Read Mousgoum Pi zi tiki 19 Bible Online

Pi zi tiki 19 - Mousgoum bible

Pi zi tiki 19

¹Koskoi ɗai zi ɵeŋ na sulu e cû a Sodoma, Lot a nafu gaini simni azumai mini magalani fuŋ n’abai ɗa dam, a tiliɗi a faka amai a hala siɗi, a hurga azumai, a pa arni azumai midini afti.

²A muɗa: Na ɓa mu nava yum wuzani arki ɗa, ɗai n’abakai ki vigi ahani begeki par ɗaw kai ɗi! Ki fini woni na, ki mi eziki edi lai, gorof par aga ki hili wiiki wuzaki sek, amma e wiyini seŋ: Zaw kai, mi fini woni hlai na mi ɗi woni na ɗa.

³A siika miɗi haa e yimi seŋni, e vigisi ahani ɗaw, a diɗi simi, a ziɗi peŋ na gaini is arni kai.

⁴E fini maa azumai kai hai, ɗai na war fuŋ n’abai na Sodoma hanɗa, sini na agwiyeŋe par haa sini na wel ta, ɗai paŋ, ɗif ktai maa a hina edi kai, e gûni fuŋni Lot azumai gun.

⁵E yikisi Lot e miɗini: Ɗai n’e hilisi ahaku duvuk na ɗa e ɗi wata ɗa?

⁶Lot a niyasi anene siɗi mini magala, a ɵa mini hlai duɓani sek kaa,

⁷a muɗa: Ki zi barka, tawalakaya, ki zi wala na meefeŋ maini hanɗa nɵa kai.

⁸Aliya na falakai e ɗa sulu, n’e titimi wus kai hai ɓa, aga mu sɗikisi, ki zi siɗi paŋ maini na ki diri nɵa, amma ki zi wala siɗi ɗai hanɗa kai, buri ɓa e hilisi e simni ahaya.

⁹E wiyini seŋ: Faka edi miyi par, e miɗi: Arwai hanɗa a halasi gaini hili arbamu, a bunda zi hitrumu wazagai na pɗamai ɗa a ni maɵa ɗa? Zunumu meefeŋ wiini ni a suwa na wiiɗi ɗai hanɗa. E hûgi Lot gaini gdaŋ, e tûrisi goi gaini mini hlai kapai e hiɗiŋ,

¹⁰amma ɗai na sulu e wisi tiɗi e yimiɗi Lot aha siɗi, e ɵi mini hlai lai.

¹¹E ɗugûɗi arɗi ɗai n’e ɗifu mini hlai, sini n’agwiyeŋe par haa sini n’abai n’arbaɗi ta. E kiɗi e nivi mini magala kir kai.

¹²Ɗai na sulu e miɗini wiini Lot: Ɗif zamai n’aŋ woni na asiya ɗa? A suwulku ktai zaw, e ɗi aliku na mɵagai zaw, aliku na falakai ɗi? Walaku paŋ n’a na aha war fuŋ n’abai hanɗa ku zogoŋ edi woni na par.

¹³Buri tiyi mi diri mi tûûri fuŋ n’abai hanɗa edi, buri tuwi na ɗai e tûwi gaiɗi a suwa suwai wuzani EPIƊ-ƊAI. A ɵiniyisi buri mi tûriŋ edi.

¹⁴Lot a hala aŋ miɗiɗi wiiɗi sulagaini, nagai n’aga e miliɗi alini aŋ falakaiɗa a miɗiɗi: Ki zi witaw, ki niyi edi warni fuŋ n’abai hanɗa par uri EPIƊ-ƊAI aga a tuuraŋ edi, amma a tala arɗi sulagaini maini wala zi dawaŋ ɵa.

¹⁵Won hlai na hlai a sɗasi rum rum, ɗai zi ɵeŋ e siiki mini Lot e miɗini: Faka amai, yimiti muniku gaiɗi aliku na falakai na sulu n’e ɗa gaiku won na kapai ki siɗi aŋ mri buri meefeŋ na wiiɗi ɗai na war fuŋ n’abai hanɗa kai.

¹⁶Won hlai n’e tili ɓa a na guguza gara, ɗai na sulu e yimisi tini, e giɗiyiŋsi edi, ni gaiɗi munini gaiɗi alini na falakai na sulu, buri EPIƊ-ƊAI a nafu gaini hiinini haw burini. E yimiŋsi, e kiŋsi edi gaigai sini fuŋ par.

¹⁷Won hlai n’e ɗa kiini pini edi, e miɗini wiini Lot: Ka suku, na ɓa ku dara ku kora sunfaku ɗa, ku bundasi arku duɓaku kai, ku ɗiya woni hlai ktai midini afti hanɗa kaalai, lawa amai midiɗi huwuŋ kapai ku sɗa aŋ ɓa kai.

¹⁸Lot a wiyiɗi seŋ: Zaw kai, a sɗa aŋ za kai, mu siiwuku epin-geza,

¹⁹tala na begeku mu nava yum wuzani arku, tuku ku za pɗem sa abai gara, ku giɗima sunfaŋa, amma ta mu kiɗa aŋ lawa haa siɗi huwuŋ hanɗa wuzani gir n’a na halasi kapai a ɓaŋa kai ɗa, mu kiɗa kai.

²⁰Tala, fuŋ n’abai n’a na gobi hanɗa, hinaŋa mu lawa woni, a na agwi a kiɗa wala kai. Mu dara mu ŋoya sa woni, mu zilba na hlai na gob buri mu kora sunfaŋa.

²¹A wiyini seŋ: Tala, mu za yum hanɗa suku pra, aga mu tuura fuŋ n’abai na ku muɗaŋa gaini hanɗa edi kai.

²²Purma woni sek witaw tar, buri aga mu za wala kai haa ku vuga woni sek vug haw. Buri hanɗa e sini yiki wiini fuŋ hanɗa ɓa: Sowar.

²³Won hlai na Lot a niya aha war Sowar, futi te diyasi amai lai.

²⁴Nɵa, EPIƊ-ƊAI a hinasi faŋ z'afu gaini sufre a ɵaasi midiɗi Sodoma gaiɗi Gumura, faŋ hanɗa a halasi amai par, sini EPIƊ-ƊAI par.

²⁵A tuura fuŋ n’abai hanɗa, afti hanɗa paŋ, ɗai na warni paŋ, gaini wazagai n’a diya midini afti paŋ lai.

²⁶Munini Lot te bunda arɗi duɓaɗi, te bunda edi aŋ barai zi Manda.

²⁷Dawaini, Abraham a faka gorof a hala woni hlai n’a ɗiya wuzani EPIƊ-ƊAI woni.

²⁸A tala arni a Sodoma gaiɗi Gumura sek midini afti na ɵimani lai, a tala arni, a sɗa giyiŋ a n’a ha amai maini agiyiŋ na wiini dalam n’a na ya nɵa.

²⁹Amma won hlai n’Alaw a na tuura fuŋ n’abai na midini hlai hanɗa edi, midini a kɵa gaini Abraham, a yimasi Lot edi arbani gir hanɗa par, won hlai n’a na tuura fuŋ n’abakai na Lot a naka woni ɗa.

³⁰War Suwar par, Lot a niya amai midiɗi huwuŋ aŋ sumna woni gaiɗi alini na falakai na sulu n’e ɗa gaini. Hunai te nafu pini buri simni nanwar Suwar, buri nɵa gaiɗi alini na falakai na sulu e simni war waŋ na siɗi huwuŋ.

³¹Ahiɗi n’amai te miɗiɗi wiiɗi tawalɗi n’agwi: Apumu a za wel li, maini pini de na midini afti gaini hlaini nɵa, ɗif n’aga a tukumu aŋ kai,

³²hulumu, mu ciinumu apumu gaini wala zi ci, asakal par mu funumu gaini kapai mu wunumu pinziba.

³³E sini wala zi cini wiini epiɗi koskoi ni ɗa, ahini n’amai te fana gaini, feŋɗi n’azumai mini gaini fikiɗi n’azumai mini par, Lot a sɗaŋ duk kai.

³⁴Nɵa dawaini, ahini n’amai te miɗiɗi wiiɗi tawalɗi n’agwi: Tala, duvukŋa, mu fana gaini apumu, cinuŋmu girna pra, ku hala ku fana gaini lai. Nɵa aga mu wumu alini n’e pɵi war pinzibani apumu.

³⁵Duvuk hanɗa pra e sini wala zi ci wiini epiɗi, ahini n’agwi te hala te fana gaini, feŋɗi n’azumai mini gaini fikiɗi n’azumai mini par, Lot a sɗaŋ duk kai.

³⁶Alini Lot na falakai na sulu e yimi amuli gaini epiɗi.

³⁷N'amai te wa ahi, te sini yiki ɓa: Mowab, apiɗi ziba na Mowab na girna.

³⁸N'agwi lai te wa ahi, te sini yiki ɓa: Ben-Ammi, epiɗi pinzibani Ammon na girna ɗa lai.