Read Moroccan Standard Translation الرُّؤْيَا 2 Bible Online

الرُّؤْيَا 2 - Moroccan Standard Translation bible

الرُّؤْيَا 2

¹الْفَصْلْ التَّانِي كْتَبْ لْلْمَلَاكْ دْيَالْ كْنِيسْةْ أَفَسُسْ: «هَا مَا كَيْݣُولْ هَادَاكْ اللِّي شَادّْ فْيْدُّه لِيمْنَى النّْجْمَاتْ السّْبْعَة، وْكَيْمْشِي وَسْطْ الْحَسْكَاتْ السّْبْعَة دْيَالْ الدّْهَبْ:

²كَنْعْرَفْ كُلّْ مَا كَتْدِيرْ وْكَنْعْرَفْ تَمَارَة وْالصّْبَرْ دْيَالْكْ، وْبْلِّي مَا كَتْسْتَحْمَلْشْ الْمْشْرَارِينْ، وْجَرّْبْتِي هَادُوكْ اللِّي كَيْݣُولُو عْلَى رَاسْهُمْ رُسُلْ وْهُمَ مَاشِي رُسُلْ، وْلْقِيتِيهُمْ كْدَّابِينْ.

³نْتَ عَنْدْكْ الصّْبَرْ، وْقَاسِيتِي عْلَى وْدّْ الْإِسْمْ دْيَالِي بْلَا مَا تْعْيَا.

⁴وَلَكِنْ كَنْلُومْكْ حِيتْ سْمَحْتِي فْمْحَبّْتْكْ اللّْوّْلَى.

⁵إِيوَا تْفَكّْرْ فِينْ كْنْتِ قْبَلْ مَا تْطِيحْ وْتُوبْ، وْرْجَعْ لْلْأَعْمَالْ اللِّي كْنْتِ كَتْدِيرْ فْاللّْوّْلْ. وْلَّا رَانِي غَنْجِي نْحَيّْدْ الْحَسْكَة دْيَالْكْ مْنْ بْلَاصْتْهَا إِلَا مَا بْغِيتِيشْ تُّوبْ.

⁶وَلَكِنْ فِيكْ هَادْ الْحَاجَة الْمْزْيَانَة: كَتْكْرَهْ الْأَعْمَالْ دْيَالْ النِّيقُولَاوِيِّينْ كِمَا كَنْكْرَهْهَا حْتَّى أَنَا.

⁷إِيوَا اللِّي عَنْدُه شِي وْدْنِينْ، يْسْمَعْ آشْ كَيْݣُولْ رُوحْ اللَّهْ لْلْكْنَايْسْ. اللِّي غْلَبْ، غَنْعْطِيهْ الْحَقّْ بَاشْ يَاكُلْ مْنْ شَجْرَةْ الْحَيَاةْ اللِّي كَايْنَة فْجْنَّةْ اللَّهْ».

⁸وْكْتَبْ لْلْمَلَاكْ دْيَالْ كْنِيسْةْ سِمِيرْنَا: «هَا مَا كَيْݣُولْ اللّْوّْلْ وْاللّْخْرْ، اللِّي كَانْ مْيّْتْ وْعَاوْدْ حْيَا:

⁹كَنْعْرَفْ الْمْحْنَة وْالْفَقْرْ دْيَالْكْ وَاخَّا نْتَ غَنِي. وْكَنْعْرَفْ الْكْلَامْ الْخَايْبْ اللِّي كَيْݣُولُوهْ ضْدّْكْ هَادُوكْ اللِّي كَيْݣُولُو عْلَى رَاسْهُمْ يْهُودْ وْهُمَ مَاشِي يْهُودْ، وَلَكِنْ هُمَ دَارْ الْعِبَادَة دْيَالْ الشِّيطَانْ.

¹⁰ݣَاعْ مَا تْخَافْ مْنْ الْعْدَابْ اللِّي غَتْقَاسِيهْ. هَا إِبْلِيسْ غَيْرْمِي شِي وْحْدِينْ مْنّْكُمْ فْالْحَبْسْ بَاشْ تْتْجَرّْبُو، وْغَتْدَوّْزُو عَشْرْ يَّامْ دْيَالْ الْمْحْنَة. كُونْ أَمِينْ حْتَّى لْلْمُوتْ، وْأَنَا غَنْعْطِيكْ التَّاجْ دْيَالْ الْحَيَاةْ.

¹¹إِيوَا اللِّي عَنْدُه شِي وْدْنِينْ، يْسْمَعْ آشْ كَيْݣُولْ رُوحْ اللَّهْ لْلْكْنَايْسْ. رَاهْ اللِّي غْلَبْ مَا غَتْآدِيهْشْ الْمُوتْ التَّانْيَة».

¹²وْكْتَبْ لْلْمَلَاكْ دْيَالْ كْنِيسْةْ بَرْغَامُسْ: «هَا مَا كَيْݣُولْ مُولْ السِّيفْ الْمَاضِي مْنْ جُوجْ جْوَايْهْ:

¹³كَنْعْرَفْ فِينْ كَتْسْكُنْ، فْالْبْلَاصَة فِينْ كَايْنْ الْعَرْشْ دْيَالْ الشِّيطَانْ. وَاخَّا هَكَّاكْ بْقِيتِي شَادّْ فْالْإِسْمْ دْيَالِي، وْمَا نْكَرْتِيشْ الْإِيمَانْ دْيَالْكْ بِيَّ حْتَّى فْيَّامْ أَنْتِيبَاسْ الشَّاهْدْ الْأَمِينْ دْيَالِي، اللِّي تّْقْتَلْ عَنْدْكُمْ فِينْ كَيْسْكُنْ الشِّيطَانْ.

¹⁴وَلَكِنْ عَنْدِي عْلَاشْ نْلُومْكْ، عْلَاحْقَّاشْ عَنْدْكْ شِي نَاسْ كَيْتْبْعُو التَّعْلِيمْ دْيَالْ بَلْعَامْ، اللِّي عَلّْمْ بَالَاقْ كِيفَاشْ يْطِيّْحْ شَعْبْ إِسْرَائِيلْ فْالْمْصِيدَة، بَاشْ يَاكْلُو الدّْبَايْحْ الْمْدْبُوحِينْ لْلْأَصْنَامْ وْيْفَسْدُو.

¹⁵وْعَنْدْكْ عَاوْتَانِي شِي وْحْدِينْ كَيْتْبْعُو التَّعْلِيمْ دْيَالْ النِّيقُولَاوِيِّينْ.

¹⁶إِيوَا تُوبْ، وْلَّا رَانِي غَنْجِي عَنْدْكْ دْغْيَا وْغَنْتّْحَارْبْ مْعَاهُمْ بْالسِّيفْ دْيَالْ فُمِّي.

¹⁷إِيوَا اللِّي عَنْدُه شِي وْدْنِينْ، يْسْمَعْ آشْ كَيْݣُولْ رُوحْ اللَّهْ لْلْكْنَايْسْ. رَاهْ اللِّي غْلَبْ غَنْعْطِيهْ مْنْ الْمَنّْ الْمْخَبِّي، وْغَنْعْطِيهْ حَجْرَة بِيضَا مْنْقُوشْ عْلِيهَا وَاحْدْ الْإِسْمْ جْدِيدْ، حْتَّى وَاحْدْ مَا كَيْعَرْفُه مْنْ غِيرْ اللِّي غَيَاخْدُه».

¹⁸وْكْتَبْ لْلْمَلَاكْ دْيَالْ كْنِيسْةْ تِيَاتِيرَا: «هَا مَا كَيْݣُولْ وَلْدْ اللَّهْ اللِّي عِينِيهْ بْحَالْ الشّْعَالَة دْ الْعَافْيَة، وْرْجْلِيهْ بْحَالْ النّْحَاسْ الْمْصْقُولْ:

¹⁹كَنْعْرَفْ كُلّْ مَا كَتْدِيرْ، وْكَنْعْرَفْ الْمْحَبَّة وْالْإِيمَانْ وْالْخْدْمَة وْالصّْبَرْ دْيَاوْلْكْ، وْكَنْعْرَفْ بْلِّي دَاكْشِّي اللِّي دْرْتِيهْ فْاللّْخْرْ كْتَرْ مْنْ اللِّي دْرْتِيهْ فْاللّْوّْلْ.

²⁰وَلَكِنْ عَنْدِي عْلَاشْ نْلُومْكْ، حِيتْ كَتّْسَاهْلْ مْعَ هَادِيكْ الْمْرَاة اللِّي سْمِيتْهَا إِيزَابِيلْ، اللِّي كَتْݣُولْ عْلَى رَاسْهَا نْبِيَّة، وْكَتْغَرّْ الْعْبِيدْ دْيَالِي بْالتَّعْلِيمْ دْيَالْهَا بَاشْ يْفَسْدُو وْيَاكْلُو مْنْ الدّْبَايْحْ الْمْدْبُوحِينْ لْلْأَصْنَامْ.

²¹وْرَانِي عْطِيتْهَا الْوَقْتْ بَاشْ تُّوبْ، وَلَكِنْ مَا بْغَاتْشْ تُّوبْ مْنْ الْفْسَادْ دْيَالْهَا.

²²هَانِي غَنْرْمِيهَا فْفْرَاشْ الْمَرْضْ، وْنْرْمِي فْالْمْحْنَة وْالضِّيقْ حْتَّى هَادُوكْ اللِّي كَيْفَسْدُو [١]مْعَاهَا إِلَا مَا تَابُوشْ مْنْ دَاكْشِّي اللِّي عَلّْمَاتْهُمْ.

²³وْغَنْهْلَكْ وْلَادْهَا بْالْمُوتْ، وْغَيْعَرْفُو الْكْنَايْسْ كُلّْهُمْ بْلِّي أَنَا اللِّي كَنْفْحَصْ الْعْقُولْ وْالْقْلُوبْ. وْغَنْجَازِي كُلّْ وَاحْدْ فِيكُمْ عْلَى حْسَابْ أَعْمَالُه.

²⁴وَلَكِنْ نْتُمَ لْخْرِينْ اللِّي فْتِيَاتِيرَا، اللِّي مَا تْبَعْتُوشْ هَادْ التَّعْلِيمْ وْمَا دْرْتُوشْ بْدَاكْشِّي اللِّي سْمَّاوْهْ شِي وْحْدِينْ أَسْرَارْ الشِّيطَانْ، رَانِي نْݣُولْ لِيكُمْ بْلِّي مَا غَادِيشْ نْزِيدْ عْلِيكُمْ شِي حْمَلْ آخُرْ تْقِيلْ.

²⁵وَلَكِنْ بْقَاوْ تَابْتِينْ فْدَاكْشِّي اللِّي عَنْدْكُمْ حْتَّى نْجِي.

²⁶وْاللِّي غْلَبْ وْكَيْدِيرْ بْالْوْصِيَّاتْ دْيَالِي حْتَّى لْلّْخْرْ، غَنْعْطِيهْ السُّلْطَة عْلَى ݣَاعْ الشّْعُوبْ،

²⁷وْغَيْحْكَمْهُمْ بْوَاحْدْ الْقْطِيبْ دْيَالْ الْحْدِيدْ، وْغَيْهَرّْسْهُمْ بْحَالْ الْمَّاعْنْ دْيَالْ الْفْخَّارْ،

²⁸كِيفْمَا خْدِيتْ أَنَا السُّلْطَة مْنْ عَنْدْ بَّا. وْغَنْعْطِيهْ النّْجْمَة دْيَالْ الصّْبَاحْ.

²⁹إِيوَا اللِّي عَنْدُه شِي وْدْنِينْ، يْسْمَعْ آشْ كَيْݣُولْ رُوحْ اللَّهْ لْلْكْنَايْسْ».