Read Mousgoum Pi zi tiki 24 Bible Online

Pi zi tiki 24 - Mousgoum bible

Pi zi tiki 24

¹Abraham a za wel kroh kroh, EPIƊ-ƊAI a ɓakaŋ war wazagai paŋ.

²Abraham a miɗini wiini ɗifni zi sda, n’abai arbaɗi nagai n’e ɗa war dalamni, na gɗamni wazagaini paŋ aŋ war tini: Wa tuku azumai pini ɓalakŋa,

³"Haŋa wala muku gaini Epiɗ-ɗai Alaw n’a za hlai n’amai gaiɗi yai lai ɓa aga ku tikitini muni wiini ahiya arbaɗi Kanaaniakai na mu sumna arbaɗi hanɗa kai.

⁴Amma aga ku hala midini aftiŋa, arbaɗi ɗaiŋa, aŋ tikitinisi muni wiini Isaak n’ahiya".

⁵Ɗif zi sda a wiyini seŋ: Ablaŋtaŋkai, muni hanɗa aga te ɗiya kai aŋ halasi gaya midini afti na mu ɗumu woni ɗa, kapai mu ka ahiku midini afti na ku halasi woni par ɗi?

⁶Abraham a wiyini seŋ: "Zaw kai, ku za haŋgal, ku ka ahiya woni kai.

⁷Epiɗ-ɗai Alaw n’amai, n’a yimaŋasi ahani apa par, midini afti na wiiɗi ɗaiŋa par lai, n’a muɗa gaya, a ha wala mini lai ɓa: Aga mu sa afti hanɗa wiini pinzibaku ɗa, Alaw Ni ɗa aga a ɵina ɵeŋni wuzaku, woni par aga ku tikitisi muni wiini ahiya.

⁸Na ɓa muni te dara aŋ halasi puku kai, wala na ku haŋa muku hanɗa a pɵa muduku kai, amma ku ka ahiya woni sek kai.

⁹Ɗif zi sda a wûti tini azumai pini ɓalakni Abraham n’epin-gezani, a ha wala mini burini seŋ hanɗa lai.

¹⁰Ɗif zi sda a mula arbani ɵigini na wiini epin-gezani par doogo, a hala. A mula wazagai na zafai na wiini epin-gezani paŋ pini. A faka buri a hala war Mezopotamiya n’amai, war fuŋ n’abai na wiini Nakor.

¹¹Won hlai na futi koskoi te za li, war piɵiɗi futi na falakai e hilisi aŋ bili yem woɗi, gobi ɵimaɗi kiliŋi, anene duɓani fuŋ n’abai par a fana ɵigini azumai midini kurnaini.

¹²A muɗa: Epiɗ-ɗai Alaw na wiini epin-geza Abraham, hinaŋa aŋ nava wala na mu halasi pini girna jek kai ɗi! Siŋkaŋa marmai n’arbaku gaini epin-geza Abraham ta kai ɗi!

¹³Tala mu na zaw ɵimaɗi kiliŋi na, aliɗi ɗai na war fuŋ n’abai hanɗa par na ɓulamai aga e niyisi anene aŋ bili yem.

¹⁴Nɵa ɓulumi n’aga mu muɗa siɗi ɓa "Yimaŋasi miɗi arginiku azumai, mu ca yem, na te wayaŋa li seŋ ɓa ca, aga mu sini wiini ɵiginiku lai, te na na ku siti wiini ɗifku zi sda Isaak". War hanɗa aga mu sɗa ɓa ku za pɗemku li sini epin-geza Abraham.

¹⁵A vada gaini seŋni zi miɗi kai hai, won hlai na Rebekka, n’ahini Betuwel, n’ahiɗi Milka na munini Nakor, na tawalni Abraham, te niyasi anene gaiɗi argini amai wulaɗi ta.

¹⁶Ɓulumi hanɗa te zuva gara won hlai na ku tiliti, tre ɓulumi na te fana gaini wus kai hai. Te niyasi azumai miɗii kiliŋi, te viti arginiɗi, te waya amai.

¹⁷Ɗif zi sda a lawa siɗi a zilbiti, ku za barka, saŋa yem zi ci agwi warɗi arginiku par.

¹⁸Te wiyini seŋ: Ca, epin-geza, te yimitisi arginiɗi azumai witaw kapai te sini tem aŋ ca.

¹⁹Won hlai na te vada gaini yem zi ci na wiini ya, te muɗa: Zliginiku lai aga mu bilini yem haa a ca midiɗi saini.

²⁰Te purma witaw aŋ ma yem n’aŋ warɗi arginiɗi azumai war palkaw, te lawa miɗi kiliŋi pra aŋ bulasi zamai pra pra, burini ɵiginini kafa.

²¹Ɗif hanɗa a sumna hiyak, a tala gaini arni, a zilba sini ɓa: EPIƊ-ƊAI, a vitiŋa amai na ɗa te morkoiŋa tiɓ zaw, te na kai ɗi?

²²Won hlai na ɵigini a vada gaini yem zi ci paŋ, ɗif a tika adoŋo zi or na gumani gram ɵaara gaini kiya na wulani ti zi or sulu na gumani gram miya ɗaw ɗaw.

²³A zilbiti: K'ahini asiya ɗa? Za barka, muɗaŋa, na ɓa war dalamni apuku ɗa, mi kiɗi aŋ nivi hlai zi feŋ ya ɗa?

²⁴Te miɗini: M'ahini Betuwel, ahi na Milka te wiŋni wiini Nakor.

²⁵Asakal par te miɗini: Kuzum gaini dakdari ahaɗi a na viya. Hlai zi feŋ na buriku a na lai.

²⁶Ɗif a pa kurnaini azumai, a hurga azumai wuzani EPIƊ-ƊAI,

²⁷a muɗa: "Kol sini Epiɗ-ɗai Alaw na wiini epin-geza Abraham, Ni na pɗemni gaini jreni a hina epin-geza edi kai, a ɵa wuza war morkoyŋa, a kaŋa haa ahaɗi tawalakaini epin-geza ta.

²⁸Ɓulumi te lawa, te ka labarni wala n’a za ahaɗi emiɗi.

²⁹Rebekka, tawalɗi na wus a nafu, yikini ɓa Laban. Alawasi anene mini ɗif zi sda na wiini Abraham miɗi kiliŋi.

³⁰Won hlai na tala adoŋo gaini kiya na wulani tiɗi tawalni, won hlai n’a ɵina miɗi miɗi Rebekka na tawalni ɓa a muɗaŋa maini nɵa lai, a hala mini ɗif na gaini ɵigini n’aŋsi edi miɗi kiliŋi ɗa.

³¹A miɗini: "Halasi, tuku zi ɓiki na wiini EPIƊ-ƊAI, ku ɗiyasi anene won ɵa buri maɗa? Mu zizina hlai na pɗem burini ɵigini ɗa ya.

³²Ɗif a niya aha war dalam, a pla wazagai na duɓani ɵigini azumai. E sini kuzum gaini dakdari wiini ɵigini, yem zi mi azi wiini ni gaiɗi marni na gaini lai.

³³E sini wala zi simi amma a muɗa: Mu kiɗa aŋ suma wuzani hlai na mu vada gaini seŋ n’aŋ ma buri mu muɗaŋ siki kai. E wiyini seŋ: Muɗa.

³⁴A tika pini a muɗa: Ta mu ɗif zi sda na wiini Abraham.

³⁵EPIƊ-ƊAI a ɓaka epin-geza haa a bunda aŋ ɗif n’abai. A sini adumai gaini ɵaakai, arzaŋ gaini or, ɗai zi sda na maɵagai gaiɗi na falakai, ɵigini gaini ablehökai lai viya.

³⁶Sara na munini epin-geza, te wiini ahi war wûliɗi. Epin-geza a sini bulumni paŋ war tini.

³⁷A muɗaŋa buri mu hini wala ma ɓa aga mu tikitini wiini ahini arbaɗi Kanaaniakai n’a sumna midini aftiɗi kai.

³⁸Ɓa mu hini wala ma, buri aga mu hala arbaɗi pinzibani, war piɗi humunini aŋ tikitinisi muni wiini ahini.

³⁹Nɵa mu miɗini wiini epin-geza ɓa: Ablaŋtaŋkai muni hanɗa aga te dara aŋ halasi gaya kai ɗi!

⁴⁰A waya seŋ ɓa EPIƊ-ƊAI na mu na paya wuzani arni kureɗ, aga a ɵina ɵeŋni gaiku, aga a kutuku morkoyku pɗemi, aga ku tikitisi aŋ muni wiini ahiya, muni na war pinzibaŋa, war piɗi humuni na wiya lai.

⁴¹Wala zi hi miy hanɗa aga a pɵa muduku kai ɗa sai won hlai na ku hala li arbaɗi ɗaiŋa, na ɓa e sutuku kai ɗa, seŋ muduku kai.

⁴²Girna won hlai na mu cosi gobi miɗi kiliŋi, mu siiwa maini nɵa: Epiɗ-ɗai Alaw na wiini epin-geza Abraham, ku ɓaka morkoyŋa na mu halasi pini na ɗa ta kai ɗi!

⁴³Mu na gobi ɵimaɗi kiliŋi na. Ɓulumi n’aga te niyasi edi aŋ bili yem, n’aga mu zilbiti ɓa saŋa yem zi ci agwi warɗi arginiku par,

⁴⁴na ɓa te wayaŋa seŋ li ɓa ca wiiku, aga mu bilinisi wiini ɵiginiku lai ɗa, hanɗa te muni n’EPIƊ-ƊAI a sitini wiini ahini epi-geza ɗa mal mal.

⁴⁵Seŋ na mu hiinaŋ ɗa, mu vadaŋ kai hai, Rebekka te niyasi anene, argini wulaɗi ta. Te niya azumai miɗi kiliŋi aŋ bili yem. Mu zilbiti ɓa za barka, saŋa yem zi ci ma ɗo.

⁴⁶Te purma aŋ tikitisi arginiɗi azumai, te muɗa: Ca, aga mu sini wiini ɵiginiku a ca lai. Mu ca, te sini wiini ɵigini a ca lai.

⁴⁷Mu zilbiti ɓa tuku k’ahini asiya ɗa? Te wayaŋa seŋ ɓa m’ahini Betuwel, ahi na Milka te waŋ wiini Nakor. Nɵa mu wiiɗi adoŋo merfeŋɗi, kiya wulani tiɗi lai.

⁴⁸Mu pa kurnaiŋa azumai, mu hurga azumai wuzani EPIƊ-ƊAI; mu kola Epiɗ-ɗai Alaw na wiini epin-geza Abraham, n’a ɵasi wuza ɗikat warɗi morkoyŋa, kapai mu tikiti ahi tawalni epin-geza wiini ahini.

⁴⁹Tiyana, na ɓa ki diri ki siŋki pɗem gaini ɗikat na wiiki sini epin-geza ki miɗiŋa. Na ɓa a za kai ɗe ki miɗiŋa lai, kapai mu hala aŋ paya war hlai zamai.

⁵⁰Laban gaini Betuwel n’apiɗi Rebekka e tiki seŋ e miɗi: Seŋ hanɗa a halasi sin EPIƊ-ƊAI par, tiyi wala na mi muɗuŋku aŋ kai; war gal na pɗem kaalai, na meefeŋ kaalai.

⁵¹Rebekka t'aŋ wuzaku na, yimiti, hala gaiɗi. Te za aŋ munini ahini epin-gezaku maini n’EPIƊ-ƊAI a muɗaŋ ɗa nɵa.

⁵²Won hlai na ɗif zi sda na wiini Abraham a ɵina seŋ hanɗa, a hurga azumai wuzani EPIƊ-ƊAI midini afti.

⁵³Ɗif zi sda a mulasi wazagai zi arzaŋ, wazagai zi or gaini sapakai lai a siŋɗi wiiɗi Rebekka, gaini like zamai azamai na faraini abai lai. A sa zamai wiini tawalɗi gaiɗi emiɗi lai;

⁵⁴e simi, e ci, ni gaiɗi marni na pini e fini. Dawai par, won hlai n’e ɵiyisi amai li, a muɗa: Hiniŋa mu hala sin epin-geza.

⁵⁵Tawalɗi ahiyogoi gaiɗi emiɗi e wiyini seŋ: Ku fana ka gaiɗi agwi haw; mefeŋ vu doogo ɗi, kapai asakal par te hala wiiɗi.

⁵⁶A miɗiɗi: Ki yimiŋa mada kir kai. EPIƊ-ƊAI a ɓikiti morkoyŋa ta ya. Nɵa ki hiniŋa mu waya ahani epin-geza.

⁵⁷E wiyi e miɗi: Yikutumusi ahiyogoi ɗa, zilbumu hiiniɗi lai.

⁵⁸E yikitisi Rebekka, e zilbiti: Ku dara ku hala gaini ɗif hanɗa ɗi? Te waya seŋ ɓa nkam.

⁵⁹E hiniti Rebekka na tawalɗi gaiɗi muni na te wiliti amai ɗa aŋ hili gaini ɗif zi sda na wiini Abraham gaiɗi ɗai na pini lai.

⁶⁰Nɵa e ɓikiti e miɗi: Tuku tawalyi, ku bunda dubu dubu dubu! Pinzibaku aga a rɗa amai midini gawni.

⁶¹Rebekka te faka amai gaiɗi falakai n’e zi sda wuzaɗi lai. E niyi amai duɓani ɵigini, e hili pini ɗif ɗa. Ɗif zi sda a tikiti Rebekka, a hala lai.

⁶²Koskoi won hlai na futi te nawa sek, Isaak a waisi edi miɗi kiliŋi na Lahai-Roy par, a sumna edi war basga na Negev.

⁶³Futi gobi koskoi sek ɗa, Isaak a niyasi edi war baŋa aŋ guna blaŋŋa; Won hlai n’a yima arni amai ɗa a tala ɵigini a na halasi.

⁶⁴Rebekka te yima arɗi amai te tala Isaak. Te hasi azumai midini ɵigini par.

⁶⁵Te zilba ɗif zi sda ɓa: Ɗif n’a na edi na blaŋ, na halasi sumu sek na ɗa asiya ɗa? A waya seŋ ɓa hanɗa a epin-geza. Te mula sapa na wiiɗi te baraŋ midiɗi.

⁶⁶Ɗif zi sda a miɗini wala n’a zaŋsi paŋ wiini Isaak.

⁶⁷Isaak a kiti amlai war gumu na wiiɗi Sara n’emini. A yimiti Rebekka aŋ munini. Isaak a diriti, a nava arai zi pi burini mri na wiiɗi emini lai.