Read Mousgoum Pi zi tiki 2 Bible Online

Pi zi tiki 2 - Mousgoum bible

Pi zi tiki 2

¹Alaw a vada rgini hlai n’amai gaiɗi yai gaini wazagai na warni paŋ lai maini hanɗa nɵa.

²War mefeŋ n’ag'aŋ muguzak ɗa Alaw a vada sdani n’a zaŋ ɗa paŋ woni, a ɗiya sdani n’a na zaŋ paŋ war mefeŋ ni ɗa.

³Alaw a ɓaka mefeŋ n’ag'aŋ muguzak, a varaŋ edi aŋ wiini, buri a ɗiya sda na Ni dama a zaŋ ɗa woni, a hina sini amla.

⁴Hlai n’amai gaiɗi yai, war pi zi tiki a zasi maini nɵa: War mefeŋ n’Epiɗ-ɗai Alaw a ziti yai gaini hlai n’amai ɗa,

⁵koo luwuŋ n’agwi tekeɗeɗi edi tiɓ war vuwai aŋ kai, evek n’edi war vuwai ktai maa a diya kai, Epiɗ-ɗai Alaw a hina faŋ aŋ ɵa midiɗi yai kai ɓa, pra buri ɗif na kapai a hirma afti aŋ kaalai.

⁶Amma yem ktai a liiwasi azumai arni afti par, a kikina midini afti paŋ;

⁷Nɵa Epiɗ-ɗai Alaw a rga ɗif gaini alogodo n’amlaŋsi azumai arni afti par, a yiba smer na sa suŋfa war merfeŋni, kapai ɗif a bunda aŋ wala na karni.

⁸Epiɗ-ɗai Alaw a pa luwoŋai war zardeŋ Eden, piɗi futi na dawai par, a tika ɗif n’a rgaŋ ɗa warni.

⁹Epiɗ-ɗai Alaw a hina luwoŋai n’a tala juf gara, gaini n’a suma pɗem lai a diya amai midini afti. A hina luwuŋ zi suŋfa gaini luwuŋ zi siɗi wala na pɗem gaini na meefeŋ lai a ɗiya amlai arbani zardeŋ.

¹⁰Ra ktai a ɓasasi edi warni Eden par, a ka pini luwoŋai, midini n’edi sek ɗa a ɓurwa puɗu.

¹¹Na ktai yikini: Pison, a ni n’a guna hlai na Havila na or aŋ warni azumai ɗa.

¹²Or na war hlaini par a na gaini futini ɗa, luwoŋai n’a luguza pɗem gaini ali-fuŋ onikse aŋ war hlai ni lai.

¹³N'ag'aŋ sulu e yikiŋ ɓa: Gihon, a ni n’a guna afti na wiini Kus azumai ɗa.

¹⁴N'ag'aŋ hu e yikiŋ ɓa: Tigre, a ni n’a ka tiɗi Asur piɗi futi na dawai par sek. N'ag'aŋ puɗu ɗa yikini Öfrata.

¹⁵Epiɗ-ɗai Alaw a yimasi ɗif a tikaŋ war zardeŋ Eden kapai a hirmaŋ lai, a giɗimaŋ lai.

¹⁶Epiɗ-ɗai Alaw a sini gadai wiini ɗif a miɗini: Ku kiɗa ku suma luwuŋ na war zardeŋ hanɗa paŋ,

¹⁷amma luwuŋ n’a sa siɗi midini pɗem gaini meefeŋ ku sumaŋ kai, buri mefeŋ na ku sumaŋ li ɗa aga ku mra jre jre.

¹⁸Epiɗ-ɗai Alaw a muɗa: Ɗif a sumna kiini ɗa pɗem kai, aga mu zitini zinai na te kata mini.

¹⁹Epiɗ-ɗai Alaw a rga wazagai n’edi buza paŋ, gaini wazagai zi ɗufli n’arbani hlai n’amai paŋ gaini afti. A kaŋsi sini ɗif kapai a tala maɵa ɗa aga a sini yiki, kapai wazagai na karnin paŋ a nava yiki na ɗif aga a siŋni.

²⁰Ɗif a sini yiki wiini farai n’aha paŋ, wiini wala zi ɗufli n’arbani hlai n’amai ɗa paŋ, wiini wazagai n’edi buza paŋ lai. Amma burini Ni dama a niviti zinai na te kata mini gaini futini kai.

²¹Nɵa Epiɗ-ɗai Alaw a hina weseŋ n’abai a yima ɗif, a tikiti heruwiini ktai edi, a neŋ war balamni ɗuk.

²²Epiɗ-ɗai Alaw a binditi hiruwi n’a tikitisi sini ɗif par aŋ muni, a kitinisi lai.

²³Ɗif a ɗuula a muɗa: Haai, daaba, tiyana ɗif na maya ta ɵa a na kiɗi, te keɵke na sa mal, te neŋ sa mal lai, aga e yikiti ɓa "muni", buri te yimasi edi sini wus par.

²⁴Buri nɵa ɗif aga a hina epini gaiɗi emini edi, a tapa gaiɗi munini, aga e bindi aŋ neŋ-si ktai.

²⁵Ɗif gaiɗi munini e ɗifu gaini sulogoiɗi paŋ ganala, e zi siyer wuzaɗi marɗi kai.