللَّهْ».

¹⁰وْطْحْتْ عَنْدْ رْجْلِيهْ بَاشْ نْسْجَدْ لِيهْ، وْݣَالْ لِيَّ: «لَّا! مَا تْدِيرْشْ هَادْشِّي! رَانِي غِيرْ عَبْدْ بْحَالْكْ وْبْحَالْ خُوتْكْ اللِّي عَنْدْهُمْ الشّْهَادَة دْيَالْ يَسُوعْ. رَاهْ لْلَّهْ لَمّْنْ خَاصّْكْ تْسْجَدْ! حِيتْ الشّْهَادَة دْيَالْ يَسُوعْ هِيَ الرُّوحْ دْيَالْ النُّبُوَّة».

¹¹وْمْنْ بَعْدْ، شْفْتْ السّْمَا مْحْلُولَة، وْهُوَ يْبَانْ لِيَّ فِيهَا عَوْدْ بْيَضْ رَاكْبْ عْلِيهْ وَاحْدْ سْمِيتُه الْأَمِينْ وْالصَّادْقْ، كَيْحْكَمْ وْكَيْتّْحَارْبْ بْالْعَدْلْ.

¹²عِينِيهْ بْحَالْ الشّْعَالَة دْ الْعَافْيَة، وْعْلَى رَاسُه بْزَّافْ دْيَالْ التِّيجَانْ وْمْكْتُوبَة عْلِيهْ وَاحْدْ السّْمِيَّة هُوَ بُوحْدُه اللِّي كَيْعْرَفْهَا.

¹³وْكَانْ لَابْسْ لْبَاسْ عَامْرْ بْالدّْمْ، وْالْإِسْمْ دْيَالُه كْلْمَةْ اللَّهْ.

¹⁴وْالْعَسْكَرْ دْيَالْ السّْمَا كَانُو تَابْعِينُه بْالْخِيلْ اللِّي لُونْهَا بْيَضْ، وْلَابْسِينْ كْتَّانْ بْيَضْ وْنْقِي.

¹⁵وْمْنْ فُمُّه خَارْجْ وَاحْدْ السِّيفْ مَاضِي بَاشْ يْضْرَبْ بِيهْ الشّْعُوبْ. وْغَيْحْكَمْ عْلِيهُمْ بْقْطِيبْ دْيَالْ الْحْدِيدْ، وْغَيْعْفَسْ فْالْمْعَصْرَة اللِّي كَتْغْلِي بْالْخْمَرْ دْيَالْ غَضَبْ اللَّهْ الْقَادْرْ عْلَى كُلّْشِي.

¹⁶وْكَانْ مْكْتُوبْ عْلَى لْبَاسُه وْعْلَى فْخْدُه هَادْ الْإِسْمْ: مَلِكْ الْمُلُوكْ وْرَبّْ الْأَرْبَابْ.

¹⁷وْمْنْ بَعْدْ، شْفْتْ وَاحْدْ الْمَلَاكْ وَاقْفْ فْالشّْمْسْ، كَيْغَوّْتْ عْلَى حَرّْ جْهْدُه وْكَيْݣُولْ لْݣَاعْ الطّْيُورْ اللِّي كَيْطِيرُو فْالسّْمَا: «أَجِيوْ، تّْجَمْعُو لْلْعْشَا الْكْبِيرْ دْيَالْ اللَّهْ،

¹⁸بَاشْ تَاكْلُو لْحَمْ الْمُلُوكْ، وْلْحَمْ الرُّؤَسَا دْ الْعَسْكَرْ، وْلْحَمْ الْعَسْكَرْ الْقْوِيِّينْ، وْلْحَمْ الْخِيلْ وْالْخْيَّالَة، وْلْحَمْ ݣَاعْ النَّاسْ الْعْبِيدْ وْالْحْرَارْ، الصّْغَارْ وْالْكْبَارْ».

¹⁹وْشْفْتْ الْحَيَوَانْ وْمُلُوكْ الْأَرْضْ وْالْعَسْكَرْ دْيَالْهُمْ مْجْمُوعِينْ بَاشْ يْتّْحَارْبُو مْعَ هَادَاكْ اللِّي رَاكْبْ عْلَى الْعَوْدْ وْمْعَ الْعَسْكَرْ دْيَالُه.

²⁰وْتّْشَدّْ الْحَيَوَانْ هُوَ وْالنّْبِي الْكْدَّابْ اللِّي دَارْ الْمُعْجِزَاتْ قُدَّامْ الْحَيَوَانْ، وْبِيهُمْ خْدَعْ هَادُوكْ اللِّي قْبْلُو الْعَلَامَة دْ الْوَحْشْ وْاللِّي سْجْدُو لْلصَّنَمْ دْيَالُه. وْتّْرْمَاوْ بْجُوجْ وْهُمَ حَيِّينْ فْالْبُحَيْرَة دْ الْعَافْيَة الشَّاعْلَة بْالْكْبْرِيتْ.

²¹وْاللِّي بْقَاوْ، تّْقْتْلُو بْالسِّيفْ اللِّي خَارْجْ مْنْ فُمّْ هَادَاكْ اللِّي رَاكْبْ عْلَى الْعَوْدْ، وْݣَاعْ الطّْيُورْ شْبْعُو مْنْ اللّْحَمْ دْيَالْهُمْ.