Read Moroccan Standard Translation الرُّؤْيَا 5 Bible Online

الرُّؤْيَا 5 - Moroccan Standard Translation bible

الرُّؤْيَا 5

¹الْفَصْلْ الْخَامْسْ وْمْنْ بَعْدْ، شْفْتْ فْالْيْدّْ لِيمْنَى دْيَالْ هَادَاكْ اللِّي ݣَالْسْ عْلَى الْعَرْشْ، وَاحْدْ الْكْتَابْ مْكْتُوبْ مْنْ لْدَاخْلْ وْمْنْ بْرَّا، وْمْشَمّْعْ سْبْعَة دْ الْمَرَّاتْ.

²وْشْفْتْ وَاحْدْ الْمَلَاكْ قْوِي كَيْبَرّْحْ عْلَى حَرّْ جْهْدُه وْكَيْݣُولْ: «شْكُونْ اللِّي عَنْدُه الْحَقّْ بَاشْ يْحَلّْ الْكْتَابْ وْيْفَكّْ الْعْقْدَاتْ دْيَالُه؟».

³وْمَا قْدَرْ حْتَّى شِي وَاحْدْ لَا فْالسّْمَا وَلَا فْالْأَرْضْ وَلَا تَحْتْ الْأَرْضْ يْحَلّْ الْكْتَابْ وَلَا يْشُوفْ أَشْنُو فِيهْ!

⁴وْبْدِيتْ كَنْبْكِي بْزَّافْ، عْلَاحْقَّاشْ مَا كَانْ حْتَّى شِي وَاحْدْ اللِّي عَنْدُه الْحَقّْ بَاشْ يْحَلّْ الْكْتَابْ وَلَا يْشُوفْ أَشْنُو فِيهْ.

⁵وْهُوَ يْݣُولْ لِيَّ وَاحْدْ مْنْ الشّْيُوخْ الْمْسْؤُولِينْ: «مَا تْبْكِيشْ، هَا السّْبَعْ اللِّي مْنْ قْبِيلْةْ يَهُودَا وْمْنْ تْرِّيكْةْ دَاوُدْ، غْلَبْ. وْهُوَ اللِّي يْقْدَرْ يْحَلّْ الْكْتَابْ وْيْفَكّْ الْعْقْدَاتْ دْيَالُه».

⁶وْشْفْتْ فْوَسْطْ الْعَرْشْ، وْفْوَسْطْ الرّْبْعَة دْ الْمْخْلُوقَاتْ، وْفْوَسْطْ الشّْيُوخْ الْمْسْؤُولِينْ، وَاحْدْ الْخْرُوفْ وَاقْفْ كَيْبَانْ بْحَالْ إِلَا مْدْبُوحْ، عَنْدُه سْبْعَة دْ الْݣْرُونْ وْسْبْعَة دْ الْعِينِينْ، وْهَادُو هُمَ الْأَرْوَاحْ السّْبْعَة اللِّي كَيْخَدْمُو لْلَّهْ وْاللِّي صِيفْطْهُمْ لْلْأَرْضْ كُلّْهَا.

⁷وْجَا الْخْرُوفْ وْخْدَا الْكْتَابْ مْنْ الْيْدّْ لِيمْنَى دْيَالْ هَادَاكْ اللِّي ݣَالْسْ عْلَى الْعَرْشْ.

⁸وْمْلِّي خْدَا الْكْتَابْ، سْجْدُو الرّْبْعَة دْ الْمْخْلُوقَاتْ هُمَ وْالرّْبْعَة وْعْشْرِينْ شِيخْ مْسْؤُولْ قُدَّامْ الْخْرُوفْ، كُلّْ وَاحْدْ مْنّْهُمْ عَنْدُه ݣِيتَارْ وْكِيسَانْ دْيَالْ الدّْهَبْ عَامْرِينْ بْالْبْخُورْ، هُمَ الصّْلَاة دْيَالْ الْمْقَدّْسِينْ.

⁹وْكَانُو كَيْرَنّْمُو وَاحْدْ التَّرْنِيمَة جْدِيدَة وْكَيْݣُولُو: «نْتَ كَتْسْتَاهْلْ تَاخُدْ الْكْتَابْ وْتْفَكّْ الْعْقْدَاتْ دْيَالُه، عْلَاحْقَّاشْ تّْدْبَحْتِي وْبْدْمّْكْ شْرِيتِي لْلَّهْ نَاسْ مْنْ كُلّْ قْبِيلَة وْلُغَة وْشَعْبْ وْأُمَّة.

¹⁰وْدْرْتِي مْنّْهُمْ لْلْإِلَاهْ دْيَالْنَا مَمْلَكَة وْرْجَالْ الدِّينْ، وْغَيْمَلْكُو عْلَى الْأَرْضْ».

¹¹وْشْفْتْ، وْأَنَا نْسْمَعْ الصُّوتْ دْيَالْ بْزَّافْ دْ الْمَلَايْكَة كَيْتّْحَسْبُو بْالْأُلُوفَاتْ وْبْالْمَلَايِينْ، ضَايْرِينْ بْالْعَرْشْ وْبْالْمَخْلُوقَاتْ وْبْالشّْيُوخْ الْمْسْؤُولِينْ،

¹²كَيْسَبّْحُو بْصُوتْ عَالِي وْكَيْݣُولُو: «كَيْسْتَاهْلْ الْخْرُوفْ الْمْدْبُوحْ يَاخُدْ الْقُدْرَة، وْالْغِنَى، وْالْحْكْمَة، وْالْقُوَّة، وْالْكَرَامَة، وْالْعَزّْ، وْالْحَمْدْ!».

¹³وْسْمَعْتْ ݣَاعْ الْمْخْلُوقَاتْ اللِّي فْالسّْمَا وْفْالْأَرْضْ وْتَحْتْ الْأَرْضْ، وْفْالْبْحَرْ، وْاللِّي فْالدّْنْيَا كُلّْهَا، كَيْݣُولُو: «الْحَمْدْ، وْالْكَرَامَة، وْالْعَزّْ، وْالْقُوَّة، دِيمَا وْعْلَى الدّْوَامْ لْهَادَاكْ اللِّي ݣَالْسْ عْلَى الْعَرْشْ وْلْلْخْرُوفْ».

¹⁴وْݣَالُو الرّْبْعَة دْ الْمْخْلُوقَاتْ: «آمِينْ». وْالشّْيُوخْ الْمْسْؤُولِينْ رْكْعُو وْسْجْدُو.