Read Mousgoum Pi zi tiki 11 Bible Online

Pi zi tiki 11 - Mousgoum bible

Pi zi tiki 11

¹Midini afti paŋ, ɗai e miɗi ɗa a seŋ ktai, e yiki wala maini marɗi ɵa lai.

²Amma mefeŋ ktai, ɗai e zûgi piɗi futi na dawai par sek, ɗai e nivi hlai na plas midini afti na Mezopotamiya, e simni woni.

³E miɗi arbaɗi marɗi: Hulumu, wumu brik, mu yuŋmu. Brik hanɗa, e zi sda gaini war balamni kriyit, asfalte aŋ kai kai na gaini siman n’a tapa arbani lai.

⁴E miɗi hulumu, mu rgumu fuŋ n’abai ktai gaini poriyo ktai na merfeŋni haa amai pini ɗugul ta. Hinumu yikumu a wa kapai e ɵurumu edi midini afti paŋ kai.

⁵Nɵa, EPIƊ-ƊAI a niyasi azumai aŋ tala fuŋ n’abai gaini poriyo n’alini Adam e ɗa rgiŋ ɗa.

⁶EPIƊ-ƊAI a muɗa: Tili nagai paŋ e ɗi ɗai ktai, seŋɗi zi miɗi ktai lai, hanɗa a sdaɗi n’avut, tiyana wala n’e rgiŋ warɗi aŋ ziŋ ɗa, wala ktai n’aga a ɗiliɗi aŋ kir kai.

⁷Hulumu, niyumu azumai, turlumu seŋɗi zi miɗi woni, kapai e ɵini miɗi marɗi kir kai.

⁸Woni par EPIƊ-ƊAI a ɵiriɗi edi midini afti paŋ, e ɗiyi sdani rgini fuŋɗi n’abai ɗa zaw lai.

⁹Buri nɵa, e siɗi yiki ɓa: Babel, buri EPIƊ-ƊAI a turla seŋ zi miɗi na midini afti paŋ woni. Pra a ɵiriɗi ɗai edi midini afti woni par lai.

¹⁰Pinzibani Sem a na maini nɵa: Sem a wa Arpaksad, buza sulu asakalni Yem n’abai par, won hlai ni buzani miya ɗaw.

¹¹Asakal n’a wa Arpaksad li, Sem a buza katawai miya ɵim, a wa ali na maɵagai gaiɗi na falakai lai.

¹²Arpaksad a za buza doogo doogo hu pi ɵim won hlai n’a wa Sela.

¹³Won hlai n’a wa Sela li, Arpaksad a za buza miya puɗu gaini hu. A wa ali na maɵagai gaiɗi na falakai lai.

¹⁴Sela a za buza doogo doogo hu won hlai n’a wa Eber.

¹⁵Asakal n’a wa Eber li, Sela a za buza miya puɗu gaini hu, a wa ali na maɵagai gaiɗi na falakai lai.

¹⁶Eber a za buza doogo doogo hu pi puɗu, a wa Peleg.

¹⁷Asakal n’a wa Peleg li, Eber a za buza miya puɗu gaini doogo doogo hu. A wa ali na maɵagai gaiɗi na falakai lai.

¹⁸Peleg a za buza doogo doogo hu a wa Rewu,

¹⁹Asakal n’a wa Rewu li, Rewu a za buza miya sulu gaini ɵeeŋe, a wa ali na maɵagai gaiɗi na falakai lai.

²⁰Rewu a za buza doogo doogo hu pi sulu a wa Serug.

²¹Asakal n’a wa Serug li, Rewu a za buza miya sulu gaini muguzak, a wa ali na maɵagai gaiɗi na falakai lai.

²²Serug a za buza doogo doogo hu a wa Nakor.

²³Asakal n’a wa Nakor li, Serug a za buza miya sulu, a wa ali na maɵagai gaiɗi na falakai lai.

²⁴Nakor a za buza caaɓa pi ɵeeŋe a wa Terah.

²⁵Asakal n’a wa Terah li, Nakor a za buza miya sulu gaini doogo pi ɵeeŋe, a wa ali na maɵagai gaiɗi na falakai.

²⁶Terah a za buza doogo doogo muguzak, a wa Abram, Nakor gaini Haran.

²⁷Pinzibani Terah a na maini nɵa: Terah a wa Abram, Nakor gaini Haran, Haran a wa Lot.

²⁸Haran a mra, buzani wuzani epini Terah, midini afti n’a wa woni, war Ur na wiiɗi kaldekai.

²⁹Abram gaini Nakor e mili falakai. Munini Abram yikiɗi Sarai, na wiini Nakor yikiɗi Milka, te ahini Haran, apiɗi Milka gaiɗi Yiska.

³⁰Sarai te nafu muɗaŋ ahiɗi kai.

³¹Terah a yima ahini n’Abram, tiyni na Lot n’ahini Haran gaini munini Abram n’ahini na yikiɗi ɓa Sarai, a hala gaiɗi edi midini afti na Ur na wiiɗi Kaldekai par, a hala midini afti na Kanaan. E cûsi war Harran e simni woni.

³²Terah a za buza miya sulu gaini ɵim, a mra war Harran.