Read Mousgoum Pi zi tiki 21 Bible Online

Pi zi tiki 21 - Mousgoum bible

Pi zi tiki 21

¹EPIƊ-ƊAI a ziɗi pɗem wiiɗi Sara maini n’a muɗaŋ ɗa nɵa, a za siɗi pini ɵinini-ha n’a ziŋɗi.

²Te tika fel war wuliɗi, te wiini ahi wiini Abraham war mefeŋ n’Alaw a miɗiɗi midini.

³Ahi na Sara te wiŋni ɗa Abraham a sini yiki ɓa Isaak.

⁴A ɵini gurgle wiini Isaak, won hlai n’a za mefeŋ mitwis, maini n’Alaw a miɗiŋni nɵa.

⁵Abraham a za buza miya ɗaw, won hlai n’a wa Isaak.

⁶Sara te ɗuula te muɗa: "Alaw a zaŋa aŋ wala zi yewere, asiya ɗi paŋ n’a ɵina seŋ hanɗa li ɗa aga a riya pa".

⁷Te muɗa pra: Ɗif n’a kiɗa a miɗini wiini Abraham ɓa mefeŋ ktai Sara aga te sa fiyaw mini ahiɗi asiya ɗa? Paŋ ktai, mu wiini ahi ktai war welni.

⁸Ahiyagwi a za daidai, Sara te cakaŋ edi min fiyaw par. Mefeŋ n’e cikiŋ edi, Abraham a ziti fet n’amai.

⁹Sara te tala ahi na Hagar, na Egipte par te wiiŋni wiini Abraham a na ɵa dawaŋ gaini Isaak.

¹⁰Te miɗini wiini Abraham, "birgiti bagai hanɗa edi gaini ahiɗi paŋ" buri ahiɗi bagai hanɗa a mula bulum gaini ahiya na Isaak ɗa kai.

¹¹Abraham a bunda gaini hiy n’abai burini seŋ hanɗa, buri Ismayel ɗa a ahini lai.

¹²Amma Alaw a miɗini: "Ku za hiy burini arwagwi gaiɗi bagaiku kai. Yima seŋ paŋ na Sara te muɗuŋku ɗa. Buri pinziba n’aga a ka yikuku wuzani a halasi sin Isaak par.

¹³Amma burini ahiɗi bagai ɗa, aga mu sini pinziba lai, buri ni a pinzibaku.

¹⁴Abraham a faka amai gorof, a mula peŋ, a tikiti agulai zi yem lai, a siŋɗi wiiɗi Hagar. A tikiɗi arwagwi amai wulaɗi, a tikiɗi piɗi. Te hala, te hina edi war basga na kaɗataŋ na Berseba blaŋ aŋ giliŋi.

¹⁵Won hlai na yem na warɗi agulaiɗi a vadali, te bula arwagwi azumai pin kukuɓ ktai su;

¹⁶asakal par te hala te sumnasi edi par dam, arbaɗi daidai luwiiɗi ɓurwi zi ɵiɓi ta. Buri te hiina warɗi maini nɵa "a pɗem ɓa mu tala mrini ahiya ɗa kai". Te sumna azumai dam, te tuwa gaini wulaɗi amai.

¹⁷Alaw a ɵina wulani arwagwi, amai war fuŋni par Sleŋ na wiini Alaw a yikitisi Hagar, a zilbiti: Hagar a zuku ɗa a maɗa? Ku huna kai, buri Alaw a ɵina wulani arwagwi won hlai n’aŋ won na ɗa,

¹⁸Faka amai, yima arwagwi amai, yima tini, buri mu zaŋ fu aŋ pinziba n’abai.

¹⁹Alaw a miliɗi arɗi edi, te tiliti kiliŋi zi yem tiɓ. Te hala te vitisi agulai gaini yem, te sini wiini arwagwi ɗa.

²⁰Alaw a za gaini arwagwi hanɗa, a wula amai, a sumna edi war basga na kaɗataŋ, a ɗif zi ɵiɓi ɓaraw.

²¹A sumna edi war basga na kaɗataŋ na Paran, emini te tikitini muni na midini afti na Egipte par.

²²Paŋ ktai, war mefeŋ hanɗa, Abimelek gaini Pikol n’abaiɗi askaraini a miɗini wiini Abraham: Alaw a na gaiku war wazagai na ku zaŋ paŋ.

²³Haŋa wala muku gaini Alaw tiyana won na, ɓa aga ku za wala na meefeŋ sa kai, siɗi aliya kai, sini pinzibaŋa kaalai. Aga ku za pɗem sa ta, sini afti na ku sumna midini ɗa, kal kal maini na mu zaŋ suku tuku nɵa.

²⁴Abraham a wiyini seŋ: Gaini Alaw jaŋ.

²⁵Mefeŋ ktai, Abraham a yika miɗiɗi ɗaini Abimelek zi sda, wuzani Abimelek buri kiliŋini n’e tikiti tini gaini gdaŋ,

²⁶Abimelek a muɗa: "Mu sɗa ni n’a za hanɗa kai, ku muɗaŋa gai seŋ hanɗa kai, ta ɗi, mu ɵinaŋ na girna hai".

²⁷Abraham a mula hakai gaini adumai gaini ɵaakai lai, a siŋni wiini Abimelek, gai suliɗi e zi bonu arbaɗi.

²⁸Abraham a mula adumai muguzak na war farani par, a mulaŋ edi kiini.

²⁹Abimelek a miɗini wiini Abraham: Adumai na muguzak na ku mulaŋ edi kiini hanɗa, sdani ɗa a maɗa?

³⁰Abraham a wiyini seŋ: "Adumai na muguzak hanɗa, mu suŋku wiiku, kapai a za aŋ wala zi zaida buriya ɓa mu ɓiliti kiliŋi hanɗa muta".

³¹Buri nɵa e yiki hlai hanɗa ɓa Beer-Seba, buri ɓa nagai na sulu e hi wala miɗi wiiɗi marɗi woni.

³²E zi bonu gaiɗi marɗi a Beer-Seba. Abimelek gaini Pikol n’abaiɗi askaraini e fiki e wiyi midini afti na wiiɗi Filistrekai.

³³A pa luwuŋ Tamaris a Beer-Seba, woni a siiwa Epiɗ-ɗai Alaw n’avadakai gaini yiki na ɓa EPIƊ-ƊAI.

³⁴Abraham a sumna midini aftiɗi Filistrekai buza viya.