Read Mousgoum Pi zi tiki 17 Bible Online

Pi zi tiki 17 - Mousgoum bible

Pi zi tiki 17

¹Won hlai n’Abram a za buza doogo doogo ɵeeŋe pi ɵeeŋe, EPIƊ-ƊAI a siŋka sini arni, a miɗini: Ta n’Alaw zi spak paŋ, ku paya ɗikat wuzani ara, ku hunaŋa edi kai.

²Aga mu za bonu arba gaiku, pinzibaku aga a sisiɗa viya

³Abram a kɵa azumai, a pa arni azumai, Alaw a haɗa kalaŋ gaini a miɗini:

⁴Ta ɗa, bonuŋa na gaiku ɗa a hanɗa: Aga ku bunda aŋ epini pinziba viya.

⁵Aga e yikuku gaini yiki na ɓa Abram kir kai, yikuku aga a bunda ɓa: Abraham, buri mu dara mu bunduku aŋ epini pinziba viya.

⁶Aga mu bunduku ku sisiɗa viya gara, zibaɗi ɗai viya aga e niyisi edi suku par, gaiɗi paakai lai.

⁷Aga mu za bonu arba gaiku, arba gaini pinzibaku n’asakal sek n’aga e niyisi edi suku par lai. A bonu n’aga a sumna haa kureɗ, gaini hanɗa aga mu bunda aŋ Alaw na wiiku, Alaw na wiiɗi pinzibaku n’asakal sek ɗa lai.

⁸Tiyana ɗa, ku na midini afti na Kanaan aŋ zak, amma aga mu suku afti hanɗa, wiiku gaini pinzibaku lai, a hina aŋ wiiki gamai, Ta aga mu bunda aŋ Alaw na wiiki lai.

⁹Alaw a miɗini wiini Abraham: Tuku aga ku giɗima bonu na wiya, asakalku sek, pinzibaku n’aga e niyisi edi suku par lai.

¹⁰Gadai na mu siŋki na kapai bonu n’arba gaiki a vada edi kai ɗa a hanɗa: Tuku gaiɗi pinzibaku n’asakal sek ɗa paŋ, ahi na wus paŋ ɗa a nava ɵini gûrgûle,

¹¹Aga ki ɵi gûrgle. Hanɗa aga a bunda aŋ wala zi siŋki na wiini bonu n’arba gaiki tiki.

¹²Ali na maɵagai na war pinzibaku paŋ, asakal n’e zi mefeŋ mitwis li ɗa, aga ku ɵiɗi gûrgle gaiɗi bagakai n’e wii aha war pakataiku, nagai na ku wûriɗisi edi par gaini farai ɗa paŋ n’e ɗi war pinzibaku kai.

¹³Bege n’a wa aha war pakataiku, zaw na ku wuraŋ gaini farai ɗi, sai ku ɵini gûrgûle. Bonuŋa aga a bunda war siki aŋ bonu n’a vada edi kai.

¹⁴Amma ni n’a ɵa gûrgûle kai, ahi na wus paŋ n’a ɵa gûrgûle kai, aga a ɓa edi arbaɗi ɗai par, buri a za pini gadai na wiini bonu na wiya kai.

¹⁵Alaw a miɗini wiini Abraham: Aga ku yikiti muniku na Sarai gaini yikiɗi na Sarai kir kai, buri yikiɗi aga a bunda ɓa: Sara.

¹⁶Aga mu ɓikiti, maa aga mu suku ahi gaiɗi ktai, aga te wa pinzibaɗi ɗai viya, paakaiɗi pinziba viya aga e niyisi edi siɗi par.

¹⁷Abraham a kɵa azumai, a pa arni azumai midini afti a riya, a muɗa war sini dama: Ɗif na buzani miya ɗaw a sɗa aŋ wa ahi kiɗi ɗi? Zaw Sara gaini buzaɗi na doogo doogo ɵeeŋe, te kiɗa aŋ wa ahi kiɗi ɗi?

¹⁸Abraham a miɗini wiini Alaw: Hina Ismayel a sumna karni wuzani arku, a kiɗaŋa ta!

¹⁹Amma Alaw a miɗini: Zaw kai, Sara na muniku aga te wuku ahi, aga ku sini yiki ɓa: Isaak, aga mu za bonuŋa gaini, a bonu n’a vada edi kai, gaini pinzibani n’asakalni sek.

²⁰Burini Ismayel ɗa, mu ɵina tuwiku ya, aga mu ɓakaŋ, aga mu sisiɗaŋ viya, aga mu bundaŋ viya a suwa, aga a wa paakai doogo pi sulu, aga mu bunda pinzibani abai.

²¹Amma aga mu za bonuŋa gaini Isaak, na Sara aga te wuŋku buza zamai ɗa, war sarti na maini hanɗa ɵa ɗa.

²²Won hlai n’Alaw a vada seŋni zi miɗi na gaini Abraham ɗa li, a yima warni amai.

²³Abraham a yima Ismayel n’ahini, gaiɗi bagakai n’e wii ahani, gaiɗi n’a wûriɗisi gaini farai, ali na maɵagai n’aha war dalamni paŋ a ɵiɗi gûrgle war mefeŋni dama maini n’Alaw a miɗiŋni nɵa.

²⁴Abraham a za buza doogo doogo ɵeeŋe pi ɵeeŋe won hlai n’a ɵa gûrgûle.

²⁵Ismayel a za buza doogo pi hu won hlai n’a ɵa gûrgûle.

²⁶Abraham gaini Ismayel n’ahini e ɵi gûrgûle war mefeŋ ktai.

²⁷Ɗai n’aha war dalamni paŋ, bagakai, n’e wii aha, zaw n’e wûriɗisi gaini farai edi par paŋ e ɵi gûrgûle gaini war mefeŋni lai.