Read Mousgoum Pi zi tiki 16 Bible Online

Pi zi tiki 16 - Mousgoum bible

Pi zi tiki 16

¹Sarai munini Abram te wa ahi gaini kai, bagaiɗi ktai na Egipte par te nafu yikiɗi ɓa Hagar.

²Sarai te miɗini wiini Abram: Tala, EPIƊ-ƊAI a ɗalaŋa aŋ wii, nɵa ku hala siɗi bagaiŋa haw ablaŋtaŋkai n’aga ku nava ahi ktai ɗi ɗa. Abram a yima miɗi na wiiɗi Sarai ɗa.

³Buza doogo, asakal n’Abram a sumna aha war Kanaan, Sarai na munini te yimiti Hagar bagaiɗi n’Egipte par buri tie sitini aŋ muni wiini Abram na mafaɗi.

⁴A fana gaiɗi Hagar, te tika fel, won hlai na te tala siɗi te na ziya, te tiliti emini gezaɗi arɗi maini wala kadai nɵa.

⁵Sarai te miɗini wiini Abram: Tirki n’e ɗa tirkiŋa paŋ na ɗa a pɵa muduku, mu sutuku bagaiŋa muta, hlai na te tala siɗi te na ziya ɗa, mu tala arɗi maini wala kadai nɵa, EPIƊ-ƊAI a ziti sariya n’arba gaiku ɗa.

⁶Abram a wiyiɗi seŋ wiiɗi Sarai: Tala, bagaiku t'aŋ war spakku, za n’a tala arku pɗem siɗi. Sarai te ziɗi gir viyan, haa Hagar te pra edi.

⁷Sleŋ na wiini EPIƊ-ƊAI a niviti edi war basga ɵimani hlai zi liwi yem n’a na ɵamaɗi futi na Sur sek ɗa.

⁸A muɗa: Hagar, bagaiɗi Sarai, ku halasi wata par ɗa? Ku hala fu wata sek ɗa? Te wiyini seŋ: Mu prasi edi na ɗa wuzaɗi Sarai n’eminigeza.

⁹Sleŋ na wiini EPIƊ-ƊAI a miɗiɗi: Waya aha siɗi emin-gezaku ɗa, hiniti te zuku wiiɗi.

¹⁰Sleŋ na wiini EPIƊ-ƊAI a miɗiɗi: Aga mu bunda pinzibaku viya haa e siɗi aŋ pɵi kai.

¹¹Sleŋ na wiini EPIƊ-ƊAI a miɗiɗi: Tala, ku ziya tiyana, aga ku wa ahi na wus, aga ku sini yikini ɓa: Ismayel, a dara a muɗa: Alaw a ɵina buri EPIƊ-ƊAI a tala girku ya.

¹²Ahi hanɗa aga a za maini ablehö na basga nɵa, aga a hitima gaiɗi paŋ, ɗai paŋ e hitimi gaini ni paŋ, aga a sumna edi kiini siɗi tawalakaini par.

¹³Te sini yiki wiini EPIƊ-ƊAI n’a muɗa gaiɗi ɓa: El-Roy a dara a muɗa: Mu sɗa Alaw n’a talaŋa tiɓ ɗi?

¹⁴Pini hanɗa e yiki kalaŋ hanɗa ɓa: Kalaŋ na Lahai-Roy, a dara a muɗa: Kalaŋ na wiini Alaw na karni n’a talaŋa. A na arbaɗi Kades gaiɗi Bered.

¹⁵Hagar te wiini ahi wiini Aram su, Abram a sini yiki ɓa Ismayel wiini ahi hanɗa.

¹⁶Abram a za buza doogo doogo mitwis, won hlai na Hagar te wiini Ismayel ɗa.