Read Mousgoum Pi zi tiki 15 Bible Online

Pi zi tiki 15 - Mousgoum bible

Pi zi tiki 15

¹Asakalni wazagai hanɗa, EPIƊ-ƊAI a miɗini wiini Abram war wala zi siŋki maini nɵa: Abram, ku huna kai, aga mu za aŋ gamar na wiiku, vrakku aga a za abai lai.

²Abram a wiyini seŋ: Epiɗ-ɗai Alaw, n’aga ku saŋa ɗa a maɗa? Mu mrafuna ahiya kai, bulumŋa ɗa a hinafuna tini Eliyazar na Damas par koo.

³Abram a muɗa: Tala, ku saŋa pinziba kai, n’aga a mula bulumŋa hanɗa a ktai arbaɗi nagai na war dalamŋa.

⁴Nɵa EPIƊ-ƊAI a miɗini maini nɵa: Zaw kai, ni n’aga a mula bulumku ɗa, aga ku waŋ ku tuku mal.

⁵A kaŋsi anene, a miɗini: Tala hlai n’amai ɗa, pɵa meeɵek na warni ɗa, na ɓa ku kiɗa aŋ pɵaŋ ya ɗa, asakal a miɗini: Pinzibaku aga a za maini hanɗa ɵa lai.

⁶Abram a tika yimini midini EPIƊ-ƊAI, buri hanɗa EPIƊ-ƊAI a ŋaŋ aŋ jre ɗikat.

⁷A miɗini: Muta n’EPIƊ-ƊAI, na mu yumukusi edi war Ur na wiiɗi Kaldekai par, aŋ suku afti hanɗa aŋ wiiku.

⁸Abram a zilbaŋ: Epiɗ-ɗai Alaw aga mu sɗa ɓa aga mu navaŋ sini a maɗa?

⁹EPIƊ-ƊAI a miɗini: Ku piyitiŋa ahi ɵai na gunai buza hu, hiki na buza hu, adime na buza hu, mokokurai ktai gaini ahi dere n’agwi ktai lai.

¹⁰Abram a payasi wazagai hanɗa paŋ, a ɓasaŋ arba kal-kal kal-kal, a mula gal na sulu paŋ mini marni ca ca, amma a ɓurwa wazagai zi ɗufli ɗa kai.

¹¹Bagasakai a niyasi azumai midini wazagai zi fiɗi hanɗa, amma Abram a birgaŋ.

¹²Won hlai na futi te nawa li, weseŋ n’abai a yima Abram, hunai n’abai gaini gegeŋ na tekeɗim a wasi azumai midini Abram.

¹³EPIƊ-ƊAI a miɗini wiini Abram, ku yimaŋ muduku ɓa: Pinzibaku ɗa aga e simni aŋ zak midini afti na wiiɗi kai. Aga e siɗiɗi gir arɗi haa buza miya puɗu.

¹⁴Amma aga mu zitiɗi sariya wiini pinziba na e ɗika aŋ bagakaiɗi ɗa, aga e niyisi edi midini aftini par gaini wazagai tiɗi viya.

¹⁵Tuku aga ku mra, ku hala piɗi tamaiku war ɵeɗ, aga e puku warɗi wuli zi muluk

¹⁶War pinziba n’ag'aŋ puɗu, pinzibaku aga e wiyisi woni na, buri meefeŋ na wiiɗi Amonitekai a va amai pulmuɗuk kai ɓa.

¹⁷Won hlai na futi te nawa li, war gegeŋ, tili afu n’abai a na ya gaini elesni afu lai a vugasi arbani galni wazagai n’e fiɗiŋ ɗa.

¹⁸War mefeŋni, EPIƊ-ƊAI a za bonu gaini Abram a miɗini: Afti hanɗa aga mu saŋ sini pinzibaku, sini ra n’Egipte par haa sini ra n’abai na Öfrata par.

¹⁹Kenitekai, kenezitekai, Kadmonitekai,

²⁰Hititekai, Perizitekai, Refaiitekai,

²¹Amoritekai, Kanaaniyakai, Girgazitekai gaiɗi Yebuzitekai lai.