Read Moroccan Standard Translation الرُّؤْيَا 7 Bible Online

الرُّؤْيَا 7 - Moroccan Standard Translation bible

الرُّؤْيَا 7

¹الْفَصْلْ السَّابْعْ وْمْنْ بَعْدْ هَادْشِّي، شْفْتْ رْبْعَة دْ الْمَلَايْكَة وَاقْفِينْ عْلَى رْبْعَة دْ الجّْوَايْهْ دْيَالْ الْأَرْضْ، قَابْطِينْ الرِّيحْ اللِّي جَايَّة مْنْ هَادْ الرّْبْعَة دْ الجّْوَايْهْ بَاشْ حْتَّى رِيحْ مْنّْهُمْ مَا تْضْرَبْ لَا الْبْرّْ، وَلَا الْبْحَرْ، وَلَا حْتَّى شِي شَجْرَة.

²وْشْفْتْ مَلَاكْ آخُرْ طَالْعْ مْنْ الشَّرْقْ وْهَازّْ مْعَاهْ الطَّابْعْ دْيَالْ اللَّهْ الْحَيّْ، وْعَيّْطْ بْصُوتْ عَالِي عْلَى الْمَلَايْكَة الرّْبْعَة اللِّي تّْعْطَاتْ لِيهُمْ الْقُدْرَة بَاشْ يْآدِيوْ الْبْرّْ وْالْبْحَرْ،

³وْݣَالْ لِيهُمْ: «مَا تْآدِيوْشْ الْبْرّْ وَلَا الْبْحَرْ وَلَا الشّْجَرْ، حْتَّى نْرَشْمُو الْعْبِيدْ دْيَالْ إِلَاهْنَا عْلَى جْبَهْتْهُمْ».

⁴وْسْمَعْتْ بْلِّي الْمْرْشُومِينْ هُمَ مْيَة وْرْبْعَة وْرْبْعِينْ أَلْفْ مْنْ ݣَاعْ قْبَايْلْ شَعْبْ إِسْرَائِيلْ:

⁵طْنَاشْرْ أَلْفْ مْرْشُومْ مْنْ قْبِيلْةْ يَهُودَا، وْطْنَاشْرْ أَلْفْ مْنْ قْبِيلْةْ رَأُوبِينْ، وْطْنَاشْرْ أَلْفْ مْنْ قْبِيلْةْ جَادْ،

⁶وْطْنَاشْرْ أَلْفْ مْنْ قْبِيلْةْ أَشِيرْ، وْطْنَاشْرْ أَلْفْ مْنْ قْبِيلْةْ نَفْتَالِي، وْطْنَاشْرْ أَلْفْ مْنْ قْبِيلْةْ مَنَسَّى،

⁷وْطْنَاشْرْ أَلْفْ مْنْ قْبِيلْةْ شِمْعُونْ، وْطْنَاشْرْ أَلْفْ مْنْ قْبِيلْةْ لَاوِي، وْطْنَاشْرْ أَلْفْ مْنْ قْبِيلْةْ يَسَّاكَرْ،

⁸وْطْنَاشْرْ أَلْفْ مْنْ قْبِيلْةْ زَبُولُونْ، وْطْنَاشْرْ أَلْفْ مْنْ قْبِيلْةْ يُوسْفْ، وْطْنَاشْرْ أَلْفْ مْنْ قْبِيلْةْ بْنْيَامِينْ. وْهَادُو كُلّْهُمْ مْرْشُومِينْ بْالطَّابْعْ.

⁹وْمْنْ بَعْدْ هَادْشِّي، شْفْتْ وْبَانْتْ لِيَّ وَاحْدْ الجّْمَاعَة كْبِيرَة دْ النَّاسْ، حْتَّى وَاحْدْ مَا قْدَرْ يْحْسَبْهُمْ، مْنْ كُلّْ أُمَّة وْمْنْ كُلّْ قْبِيلَة وْمْنْ كُلّْ شَعْبْ وْمْنْ كُلّْ لُغَة، وَاقْفِينْ قُدَّامْ الْعَرْشْ وْقُدَّامْ الْخْرُوفْ، وْلَابْسِينْ حْوَايْجْ بِيضِينْ وْهَازِّينْ فْيْدِّيهُمْ الجّْرِيدْ دْ النّْخَلْ.

¹⁰وْكَيْغَوّْتُو بْصُوتْ عَالِي وْكَيْݣُولُو: «النّْجَا مْنْ عَنْدْ الْإِلَاهْ دْيَالْنَا اللِّي ݣَالْسْ عْلَى الْعَرْشْ وْمْنْ عَنْدْ الْخْرُوفْ».

¹¹وْݣَاعْ الْمَلَايْكَة كَانُو وَاقْفِينْ وْضَايْرِينْ بْالْعَرْشْ، وْبْالشّْيُوخْ الْمْسْؤُولِينْ وْبْالرّْبْعَة دْ الْمْخْلُوقَاتْ وْتّْحْنَاوْ عْلَى جْبَهْتْهُمْ قُدَّامْ الْعَرْشْ وْسْجْدُو لْلَّهْ،

¹²وْݣَالُو: «آمِينْ! الْحَمْدْ، وْالْعَزّْ، وْالْحْكْمَة، وْالشُّكْرْ، وْالْكَرَامَة، وْالْقُدْرَة، وْالْقُوَّة، لْلْإِلَاهْ دْيَالْنَا دِيمَا وْعْلَى الدّْوَامْ. آمِينْ!»

¹³وْݣَالْ لِيَّ وَاحْدْ مْنْ الشّْيُوخْ الْمْسْؤُولِينْ: «شْكُونْ هُمَ هَادُوكْ اللِّي لَابْسِينْ حْوَايْجْ بِيضِينْ؟ وْمْنِينْ جَاوْ؟».

¹⁴وْجَاوْبْتُه: «آ سِيدِي، نْتَ اللِّي كَتْعْرَفْ». وْهُوَ يْݣُولْ لِيَّ: «هَادُوكْ رَاهْ هُمَ اللِّي نْجَاوْ مْنْ الْمْحْنَة الْكْبِيرَة، وْغْسْلُو حْوَايْجْهُمْ وْرَدُّوهُمْ بِيضِينْ بْالدّْمْ دْيَالْ الْخْرُوفْ،

¹⁵دَاكْشِّي عْلَاشْ هُمَ قُدَّامْ الْعَرْشْ دْ اللَّهْ، وْكَيْخَدْمُو لِيهْ لِيلْ وْنْهَارْ فْالْبِيتْ دْيَالُه، وْهَادَاكْ اللِّي ݣَالْسْ عْلَى الْعَرْشْ غَيْسْتَرْهُمْ بْالْخِيمَة دْيَالُه.

¹⁶وْعَمّْرْهُمْ مَا غَيْجُوعُو وَلَا يْعَطْشُو، وْمَا غَتْحْرَقْهُمْ لَا شْمْسْ وَلَا صَهْدْ،

¹⁷حِيتْ الْخْرُوفْ اللِّي فْوَسْطْ الْعَرْشْ غَيْرْعَاهُمْ، وْغَيْدِّيهُمْ لْلْعْيُونْ دْ الْمَا الْحَيّْ، وْاللَّهْ غَيْمْسَحْ كُلّْ دَمْعَة مْنْ عِينِيهُمْ».