Read Moroccan Standard Translation الرُّؤْيَا 9 Bible Online

الرُّؤْيَا 9 - Moroccan Standard Translation bible

الرُّؤْيَا 9

¹الْفَصْلْ التَّاسْعْ وْنْفَخْ الْمَلَاكْ الْخَامْسْ فْالْبُوقْ دْيَالُه، وْشْفْتْ وَاحْدْ النّْجْمَة طَاحْتْ مْنْ السّْمَا لْلْأَرْضْ، وْتّْعْطَى لِيهَا السَّارُوتْ دْيَالْ بِيرْ الْهَاوِيَة.

²وْحْلَّاتْ النّْجْمَة بِيرْ الْهَاوِيَة، وْطْلَعْ مْنْ الْبِيرْ دْخَّانْ بْحَالْ الدّْخَّانْ دْيَالْ شِي زُوبْيَة دْ الْعَافْيَة كْبِيرَة، وْضْلَامْتْ الشّْمْسْ وْالسّْمَا بْدْخَّانْ الْبِيرْ.

³وْمْنْ هَادْ الدّْخَّانْ خْرَجْ الجّْرَادْ وْغْطَّا وْجَهْ الْأَرْضْ، وْتّْعْطَاتْ لِيهْ الْقُدْرَة بْحَالْ الْقُدْرَة دْيَالْ الْعْݣَارْبْ دْ الْأَرْضْ.

⁴وْتّْݣَالْ لِيهْ بَاشْ مَا يْآدِيشْ الرّْبِيعْ دْيَالْ الْأَرْضْ، وَلَا حْتَّى شِي حَاجَة خَضْرَا وَلَا شِي شَجْرَة، مْنْ غِيرْ النَّاسْ اللِّي مَا عَنْدْهُمْشْ الطَّابْعْ دْ اللَّهْ عْلَى جْبَهْتْهُمْ.

⁵وْتّْعْطَاهْ الْحَقّْ بَاشْ مَا يْقْتَلْهُومْشْ وَلَكِنْ يْعَدّْبْهُمْ خَمْسْ شْهُورْ. وْالْعْدَابْ اللِّي كَيْتّْسَبّْبْ فِيهْ كَيْشْبَهْ لْعْدَابْ الْعَݣْرْبْ مْلِّي كَتْعَضّْ بْنَادْمْ.

⁶وْفْدِيكْ لِيَّامْ، غَيْقَلّْبُو النَّاسْ عْلَى الْمُوتْ وْمَا غَيْلْقَاوْهَاشْ، وْغَيْتّْمْنَّاوْ يْمُوتُو وْالْمُوتْ غَتْهْرَبْ مْنّْهُمْ.

⁷وْهَادْ الجّْرَادْ كَانْ كَيْشْبَهْ لْلْخِيلْ اللِّي مْوَجّْدَة لْلْحَرْبْ، وْعْلَى رْيُوسْهُمْ بْحَالْ التِّيجَانْ دْيَالْ الدّْهَبْ، وْوْجُوهْهُمْ بْحَالْ وْجَهْ بْنَادْمْ.

⁸وْعَنْدْهُمْ الشّْعَرْ بْحَالْ شْعَرْ الْعْيَالَاتْ، وْسْنَانْهُمْ بْحَالْ سْنَانْ السّْبُوعَ،

⁹وْعَنْدْهُمْ الضّْرَّاݣَاتْ بْحَالْ الضّْرَّاݣَاتْ دْ الْحْدِيدْ، وْالصُّوتْ دْ الجّْنَاوْحْ دْيَالْهُمْ بْحَالْ صُوتْ الْكْرَارْسْ كَتْجَرّْهَا بْزَّافْ دْ الْخِيلْ اللِّي كَتْجْرِي لْلْحَرْبْ.

¹⁰وْكَيْعَضُّو بْحَالْ الْعْݣَارْبْ بْالْقَزِّيبَاتْ دْيَالْهُمْ اللِّي فِيهُمْ الْقُدْرَة بَاشْ يْآدِيوْ النَّاسْ لْمُدَّةْ خَمْسْ شْهُورْ.

¹¹وْعَنْدْهُمْ مَلِكْ هُوَ مَلَاكْ الْهَاوِيَة، سْمِيتُه بْالْعِبْرِيَّة «أَبَدُّونْ» وْبْالْيُونَانِيَّة «أَبُولِّيُّونْ».

¹²الْوِيلْ اللّْوّْلْ دَازْ، وْهَا هُمَ جُوجْ خْرِينْ غَيْجِيوْ مْنْ بَعْدْ هَادْشِّي.

¹³وْنْفَخْ الْمَلَاكْ السَّادْسْ فْالْبُوقْ دْيَالُه، وْسْمَعْتْ وَاحْدْ الصُّوتْ خَارْجْ مْنْ الرّْبْعَة دْ الْݣْرُونْ دْ الْمَدْبَحْ دْيَالْ الدّْهَبْ اللِّي قُدَّامْ اللَّهْ،

¹⁴وْݣَالْ هَادْ الصُّوتْ لْلْمَلَاكْ السَّادْسْ اللِّي هَازّْ الْبُوقْ: «فَكّْ الرّْبْعَة دْ الْمَلَايْكَة اللِّي مْكَتّْفِينْ حْدَا الْوَادْ الْكْبِيرْ اللِّي هُوَ الْفُرَاتْ».

¹⁵وْتّْفَكُّو الرّْبْعَة دْ الْمَلَايْكَة اللِّي كَانُو مْوَجّْدِينْ لْهَادْ السَّاعَة وْالنّْهَارْ وْالشّْهَرْ وْالْعَامْ، بَاشْ يْقْتْلُو التُّلُتْ دْيَالْ النَّاسْ.

¹⁶وْسْمَعْتْ بْلِّي كَانْ عَنْدْهُمْ مْيَتَايْنْ مْلْيُونْ دْيَالْ الْخْيَّالَة.

¹⁷وْهَكَّا شْفْتْ فْالرُّؤْيَا دْيَالِي الْخِيلْ رَاكْبِينْ عْلِيهَا الْخْيَّالَة: لَابْسِينْ ضْرَّاݣَاتْ لُونْهُمْ حْمَرْ بْحَالْ الْعَافْيَة، وْزْرَقْ بْحَالْ حْجَرْ سَفِيرْ، وْصْفَرْ بْحَالْ الْكْبْرِيتْ، وْرْيُوسْ الْخِيلْ بْحَالْ رْيُوسْ السّْبُوعَ، وْمْنْ فُمّْهُمْ كَتْخْرَجْ الْعَافْيَة وْالدّْخَّانْ وْالْكْبْرِيتْ.

¹⁸وْبْهَادْ التّْلَاتَة دْ الْمْصَايْبْ اللِّي هُمَ الْعَافْيَة وْالدّْخَّانْ وْالْكْبْرِيتْ اللِّي خَارْجِينْ مْنْ فَّامْ الْخِيلْ فْنَى التُّلُتْ دْيَالْ النَّاسْ.

¹⁹حِيتْ الْقُدْرَة اللِّي عَنْدْ هَادْ الْخِيلْ كَايْنَة فْفَّامْهُمْ، وْفْقْزَازْبْهُمْ، حِيتْ قْزَازْبْهُمْ كَيْشَبْهُو لْرْيُوسْ اللّْفَاعِي وْبِيهُمْ كَيْآدِيوْ.

²⁰وْالنَّاسْ اللِّي بْقَاوْ وْمَا مَاتُوشْ بْهَادْ الْمْصَايْبْ، ݣَاعْ مَا تَابُو عْلَى دَاكْشِّي اللِّي دَارْتْ يْدِّيهُمْ، وْبْقَاوْ كَيْعَبْدُو الشَّيَاطِينْ، وْالْأَصْنَامْ دْيَالْ الدّْهَبْ، وْالْفْضَّة، وْالنّْحَاسْ، وْالْحْجَرْ، وْالْخْشَبْ، اللِّي مَا كَيْقَدْرُو لَا يْشُوفُو وَلَا يْسَمْعُو وَلَا يْمْشِيوْ،

²¹وْمَا تَابُوشْ حْتَّى عْلَى الْقْتِيلَة، وْالسّْحُورْ، وْالْفْسَادْ، وْالسّْرْقَة دْيَالْهُمْ.