Read Mousgoum Pi zi tiki 22 Bible Online

Pi zi tiki 22 - Mousgoum bible

Pi zi tiki 22

¹Paŋ ktai, asakal wazagai hanɗa par, Alaw a titima yimi na wiini Abraham a miɗini: Abraham! Abraham a wiyini seŋ: "Mu na"

²Alaw a waya a miɗini: "Yima ahiku na ktai, Isaak na ku daraŋ gara ɗa. Hala midini afti na Moriya, woni ku zaŋa ɓaka zi yi gaini, midiɗi huwuŋi n’aga mu suknutuku".

³Abraham a faka amai gorof, a rga wazagaini amai duɓani ablehoini, a mula gawlakai zi sda gaini sulu, a yima Isaak n’ahini pini; a ɓasa luwuŋ na wiini ɓaka zi yi lai, a hala war hlai n’Alaw a siŋkiŋni.

⁴War mefeŋ n’ag'aŋ hu, Abraham a yima arni amai, a tala hlai hanɗa edi gaigai par.

⁵Abraham a miɗiɗi wiiɗi galakai na pini: Simni ka won na ca gaini ablehoi ɗa. Ta gaini ahiya mi hili amai na ta aŋ hûrgi azumai wuzani Alaw, aga mi wiyisi siki.

⁶Abraham a tika luwuŋ zi yi na wiini ɓaka zi yi, a tikiŋni midini Isaak n’ahini ta, a tika afu gaiɗi muguɗi tini, gai suliɗi e hili piɗi marɗi.

⁷Isaak a miɗini wiini Abraham n’epini ɓa: "Apa", Abraham a wiyini seŋ ɓa: Ahiya mu na ɵina" Isaak a miɗini: Afu gaini luwuŋ zi yi aŋ tumu, ahiɗi adumi na buri ɓaka zi yi ɗa aŋ wata ɗa?

⁸Abraham a wiyini seŋ ɓa: Ahiya, Alaw gai midini dama aga a sumu ahiɗi adumi zi ɓaka zi yi ɗa. Gai suliɗi e hili wuzaɗi piɗi marɗi.

⁹Won hlai n’e gi won hlai n’Alaw a siŋkiŋni ɗa, Abraham a rga gûwiŋ zi yi ɓaka woni, a zizina luwuŋ zi yi azumai pini ta ta. A nava tini Isaak n’ahini gaini ezini lai, a fanaŋ amai midini gûwiŋ zi yi ɓaka ɗa, amai par midini luwuŋ waŋ.

¹⁰Abraham a wa tini, a tikitisi muguɗi, kapai a ɵa wulani ahini.

¹¹Nɵa, Sleŋ na wiini EPIƊ-ƊAI a yikaŋsi amai par: "Abraham, Abraham", Abraham a waya seŋ a muɗa: "Mu na ɵina"

¹²Ɗif zi ɵeŋ a miɗini: "Ku tika tuku sini arwagwi kai, ku za wala ktai sini kai, buri tiyana mu sɗa ɓa ku huna Alaw, ku bula edi aŋ saŋa ahiku na ketekeɗik kaalai".

¹³Abraham a yima arni amai, a ɵa arni, a tala adime duɓani par, arbani kukuɓ, moikni gai ɵûwi ɵew, a hala a yimaŋsi, a za ɓaka zi yi gaini war balamni ahini.

¹⁴Abraham a sini yiki wiini hlai hanɗa ɓa "EPIƊ-ƊAI a sɗa" haa girna ɗai e hini e miɗi ɓa "Amai midiɗi huwuŋ na wiini EPIƊ-ƊAI ɗa, ɗai aga e siɗi EPIƊ-ƊAI.

¹⁵Sleŋ na wiini EPIƊ-ƊAI a yikasi Abraham amai par, azi n’ag'aŋ sulu pra

¹⁶a miɗini: "Mu huku ma gaini sa dama, a miɗi na sini EPIƊ-ƊAI par, buri ku za wala na mu muɗuku midini, ku bula edi sa gaini ahiku na ketekeɗik kai ɗa,

¹⁷aga mu ɓukuku, aga mu bunda pinzibaku kal kal maini meeɵek n’arbani hlai n’amai gaini kai kai n’agoɗom war yem-ra n’abai nɵa. Pinzibaku aga e mili fuŋ n’abakai na wiiɗi gawɗi.

¹⁸Pinzibaɗi ɗaiŋa midiɗi yai paŋ aga e nivi ɓiki buriɗi, buri ɓa tuku ku ɵina ma".

¹⁹Abraham a waisi siɗi gawlakai, e fiki e hili piɗi marɗi a Beer-Seba. Abraham a za fuŋ woni.

²⁰Amma asakal wazagai n’aza hanɗa par, e kinisi labar wiini Abraham ɓa Milka kaw te wiini ali na maɵagai wiini Nakor na tawalni ca.

²¹Ahini n’avut yikini ɓa: Us, gaini Buz na tawalni gaini Kedmuwel n’epini Aram,

²²Kesed, Hazo, Pildas, Yidlaf gaini Betuwel.

²³Betuwel a wûti Rebekka lai. Hanɗa e ɗi ali na mitwis, na Milka te wiiɗini wiini Nakor na tawalni Abraham ɗa.

²⁴Marmaini na yikiɗi ɓa Rewuma te wa ali lai. Yikiɗi maini nɵa: Teba, Gaham gaini Maaka.