Read Moroccan Standard Translation الرُّؤْيَا 4 Bible Online

الرُّؤْيَا 4 - Moroccan Standard Translation bible

الرُّؤْيَا 4

¹الْفَصْلْ الرَّابْعْ مْنْ بَعْدْ هَادْشِّي، شْفْتْ وْهُوَ يْبَانْ لِيَّ وَاحْدْ الْبَابْ مْحْلُولْ فْالسّْمَا، وْهَادَاكْ الصُّوتْ اللِّي سْمَعْتُه مْنْ قْبَلْ تّْكَلّْمْ مْعَايَ بْحَالْ الْبُوقْ وْݣَالْ: «طْلَعْ لّْهْنَا وْغَنْوَرِّيكْ اللِّي لَابْدّْ مَا يْوْقَعْ مْنْ بَعْدْ هَادْشِّي».

²وْفْدِيكْ السَّاعَة نْزَلْ عْلِيَّ رُوحْ اللَّهْ، وْأَنَا نْشُوفْ وَاحْدْ الْعَرْشْ فْالسّْمَا ݣَالْسْ عْلِيهْ شِي وَاحْدْ،

³وْهَادَاكْ اللِّي ݣَالْسْ عْلِيهْ كَيْلْمَعْ بْحَالْ الْحْجَرْ دْيَالْ الْيَشْبْ وْالْعْقِيقْ الْحْمَرْ. وْقَوْسْ قُزَحْ ضَايْرْ بْالْعَرْشْ كَيْلْمَعْ بْحَالْ الزُّمُرُّدْ.

⁴وْضَايْرْ بْالْعَرْشْ رْبْعَة وْعْشْرِينْ عَرْشْ، وْݣَالْسِينْ عْلَى هَادْ رْبْعَة وْعْشْرِينْ عَرْشْ رْبْعَة وْعْشْرِينْ شِيخْ مْسْؤُولْ، لَابْسِينْ حْوَايْجْ بِيضِينْ وْعْلَى رْيُوسْهُمْ تِيجَانْ دْيَالْ الدّْهَبْ.

⁵وْمْنْ الْعَرْشْ كَيْخْرُجْ الْبَرْقْ وْالصُّوتْ وْالرَّعْدْ، وْقُدَّامْ هَادْ الْعَرْشْ سْبْعَة دْ الْمْشَاهْبْ دْيَالْ الْعَافْيَة شَاعْلِينْ، وْهَادُو هُمَ الْأَرْوَاحْ السّْبْعَة اللِّي كَيْخَدْمُو لْلَّهْ.

⁶وْقُدَّامْ الْعَرْشْ كَايْنَة شِي حَاجَة كَتْشْبَهْ لْوَاحْدْ الْبْحَرْ دْيَالْ الجَّاجْ، صَافِي بْحَالْ الْبْلَّارْ. وْفْوَسْطْ الْعَرْشْ وْفْالجّْنَابْ دْيَالُه كَايْنِينْ رْبْعَة دْ الْمْخْلُوقَاتْ عَامْرِينْ بْالْعِينِينْ مْنْ الْقُدَّامْ وْمْنْ اللُّورْ.

⁷الْمْخْلُوقْ اللّْوّْلْ كَيْشْبَهْ لْلسّْبَعْ، وْالتَّانِي كَيْشْبَهْ لْلْعْجَلْ، وْالتَّالْتْ عَنْدُه وْجَهْ بْحَالْ دْيَالْ بْنَادْمْ، وْالرَّابْعْ كَيْشْبَهْ لْلنّْسَرْ الطَّايْرْ.

⁸وْكُلّْ وَاحْدْ مْنْ هَادْ الرّْبْعَة دْ الْمْخْلُوقَاتْ عَنْدُه سْتَّة دْ الجّْنَاوْحْ، عَامْرْ بْالْعِينِينْ مْنْ بْرَّا وْمْنْ لْدَاخْلْ. وْكَيْسَبّْحْ لِيلْ وْنْهَارْ وْكَيْݣُولْ: «قُدُّوسْ، قُدُّوسْ، قُدُّوسْ، الرَّبّْ الْإِلَاهْ الْقَادْرْ عْلَى كُلّْشِي، اللِّي كَانْ وْكَايْنْ وْغَيْجِي!»

⁹وْمْلِّي كَيْسَبّْحُو هَادْ الْمْخْلُوقَاتْ بْالْعَزّْ وْالْكَرَامَة وْالشُّكْرْ لْهَادَاكْ اللِّي ݣَالْسْ عْلَى الْعَرْشْ، وْاللِّي حَيّْ دِيمَا وْعْلَى الدّْوَامْ،

¹⁰كَيْرَكْعُو الرّْبْعَة وْعْشْرِينْ شِيخْ مْسْؤُولْ قُدَّامْ هَادَاكْ اللِّي ݣَالْسْ عْلَى الْعَرْشْ، وْكَيْسَجْدُو لْلِّي هُوَ حَيّْ دِيمَا وْعْلَى الدّْوَامْ، وْكَيْرْمِيوْ التِّيجَانْ دْيَالْهُمْ قُدَّامْ الْعَرْشْ وْكَيْݣُولُو:

¹¹«يَا رَبّْنَا وْيَا إِلَاهْنَا، نْتَ اللِّي كَتْسْتَاهْلْ الْعَزّْ وْالْكَرَامَة وْالْقُدْرَة، حِيتْ نْتَ اللِّي خْلَقْتِي كُلّْشِي، وْبْالْمُرَادْ دْيَالْكْ كُلّْشِي كَانْ وْتّْخْلَقْ».