Read Mousgoum Pi zi tiki 1 Bible Online

Pi zi tiki 1 - Mousgoum bible

Pi zi tiki 1

¹War pi zi tiki, won hlai n’Alaw a za hlai a tika pini aŋ rga hlai n’amai gaiɗi yai ɗa,

²yai te nafu kadai nɵa, wala warɗi kai, gegeŋ a wa tini edi midini yem paŋ, smer na gdaŋ na mini Alaw par guvula amai midini yem.

³Nɵa Alaw a muɗa: Gaglai a za, gaglai a za lai.

⁴Alaw a tala ɓa gaglai ɗa a wala na pɗem, nɵa a ɓurwa gaglai edi sini gegeŋ par.

⁵Alaw a sini yiki wiini gaglai ɗa ɓa girvudi, wiini gegeŋ ɗa ɓa duvuk lai, koskoi ktai te za, gorof par ktai te za lai, hanɗa a mefeŋ n’avut.

⁶Alaw a muɗa: Wala ktai na gdaŋ ta a yima arbani yem n’amai gaini na azumai ɗa kaai, aŋ za ɓraw arbani.

⁷A za nɵa lai, Alaw a za wala hanɗa kapai a ɓurwa yem n’amai gaini n’azumai edi sini marni par.

⁸Alaw a sini yiki wiini wala hanɗa ɓa hlai n’amai. Koskoi te za, gorof par ta za lai, hanɗa a mefeŋ n’ag'aŋ sulu.

⁹Alaw a muɗa ɓa yem n’azumai a tapa war hlai ktai, a hina hlai ɗa a huula, a za nɵa lai.

¹⁰Alaw a sini yiki wiini hlai na huleŋ ɓa "afti", wiini yem-ra n’a tapa war hlai ktai ɓa "yem-ra n’abai". Alaw a tala hanɗa arni pɗem.

¹¹Alaw a muɗa: Afti paŋ a va gaini sugoi n’a guɗa, gaini evek na seyemni a sisiɗa viya, gaini luwuŋ n’a ali pinzibani kiini kiini, gaini na seyemni a na war alini zi wii dama, a za nɵa lai.

¹²Afti a diya sugoi na gaini gûɗi, evek na pinzibani kiini kiini viya sisiɗa pini seyemni gaini luwoŋai n’a wa alini gaini seyemni amlai war alini pinzibani kiini kiini lai. Alaw a tala ɓa hanɗa a pɗem.

¹³Koskoi te za, gorof par te za lai, hanɗa a mefeŋ n’ag'aŋ hu.

¹⁴Alaw a muɗa: Wazagai n’a za gaglai war hlai n’amai buri a ɓurwa arbaɗi girvudi gaini duvuk, kapai a za aŋ wala zi siŋki war kitini hlai zi fet, war piɵini mefeŋ gaini buza lai,

¹⁵Kapai a za aŋ wazagai n’a za gaglai warni hlai n’amai, a ŋala midini afti, a za maini nɵa.

¹⁶Alaw a za wazagai n’abakai n’a za gaglai sulu, n’abai arbani a sumna aŋ pai na girvudi, n’agwi a sumna aŋ pai duvuk, gaini meeɵek lai.

¹⁷Alaw a mulaŋ amai arbani hlai n’amai, aŋ za gaglai midini afti.

¹⁸Aŋ midini girvudi gaini duvuk, aŋ ɓurwa arbani gaglai gaini gegeŋ. Alaw a tala ɓa hanɗa a pɗem.

¹⁹Koskoi te za, gorof par te za, hanɗa a mefeŋ n’ag'aŋ puɗu.

²⁰Alaw a muɗa: Yem-ra a va gaini wazagai na karni, wala zi ɗufli a ɗufla arbani hlai n’amai, amai par midini afti.

²¹Alaw a rga wazagai na karni n’abakai na karni n’arni yem, wazagai na karni n’a na muguza paŋ pinzibani kiini kiini, n’a va arni yem paŋ gaini wazagai zi ɗufli zi baada, pinzibani kiini kiini lai. Alaw a tala ɓa hanɗa a pɗem.

²²Alaw a ɓakaŋ a muɗa: Ki bindi maswai, ki sisiɗi viya, ki vi yem war yem-ra n’abakai, wala zi ɗufli lai a bunda viya midini afti.

²³Koskoi te za, gorof par te za lai, hanɗa a mefeŋ n’ag'aŋ ɵim.

²⁴Alaw a muɗa: Afti a wa wazagai na karni pinzibani kiini kiini, wazagai na gaini ezini puɗu puɗu n’aha gaini n’edi buza gaini wazagai na karni n’agogoi n’a hidila, a za maini nɵa.

²⁵Alaw a za wazagai n’edi buza pinzibani kiini kiini, wazagai n’abakai n’aha pinzibani kiini kiini, wazagai n’agogoi n’a hidila azumai midini afti paŋ, pinzibani kiini kiini lai. Alaw a tala hanɗa arni pɗem.

²⁶Alaw a muɗa: Zumu ɗif maimu tumu nɵa, ziŋgani maimu tumu nɵa lai, kapai a ŋa midini hilif na warni yem-ra n’abai, midini wazagai zi ɗifli n’arbani hlai n’amai, midini wazagai n’ezini puɗu puɗu paŋ, midini afti paŋ, midini wazagai zi hidili na midini afti paŋ lai.

²⁷Nɵa Alaw a rga ɗif a ziŋga sini nɵa, a rgaŋ a ziŋga sini Ni Alaw nɵa, a rgiɗi ɗa wus gaiɗi muni.

²⁸Alaw a ɓikiɗi a miɗiɗi: Ki sisiɗi viya, ki bindi viya, ki vi midini afti, ki ŋi midini, hilif na war yem-ra n’abai, wazagai zi ɗufli n’arbani hlai n’amai gaini wazagai na karni na midini afti paŋ, aga ki simni aŋ paakai midini.

²⁹Alaw a muɗa: Tili, mu na siki evek na seyemni a na midiɗi yai paŋ, gaini luwuŋ paŋ, na seyemni a na war ali zi wii lai aŋ walaki zi simi.

³⁰Sugoi n’a guɗa, mu saŋ aŋ simi sini wazagai na midiɗi yai ɗa paŋ, sini wazagai zi ɗufli n’arbani hlai n’amai, sini wazagai na muguza midini afti, na gaini suŋfa warni paŋ, aga a za nɵa.

³¹Alaw a tala sdani n’a zaŋ, a tala arni pɗem gara. Koskoi te za, gorof par te za lai. Hanɗa a mefeŋ n’ag'aŋ ɵaara.