Read Moroccan Standard Translation الرُّؤْيَا 3 Bible Online

الرُّؤْيَا 3 - Moroccan Standard Translation bible

الرُّؤْيَا 3

¹الْفَصْلْ التَّالْتْ وْكْتَبْ لْلْمَلَاكْ دْيَالْ كْنِيسْةْ سَارْدِسْ: «هَا مَا كَيْݣُولْ هَادَاكْ اللِّي عَنْدُه الْأَرْوَاحْ السّْبْعَة اللِّي كَيْخَدْمُو لْلَّهْ وْعَنْدُه النّْجْمَاتْ السّْبْعَة: كَنْعْرَفْ كُلّْ مَا كَتْدِيرْ، رَاكْ كَتْبَانْ حَيّْ وَلَكِنْ نْتَ مْيّْتْ.

²سْهَرْ وْتّْقُوَّى مْنْ جْدِيدْ فْدَاكْشِّي اللِّي بْقَى لِيكْ قْبَلْ مَا يْمُوتْ، حِيتْ دَاكْشِّي اللِّي كَتْدِيرْ مَا لْقِيتُوشْ كَامْلْ قُدَّامْ اللَّهْ.

³إِيوَا تْفَكّْرْ دَاكْشِّي اللِّي تْعَلّْمْتِيهْ وْسْمَعْتِيهْ، وْدِيرْ بِيهْ وْتُوبْ، حِيتْ إِلَا مَا سْهَرْتِيشْ غَنْجِي لِيكْ بْحَالْ الشّْفَارْ، وْمَا غَتْعْرَفْشْ آشْ مْنْ سَاعَة فَاشْ غَنْجِي عْلَى غَفْلَة.

⁴وَلَكِنْ عَنْدْكْ نَاسْ قْلَالْ فْسَارْدِسْ مَا وَسّْخُوشْ حْوَايْجْهُمْ، هَادُو هُمَ اللِّي غَيْمْشِيوْ مْعَايَ بْحْوَايْجْ بِيضِينْ عْلَاحْقَّاشْ كَيْسْتَاهْلُو.

⁵اللِّي غْلَبْ غَيْلْبَسْ حْوَايْجْ بِيضِينْ، وْمَا غَادِيشْ نْمْحِي سْمِيتُه مْنْ كْتَابْ الْحَيَاةْ. وْغَنْعْتَرْفْ بْسْمِيتُه قُدَّامْ بَّا وْالْمَلَايْكَة دْيَالُه.

⁶إِيوَا اللِّي عَنْدُه شِي وْدْنِينْ، يْسْمَعْ آشْ كَيْݣُولْ رُوحْ اللَّهْ لْلْكْنَايْسْ».

⁷وْكْتَبْ لْلْمَلَاكْ دْيَالْ كْنِيسْةْ فِيلَادِلْفْيَا: «هَا مَا كَيْݣُولْ الْمْقَدّْسْ اللِّي هُوَ الْحَقّْ، اللِّي عَنْدُه السَّارُوتْ دْيَالْ دَاوُدْ، اللِّي كَيْحَلّْ وْحْتَّى وَاحْدْ مَا يْقْدَرْ يْسَدّْ، وْكَيْسَدّْ وْحْتَّى وَاحْدْ مَا يْقْدَرْ يْحَلّْ:

⁸كَنْعْرَفْ كُلّْ مَا كَتْدِيرْ، هَانِي حْلِّيتْ قُدَّامْكْ بَابْ حْتَّى وَاحْدْ مَا يْقْدَرْ يْسَدُّه، عْلَاحْقَّاشْ وَاخَّا الْقُوَّة دْيَالْكْ قْلِيلَة، رَاكْ دْرْتِي بْكْلَامِي وْمَا نْكَرْتِيشْ الْإِسْمْ دْيَالِي.

⁹هَا مَا غَنْدِيرْ بْهَادُوكْ اللِّي مْنْ دَارْ الْعِبَادَة دْيَالْ الشِّيطَانْ، اللِّي كَيْݣُولُو بْلِّي هُمَ يْهُودْ وْهُمَ مَاشِي يْهُودْ وَلَكِنْ غِيرْ كَيْكْدْبُو، غَنْجِيبْهُمْ بَزّْزْ بَاشْ يْسَجْدُو قُدَّامْ رْجْلِيكْ وْغَيْعَرْفُو بْلِّي أَنَا كَنْبْغِيكْ.

¹⁰وْعْلَاحْقَّاشْ دْرْتِي بْكْلَامِي وْصْبَرْتِي، حْتَّى أَنَا غَنْحْمِيكْ فْسَاعْةْ الْمْحْنَة اللِّي غَتْدُوزْ فِيهَا الدّْنْيَا كُلّْهَا بَاشْ يْتّْجَرّْبُو بِيهَا ݣَاعْ سُكَّانْ الْأَرْضْ.

¹¹هَانِي جَايْ دْغْيَا. إِيوَا تْبَتْ مْزْيَانْ فْدَاكْشِّي اللِّي عَنْدْكْ بَاشْ حْتَّى وَاحْدْ مَا يْخْطَفْ لِيكْ التَّاجْ دْيَالْكْ.

¹²اللِّي غْلَبْ، غَنْرَدُّه سَارْيَة فْبِيتْ اللَّهْ الْإِلَاهْ دْيَالِي، وْعَمّْرُه مَا غَيْخْرُجْ مْنُّه، وْغَنْكْتَبْ عْلِيهْ إِسْمْ الْإِلَاهْ دْيَالِي وْسْمِيّْةْ مْدِينْةْ الْإِلَاهْ دْيَالِي، اللِّي هِيَ أُورْشَلِيمْ الجّْدِيدَة النَّازْلَة مْنْ السّْمَا مْنْ عَنْدْ الْإِلَاهْ دْيَالِي، وْغَنْكْتَبْ عْلِيهْ الْإِسْمْ دْيَالِي الجّْدِيدْ.

¹³إِيوَا اللِّي عَنْدُه شِي وْدْنِينْ، يْسْمَعْ آشْ كَيْݣُولْ رُوحْ اللَّهْ لْلْكْنَايْسْ».

¹⁴وْكْتَبْ لْلْمَلَاكْ دْيَالْ كْنِيسْةْ لَاوُدِكِيَّة: «هَا مَا كَيْݣُولْ اللِّي هُوَ الْحَقّْ[٢]، الشَّاهْدْ الْأَمِينْ الصَّادْقْ، أَصْلْ الْخَلِيقَة دْ اللَّهْ.

¹⁵كَنْعْرَفْ كُلّْ مَا كَتْدِيرْ، بْلِّي رَاكْ مَا بَارْدْ مَا سْخُونْ. كُونْ غِيرْ كْنْتِ بَارْدْ وْلَا سْخُونْ!

¹⁶وْعْلَاحْقَّاشْ نْتَ دَافِي، وْمَا بَارْدْ مَا سْخُونْ، رَانِي غَنْتْقِيَّاكْ مْنْ فُمِّي،

¹⁷حِيتْ كَتْݣُولْ: أَنَا لَبَاسْ عْلِيَّ وْزْدْتْ خِيرْ عْلَى خِيرْ، وْمَا بْقَى خَاصّْنِي وَالُو، وَلَكِنْ مَا كَتْعْرَفْشْ بْلِّي رَاكْ مْتْعُوسْ، وْمْحْݣُورْ، وْفَقِيرْ، وْعْمَى، وْعْرْيَانْ.

¹⁸كَنّْصْحَكْ تْشْرِي مْنْ عَنْدِي الدّْهَبْ الْمْصَفِّي بْالْعَافْيَة بَاشْ تْوَلِّي لَبَاسْ عْلِيكْ، وْتْشْرِي حْوَايْجْ بِيضِينْ بَاشْ تْلْبَسْهُمْ وْتْسْتَرْ الْعْرَا دْيَالْكْ وْمَا تْبْقَاشْ مْحَشّْمْ. وْالْكْحُلْ تْكَحّْلْ بِيهْ عِينِيكْ بَاشْ تْقْدَرْ تْشُوفْ.

¹⁹ݣَاعْ اللِّي كَنْبْغِيهْ، كَنْخَاصْمْ عْلِيهْ وْكَنْرَبِّيهْ. إِيوَا دِيرْ جَهْدْكْ وْتُوبْ.

²⁰هَانِي وَاقْفْ عَنْدْ الْبَابْ وْكَنْدَقّْ، إِلَا شِي وَاحْدْ سْمَعْ صُوتِي وْحَلّْ الْبَابْ، غَنْدْخُلْ لْعَنْدُه وْغَنْتّْعَشَّى مْعَاهْ وْهُوَ مْعَايَ.

²¹رَاهْ اللِّي غْلَبْ غَنْعْطِيهْ الْحَقّْ بَاشْ يْݣْلَسْ مْعَايَ عْلَى الْعَرْشْ دْيَالِي، كِيفْمَا غْلَبْتْ حْتَّى أَنَا وْݣْلَسْتْ مْعَ بَّا عْلَى الْعَرْشْ دْيَالُه.

²²إِيوَا اللِّي عَنْدُه شِي وْدْنِينْ، يْسْمَعْ آشْ كَيْݣُولْ رُوحْ اللَّهْ لْلْكْنَايْسْ».