Read Mousgoum Pi zi tiki 13 Bible Online

Pi zi tiki 13 - Mousgoum bible

Pi zi tiki 13

¹War Egipte par Abram a hala amai a Negev, ni gaiɗi munini, gaini wazagaini paŋ, Lot a nafu gaini lai.

²Abram a nafu a ɗif zi farai gara, farani faraini viya, arzaŋni viya, orni viya lai.

³War Negev par a hala agwi agwi haa a Betel ta, haa won hlai n’a sumna ka woni avut, arbaɗi Betel gaiɗi Ai.

⁴Won hlai n’a rgasi ka gûwiŋ zi yi ɓaka gobi na woni ɗa, Abram a siiwa Alaw woni a yikaŋ ɓa: EPIƊ-ƊAI.

⁵Lot n’a nafu gaini Abram, ni lai a nafu gaini haakai, gaini adumai, gaini ɵaakai, gaini gumuni lai.

⁶Nagai e zi viya ta, faraiɗi a za viya ta lai, hlai a kiɗa a tikiɗi kir kai, hlai zi simi faraiɗi a tiɗiɗi kir kaalai.

⁷Kananiyakai gaiɗi Perizitekai lai e ɗifu midini afti ni paŋ, nɵa, hiy a niya arbaɗi ɗai zi giɗimi farai na Abram gaiɗi na wiini Lot.

⁸Abram a miɗini wiini Lot: A pɗem buri hiy a za arba gaiku tuku kai, arbaɗi ɗaiŋa zi giɗimi gaiɗi na wiiku kaalai, tumu, mu ɗumu ɗai ktai.

⁹Afti gaini abaini paŋ ɗa aŋ su wuzaku na su, a pɗem ɓa, mu ɓurwumu edi siɗi marmu par, na ɓa ku hala war gal n’azumai sek ɗa, ta mu hala wiya war gal n’amai sek, na ɓa ku hala war gal n’amai sek, ta mu hala wiya war gal n’azumai sek lai.

¹⁰Lot a yima arni amai a tala hlai na plas na wulani Yurdan ɗa paŋ a na dina haa a Suwar ta, hlai ni ɗa a naka maini zardeŋ na wiini EPIƊ-ƊAI nɵa, maini afti n’Egipte ɵa lai, wuzani hlai n’EPIƊ-ƊAI a tuura fuŋ n’abakai na Sodoma gaiɗi Gomora edi kai hai ɗa.

¹¹Lot a vara hlai na plas na wulani Yurdan, a zogo piɗi futi na dawai par, e ɓûrwi edi siɗi marɗi par.

¹²Abram a sumna war Kanaan, Lot a sumna war fuŋ n’abakai na midini hlai na plas na Yurdan, a pa gumuni haa a Sodoma,

¹³na ɗai na warni e ɗi ɗai na maafanai gara, e zi tuwur na meefeŋ sini EPIƊ-ƊAI gara lai.

¹⁴Asakal na Lot a ɓurwa edi sini Abram par li, EPIƊ-ƊAI a miɗini wiini Abram: Buri nɵa yima arku amai won hlai na k’aŋ woni na par, tala arku azumai sek, amai sek, piɗi futi na dawai par, piɗi futi na koskoi sek lai.

¹⁵Nɵa afti na ku talaŋ aŋ tukuna paŋ aga mu suŋku aŋ wiiku gaini pinzibaku lai haa kureɗ.

¹⁶Aga mu bunda pinzibaku viya maini kai kai na agoɗom nɵa haa dai dai na ɓa ɗif a kiɗa aŋ pɵa kai kai na agoɗom kai ɗa, a kiɗa a pɵa pinzibaku kaalai.

¹⁷Faka amai, gunasi afti pini mogoni gaini brukni lai, buri mu dara mu suŋku wiiku.

¹⁸Abram a zogosi gumuni, a sumna gobi ɵimani luwoŋai n’abakai z'alaw na Mamre, na gobi gaiɗi Hebron. A rga gûwiŋ zi yi ɓaka gaini EPIƊ-ƊAI woni.