Read Mousgoum Pi zi tiki 18 Bible Online

Pi zi tiki 18 - Mousgoum bible

Pi zi tiki 18

¹EPIƊ-ƊAI a siŋka sini arni Abraham, ɵimani luwoŋai n’abakai na wiini Mamre, won hlai n’a nafu mini gumuni dam, girvudi n’arba.

²A yima arni amai a tala ɗai hu ɵimani, won hlai n’a tiliɗi mini hlai na wiini gumu par a lawa miɗi, a hurga azumai wuzaɗi.

³A muɗa: Mu siiwuku Epin-geza, na ɓa a huyuku kai ɗa, ku vugasi ahaya ta na begeku ɗaw kai ɗi.

⁴A pɗem ɓa e kikisi yem agwi aŋ mi eziki edi, simni azumai pini luwuŋ hanɗa ca, siki amla agwi.

⁵Mu hala mu kasi wala zi simi agwi kapai a siki gdaŋ agwi wuzani hiliki na wuzaki sek buri ki vigisi mini magalani begeki ɗaw. E wiyini seŋ: Za maini na ku muɗaŋ ɗa nɵa.

⁶Abraham a purma aha a miɗiɗi wiiɗi Sara: Witaw, haɗa avudi na hiniŋ dai dai, n’a za gamla hu,

⁷Alawa edi arbani farani faraini a yimasi ahi ɵeŋ na neŋni kukufuk, a siŋni tini begeni a daŋsi witaw tar.

⁸Won hlai na simi a dasi li, Abraham a kaŋsi wuzaɗi morkokoi, a siɗisi fiyaw na maazilai gaini na hirnaŋ lai, e simi, won hlai ni Abraham a ɗiya ɵimani pini luwuŋ amai gaini ezini zaw.

⁹E miɗini: Sara na muniku t'aŋ wata ɗa? A waya seŋ te na amlai war gumu hanɗa.

¹⁰EPIƊ-ƊAI a miɗini pra: Aga mu wayasi war buza na wuzamu, war sarti na maini hanɗa nɵa, tala Sara na muniku aga te wa ahi. Kapai Sara te na zuɓura, mini min hlai na wiini gumu duɓani Abraham par zaw.

¹¹Abraham gaiɗi Sara e zi walakai ca, buzaɗi a suwa wii suwai, Sara ɗe daiɗi te vada vad lai.

¹²Sara te riya amlai warɗi dama te muɗa: Tiyana mu za wuli ta, kapai mu firiya mini feŋ na gaini wus ɗai ɗi? Pra, epin-geza maa a za wel gara ta.

¹³EPIƊ-ƊAI a zilba Abraham: Sara te riya buri maɗa? Te hiina ɓa te za wuli gara ta, te kiɗa aŋ wa ahi kir kai ɗa buri maɗa?

¹⁴Wala na gir gara n’aga a za gaini EPIƊ-ƊAI kai a na ɗi? Won hlai n’aga mu wayasi suku buza na wuzamu, war sarti n’aŋ gaini ɗiyi zaw, Sara aga te wa ahi.

¹⁵Sara te pa miɗi midini seŋ hanɗa te muɗa: Mu riya kai, buri hunai te yimiti. EPIƊ-ƊAI a miɗiɗi pra: A jre, ku riya ya.

¹⁶Ɗai e fiki amai aŋ hili, e bindi arɗi aha siɗi Sodoma sek, Abraham a hala gaiɗi aŋ kiɗi piɗi edi.

¹⁷EPIƊ-ƊAI a hiina a muɗa: Wala na mu firiya mu zaŋ ɗa aga mu ŋoyaŋ wuzani Abraham kai.

¹⁸Abraham aga a bunda aŋ pinziba n’abai, zi spak lai, burini pinzibaɗi ɗai na midini afti paŋ aga e nivi ɓiki.

¹⁹Buri mu varaŋ edi kapai a gidiɗi alini gaiɗi pinziba na duɓani sek ɗa paŋ aŋ ɵini pini EPIƊ-ƊAI, aŋ piyi war jre, war ɗikat, nɵa EPIƊ-ƊAI aga a va amai burini Abraham wala n’a ha midini.

²⁰Tuwi na ɗai e tûwi gaiɗi Sodoma gaiɗi Gumura ɗa a suwa gdaŋ gara, tuwurɗi ɗe a riya amai abai gara lai.

²¹Mu hala woni mu tala hlai haw, na ɗai ɗa e miɗiŋ na ɗa a na ɵa zaw, ɵa kai ɗi ɗa, kapai a yima mada.

²²Ɗai na sulu e hili woni par a Sodoma sek, Abraham a hina woni mini EPIƊ-ƊAI zaw.

²³A torosi sini a miɗini: A jre ɓa aga ku ɓa ɗif na jre ɗikat gaini ɗif na tuwur?

²⁴Ablaŋtaŋkai, na mu nuvuɗumu ɗai na jre ɗikat war fuŋ n’abai hanɗa doogo doogo ɵim ɗi? A jre ɓa aga ku vada fuŋ n’abai hanɗa edi ɗi? Aga ku hinaŋ buriɗi na doogo doogo ɵim na jre ɗikat kai ɗi?

²⁵Na ɓa ku zaŋ ɵa ɗa a tala pɗem kai, ku fuɗa ɗif na jre ɗikat gaini na tuwur ktai paŋ ɗa a za kai, na ɓa ku zaŋ li ɵa ɗa, ɓraw arbani n’arbani ɗif na jre ɗikat gaini na tuwur aŋ kai kai ɗi! Ni n’a ɗûkliti sariya wiiɗi ɗai na midiɗi yai paŋ ɗa aga a ɗiya midini jre kai ɗi?

²⁶EPIƊ-ƊAI a muɗa: Na ɓa mu nava ɗai na jrekai doogo doogo ɵim aha war Sodoma, aha war fuŋɗi n’abai ɗa tar, buriɗi nagai hanɗa aga mu hiniɗi meefeŋ na wiiɗi ɗai na warɗi paŋ.

²⁷Abraham a muɗa pra: Ta na mu nava wala ktai kai, mu firiya mu muɗuku seŋ ktai pra.

²⁸Na ɓa, ablaŋtaŋkai arbaɗi na jrekai na doogo doogo ɵim, ɵim e ɗi kai, buriɗi na ɵim hanɗa, aga ku tuura fuŋ n’abai hanɗa edi ɗi. EPIƊ-ƊAI a muɗa: Aga mu tuuraŋ edi kai, na mu nava li ɗai na jrekai doogo doogo puɗu pi ɵim ɗa.

²⁹Abraham a tika seŋ a miɗini: Ablaŋtaŋkai n’aga mu nuvuɗumu ɗai doogo doogo puɗu bas ɗi! EPIƊ-ƊAI a muɗa: Aga mu zaŋ kai, buriɗi na doogo doogo puɗu ɗa.

³⁰Abraham a muɗa pra: EPIƊ-ƊAI, mu na muɗa ɗai, ku za hiy kai, ablaŋtaŋkai woni, mu nuvumufuna ɗai doogo doogo hu ɗi! EPIƊ-ƊAI a muɗa: Aga mu zaŋ kai, na ɓa mu niviɗi ɗai na doogo doogo hu hanɗa li ɗa.

³¹Abraham a muɗa pra: Mu dara mu miɗini wiini EPIƊ-ƊAI pra: Ablaŋtaŋkai mu nuvumu fu na caaɓa ɗi! EPIƊ-ƊAI a muɗa: Buriɗi na caaɓa hanɗa aga mu tuuraŋ edi kai.

³²Abraham a waya pini ɗaai: EPIƊ-ƊAI a za hiy kai, mu dara mu muɗa azi n’asakal ktai lai, ablaŋtaŋkai e nivi funa doogo ɗi! Aga mu vadaŋ edi kai, buriɗi na doogo hanɗa.

³³Won hlai n’a vada seŋni na gaini Abraham ɗa li, EPIƊ-ƊAI a hala wiini, Abraham ɗe a wayasi ahani lai.