Read Moroccan Standard Translation الرُّؤْيَا 22 Bible Online

الرُّؤْيَا 22 - Moroccan Standard Translation bible

الرُّؤْيَا 22

¹الْفَصْلْ تْنِينْ وْعْشْرِينْ وْمْنْ بَعْدْ، وْرَّانِي الْمَلَاكْ وَادْ فِيهْ الْمَا دْيَالْ الْحَيَاةْ، كَيْلْمَعْ بْحَالْ الْبْلَّارْ، خَارْجْ مْنْ عَرْشْ اللَّهْ وْالْخْرُوفْ،

²وْهَادْ الْوَادْ دَايْزْ فْوَسْطْ سَاحَةْ الْمْدِينَة، وْعْلَى جُوجْ دْ الجِّهَاتْ دْيَالُه كَايْنَة شَجْرَةْ الْحَيَاةْ، كَتْعْطِي غَلّْتْهَا طْنَاشْرْ مَرَّة، مَرَّة فْكُلّْ شْهَرْ، وْبْوْرَاقْهَا كَيْتّْشَافَاوْ الشّْعُوبْ.

³وْمَا غَتْكُونْ حْتَّى لَعْنَة فْهَادْ الْمْدِينَة. وْغَيْكُونْ فِيهَا عَرْشْ اللَّهْ وْالْخْرُوفْ، وْالْعْبِيدْ دْيَالُه غَيْعَبْدُوهْ.

⁴وْغَيْشُوفُو وْجْهُه، وْغَيْكُونْ الْإِسْمْ دْيَالُه عْلَى جْبَهْتْهُمْ.

⁵وْمَا غَيْكُونْشْ اللِّيلْ تْمَّ، وْمَا غَيْحْتَاجُو لَا لْلضُّو دْيَالْ الْقْنْدِيلْ وْلَا دْيَالْ الشّْمْسْ، عْلَاحْقَّاشْ الرَّبّْ الْإِلَاهْ هُوَ اللِّي غَيْضَوِّي عْلِيهُمْ، وْغَيْمَلْكُو دِيمَا وْعْلَى الدّْوَامْ.

⁶وْمْنْ بَعْدْ، ݣَالْ لِيَّ الْمَلَاكْ: «هَادْ الْكْلَامْ صَادْقْ وْحَقّْ، وْالرَّبّْ الْإِلَاهْ اللِّي وْحَى لْلْأَنْبِيَا، صِيفْطْ الْمَلَاكْ دْيَالُه بَاشْ يْبَيّْنْ لْعْبِيدُه آشْ خَاصّْ يْجْرَى فْوَقْتْ قْرِيبْ».

⁷«هَانِي جَايْ دْغْيَا. سْعْدَاتْ اللِّي كَيْدِيرْ بْكْلَامْ النُّبُوَّة دْيَالْ هَادْ الْكْتَابْ».

⁸وْأَنَا يُوحَنَّا اللِّي سْمَعْ وْشَافْ هَادْشِّي. وْمْلِّي سْمَعْتْ وْشْفْتْ، طْحْتْ بَاشْ نْسْجَدْ عَنْدْ رْجْلِينْ الْمَلَاكْ اللِّي وْرَّانِي هَادْشِّي.

⁹وْهُوَ يْݣُولْ لِيَّ: «لَّا، مَا تْدِيرْشْ هَادْشِّي! رَانِي غِيرْ عَبْدْ بْحَالْكْ وْبْحَالْ خُوتْكْ الْأَنْبِيَا، وْبْحَالْ هَادُوكْ اللِّي كَيْدِيرُو بْالْكْلَامْ دْيَالْ هَادْ الْكْتَابْ، رَاهْ لْلَّهْ لَمّْنْ خَاصّْكْ تْسْجَدْ».

¹⁰وْعَاوْدْ ݣَالْ لِيَّ: «مَا تْخَبِّيشْ كْلَامْ النُّبُوَّة اللِّي فْهَادْ الْكْتَابْ، حِيتْ الْوَقْتْ قَرّْبْ.

¹¹اللِّي كَيْضْلَمْ غِيرْ يْزِيدْ فْالضُّلْمْ دْيَالُه، وْاللِّي مْنْجُوسْ غِيرْ يْزِيدْ يْتّْنَجّْسْ. وْاللِّي مْتَّاقِي اللَّهْ يْزِيدْ فْالتَّقْوَى دْيَالُه، وْاللِّي مْقَدّْسْ يْزِيدْ يْتّْقَدّْسْ.

¹²هَانِي جَايْ دْغْيَا وْمْعَايَ الْأُجْرَة بَاشْ نْجَازِي كُلّْ وَاحْدْ عْلَى حْسَابْ أَعْمَالُه.

¹³أَنَا الْأَلِفْ وْالْيَاءْ، اللّْوّْلْ وْاللّْخْرْ، الْبْدُو وْالتَّالِي».

¹⁴سْعْدَاتْ اللِّي كَيْصَبّْنُو حْوَايْجْهُمْ، بَاشْ يْكُونْ عَنْدْهُمْ الْحَقّْ فْشَجْرَةْ الْحَيَاةْ، وْبَاشْ يْدَخْلُو لْلْمْدِينَة مْنْ بِيبَانْهَا.

¹⁵حِيتْ عْلَى بْرَّا كَايْنِينْ الْكْلَابْ، وْالسّْحَّارَا، وْالْفَاسْدِينْ، وْالْقْتَّالَة، وْاللِّي كَيْعَبْدُو الْأَصْنَامْ، وْكُلّْ مْنْ كَيْكْدَبْ وْكَيْبْغِي الْكْدُوبْ!

¹⁶«أَنَا يَسُوعْ، صِيفْطْتْ الْمَلَاكْ دْيَالِي بَاشْ يْشْهَدْ لِيكُمْ بْهَادْ الْأُمُورْ عْلَى الْكْنَايْسْ. أَنَا أَصْلْ دَاوُدْ وْمْنْ تْرِّيكْتُه، وْأَنَا نْجْمَةْ الصّْبَاحْ الْمْضَوّْيَة».

¹⁷رُوحْ اللَّهْ وْالْعْرُوسَة كَيْݣُولُو: «أَجِي!»، وْاللِّي سْمَعْ يْݣُولْ: «أَجِي!» وْاللِّي عْطْشَانْ يْجِي. وْاللِّي بْغَا، يَاخُدْ الْمَا دْيَالْ الْحَيَاةْ بْلَا تَمَنْ.

¹⁸أَنَا يُوحَنَّا، كَنَّبّْهْ كُلّْ مْنْ كَيْسْمَعْ كْلَامْ النُّبُوَّة اللِّي فْهَادْ الْكْتَابْ: إِلَا شِي وَاحْدْ زَادْ عْلَى هَادْشِّي، رَاهْ اللَّهْ غَيْزِيدْ عْلِيهْ الْمْصَايْبْ اللِّي مْكْتُوبِينْ فْهَادْ الْكْتَابْ.

¹⁹وْإِلَا شِي وَاحْدْ حَيّْدْ شِي حَاجَة مْنْ كْلَامْ النُّبُوَّة اللِّي فْهَادْ الْكْتَابْ، رَاهْ اللَّهْ غَيْحَيّْدْ حَقُّه مْنْ شَجْرَةْ الْحَيَاةْ وْمْنْ الْمْدِينَة الْمْقَدّْسَة اللِّي مْكْتُوبِينْ فْهَادْ الْكْتَابْ.

²⁰هَادَاكْ اللِّي شْهَدْ بْهَادْ الْأُمُورْ كَيْݣُولْ: «إِيِّهْ، هَانِي جَايْ دْغْيَا». آمِينْ، أَجِي آ الرَّبّْ يَسُوعْ.

²¹نِعْمَةْ الرَّبّْ يَسُوعْ تْكُونْ مْعَاكُمْ كُلّْكُمْ.