Read Mousgoum Pi zi tiki 14 Bible Online

Pi zi tiki 14 - Mousgoum bible

Pi zi tiki 14

¹War mefeŋ na wiini Amrafel pai na Mezopotamiya, Ariyok pai na Ellasar, Kedorlaomer pai na Elam gaini Tideyal pai na Goyim

²paakai hanɗa e hitimi gaini Bera pai na Sodoma, Birsa pai na Gumura, Siniyab pai na Adma, Semeber pai na Seboyim gaini pai na Bela lai, a dara a muɗa: Pai na Sowar.

³Paakai na ɵim hanɗa e tipi siɗi war huduk na Sidim, n’e yikiŋ girna ɓa yem-ra n’abai zi manda.

⁴E ɗifu azumai pini Kedorlaomer haa buza doogo pi sulu, amma war buza n’ag'aŋ doogo pi hu, e fiki amai sini.

⁵War buza n’ag'aŋ doogo pi puɗu, nagai e ɗa azumai pini Kedorlaomer gaiɗi paakai na gaini, e hilisi e rɗi amai midiɗi ɗai na Refaiim war Asterot-karnaiim, e rɗi amai midiɗi Zuzitekai war Ham, midiɗi Emitekai war hlai na plas na Kiryataiim,

⁶E rɗi amai midiɗi Horitekai amai midiɗi huwuŋ na wiiɗi mal war Seyir, e tiki furi piɗi haa a El-paran edi mini basga na kaɗataŋ ta.

⁷Asakal par e wiyisi, e cûsi war Ein-Mispat na yikiɗi zamai ɗa ɓa: Kades, e fiɗiɗi Amalesitekai edi midini aftiɗi par, gaiɗi Amoritekai na war Hasason-Tamar ɗa lai.

⁸Nɵa pai na Sodoma, na Gumura, na Adma, na Seboyim, gaini na Bela lai, e niyisi anene gaiɗi askaraiɗi, e zizini siɗi aŋ hitimi gaiɗi war huduk na Siddim.

⁹Nagai e hitimi gaini pai Kedorlaomer na Elam, Tideyal na Goyim, Amrafel na Mezopotamiya, Ariyok na Ellasar lai; paakai ɵim e hitimi gaiɗi paakai puɗu.

¹⁰Huduk na Siddim ɗa, kalaŋ a nafu warni viya, war priɗi n’edi ɗa, pai na Sodoma gaini na Gumura e yiki woni, nagai n’e hini ɗa e pri amai sini huwuŋ lai.

¹¹Paakai n’e rɗi amai ɗa, e mili wazagaiɗi ɗai na Sodoma gaiɗi gumura paŋ, e mili wazagaiɗi zi simi paŋ lai, e fiki e hili.

¹²E yimi Lot n’ahini tawalni Abram, e mili wazagaini paŋ lai e fiki e hili gaini. Lot a nafu aha war Sodoma.

¹³Ɗif ktai n’a prasi edi a kinisi labar wiini Abram na hebre n’a sumna gobi ɵimani luwoŋai n’abakai na wiini Mamre na Amorit, na tawalni Eskol gaini Aner, nagai hu paŋ e ɗi ɗai na bonu ɗi gaini Abraham.

¹⁴Won hlai n’a ɵina ɓa e yimi ahini tawalni kai ɗa, tizaw tar a tipiɗi ɗaini zi sda n’e wii ahani, ɗai miya hu gaini doogo pi mitwis. A tika futi piɗi gawɗi haa a Dan ta.

¹⁵A ɓirwiɗi askaraini edi ta ta, kapai e cikiɗi gawɗi duvuk. A rɗa amai midiɗi, a tika futi piɗi haa a Hoba na te na war gal n’azumai par na tiɗi Damas.

¹⁶A wayasi wazagai n’e miliŋ ɗa paŋ, Lot n’ahini tawalni gaini wazagaini n’e miliŋ ɗa paŋ lai, falakai gaiɗi ɗai zamai zamai n’e yimiɗi lai.

¹⁷Asakal n’Abram a wayasi edi par war rɗi n’amai na midini Kedorlaomer gaiɗi paakai na pini, pai na Sodoma a halasi mini war huduk na Save, a dara a muɗa huduk na wiini pai.

¹⁸Melkeseɗek pai na Salem, a pai zi ɓaka na wiini Alaw n’amai n’amai, a kasi peŋ gaini vin,

¹⁹A ɓaka Abram a muɗa: Alaw n’amai n’amai n’a za hlai n’amai gaiɗi afti ɗa, a ɓaka Abram.

²⁰Kol sini Alaw n’amai n’amai, n’a siɗi gawku war tuku. Nɵa Abram a sini doogoni wazagaini n’a mulaŋsi mini gaw par paŋ.

²¹Pai na Sodoma a miɗini wiini Abram: Siɗiŋa ɗai ɗa ca, mula wazagai ɗa wiiku.

²²Abram a wiyini seŋ wiini pai na Sodoma, ta t'aŋ kaai amai pini EPIƊ-ƊAI, Alaw n’amai n’amai, n’a za hlai n’amai gaini afti lai,

²³koo aduzi, koo ɓa a sogom na midini harabak, jre zaŋ, aga mu tika wala ktai pini wazagaiku par kai, kapai dawai ɓa ku zaŋa aŋ ɗif zi farai ku tuku ɗa, mu ɗiya kai.

²⁴Mu tika wala ktai buriya kai, ku saŋa ɗa a simi na wiiɗi ɗaiŋa gaiɗi nagai n’e zi bonu gaya ɗa, Aner, Eskol gaini Mamre lai, nagai ɗa, wala n’e firiyiŋ aga e miliŋ wiiɗi kiiɗi.