Read Mousgoum Pi zi tiki 12 Bible Online

Pi zi tiki 12 - Mousgoum bible

Pi zi tiki 12

¹EPIƊ-ƊAI a miɗini wiini Abram: Tala edi midini aftiku par, edi arbaɗi pinzibaku par lai, edi war dalamni apuku par, midini afti n’aga mu sunkuŋku.

²Aga mu bunduku aŋ ziba n’abai, aga mu ɓukuku aga mu bunda yikuku abai, aga ku bunda aŋ ɓiki buriɗi na zamai ɗa paŋ,

³Aga mu ɓikiɗi nagai na e ɓukuku, mu tûsiɗi nagai n’e miisuku, war yikukun, pinzibaɗi ɗai na midiɗi yai paŋ aga e nivi ɓiki.

⁴Abram a hala maini n’EPIƊ-ƊAI a miɗiŋni nɵa, Lot a hala gaini lai. Abram a za buza doogo doogo muguzak pi ɵim won hlai n’a zogo edi war Harran par.

⁵A yimiti munini Sarai, ahi tawalni Lot, wazagai n’a navaŋ, gaiɗi bagakaini gaini faraini lai n’a naka tini war Harran par. E hili midini afti na Kanaan. E cûsi midini afti na Kanaan.

⁶Abram a vuga afti haa won hlai n’e yikiŋ ɓa: Sikem, haa sini luwuŋ n’abai na More. Kanaaniyakai lai e ɗifu midini afti ni ɗa.

⁷EPIƊ-ƊAI a siŋka sini arni Abram a muɗa: Afti hanɗa aga mu saŋ sini pinzibaku. Woni Abram a rga gûwiŋ zi ɓaka burini EPIƊ-ƊAI n’a siŋka sini arni.

⁸Woni par a zogo midiɗi huwuŋ na ɵimani Betel piɗi futi na dawai par, a pa gumuni arbaɗi Betel gaiɗi Ai, Betel piɗi futi na koskoi sek, Ai piɗi futi na dawai par lai. A rga gûwiŋ zi ɓaka woni burini EPIƊ-ƊAI, a yika Alaw ɓa: EPIƊ-ƊAI.

⁹Agwiya, agwiya, Abram a zogo siɗi Negev sek.

¹⁰Wiyamai n’amai te za midini afti, Abram a hala azumai Egipte buri a sumna woni, buri wiyamai te nafu midini afti.

¹¹Amma wuzani hlai n’e niyi aha war Egipte, a miɗiɗi wiiɗi Sarai na munini: Tala, mu sɗa ya tuku ku muni na juvi gara,

¹²nɵa won hlai na ɗai n’Egipte e tuluku li, aga e miɗi: Te munini sike! Aga e fiɗiŋa, tuku e hunuku karku,

¹³mu siiwuku ku miɗiɗi ɓa ku tawala kapai e ziŋa pɗem buriku, kapai buriku tuku lai mu sumna kara.

¹⁴Maini nɵa, won hlai n’Abram a cosi war Egipte, ɗai n’Egipte e tili munini te suwa juvi gara.

¹⁵Ɗai zi sda na wiini Faraw e tiliti, e kûliti ɵimani, e yimiti e kiti ahani.

¹⁶Buriɗi na, e zini pɗem wiini Abram, a nava haakai gaini adumai gaini ɵaakai, ablehökai na falakai gaini ɵigini lai.

¹⁷Amma EPIƊ-ƊAI a siŋkini gir n’abakai wiini Faraw gaini dalamni paŋ buriɗi Sarai na munini Abram.

¹⁸Faraw a yikasi Abram a miɗini: Na ku zaŋa ɵa na ɗa a maɗa? Ku muɗaŋa ɓa te muniku kai buri maɗa?

¹⁹Ku muɗaŋa ɓa te tawalku buri maɗa? Ta mu yimiti aŋ muniya, tiyana muniku te na, yimiti, hala wiiku.

²⁰Faraw a sa miɗi wiiɗi ɗaini buri e birgiŋ gaiɗi munini gaini wazagaini paŋ.