Read Mousgoum Pi zi tiki 25 Bible Online

Pi zi tiki 25 - Mousgoum bible

Pi zi tiki 25

¹Abraham a tikiti muni zamai ɗaw, yikiɗi ɓa Ketura.

²Ketura te wiini: Zimran, Yoksan, Medan, Madian, Yisbak gaini Suwa.

³Yoksan a wa Saba gaini Dedan. Dedan a wiiɗi Asurkai, Letuskai, gaiɗi Lewumekai.

⁴Madiyan a wa Efa, Efer, Hanok, Abida gaini Eldaa. Hanɗa paŋ e ɗi pinzibaɗi Ketura

⁵Abraham a sini wazagai paŋ wiini Isaak,

⁶Wiiɗi aliɗi falakaini zamai ɗa, a siɗi like. Amma hlai n’aŋ karni par hai, a kiɗi edi gaigai sini Isaak par piɗi futi na dawai par sek, midini afti na piɗi futi na dawai par.

⁷Buzani Abraham a na miya gaini doogo doogo muguzak pi ɵim.

⁸Asakal hanɗa, suŋfani Abraham a wa edi, a mra. Amma a mra war wel zi hormo, a za buza viya, a nava farai viya lai, nɵa e piŋ, a hala gaiɗi tamaini.

⁹Isaak gaini Ismayel n’alini e piŋ war waŋ na siɗi Huwuŋ Makpela war vuwai na wiini Efroŋ n’ahini Sofar na Hittit, wuzani Mamre,

¹⁰war vuwai n’Abraham a wura tiɗi alini Hek par. Abraham gaiɗi Munini na Sara e piɗi war hlai hanɗa.

¹¹Asakal mrini Abraham, Alaw a ɓaka Isaak n’ahini, a sumna ɵimaɗi kiliŋi na Lahai-Roy.

¹²Pinzibani Ismayel ahini Abraham n’a waŋ gaiɗi Hagar bagaiɗi Sara n’Egipte par a na maini nɵa:

¹³Hanɗa a yikiɗi alini Ismayel, yikiɗi pinzibaɗi, Nebaiot ahini Ismayel n’abai, kedar, Adbeyel, Mibsam,

¹⁴Misma, Duma, Masa,

¹⁵Hadad, Tema, Yetur, Nafis gaini Kedma lai.

¹⁶Hanɗa e ɗi alini Ismayel gaini yikiɗi lai, e simni warni fuŋ n’agogoi gaini n’abakai lai, e pi vok kiini kiini doogo pi sulu, vok paŋ gaini paini paini.

¹⁷Buzani Ismayel a na miya gaini doogo doogo hu pi muguzak, asakal par suŋfani a wa edi, a mra lai, e piŋ a hala gaiɗi tamaini.

¹⁸Pinziba na wiini Ismayel e simnisi a Havila par haa a Sur, gobi gaiɗi Egipte haa a Sur, pinzibani Ismayel a sumna arni midiɗi tawalakaini ca, goɓ aŋ faka amai midiɗi.

¹⁹Pinzibani Isaak n’ahini Abraham a na maini nɵa, asakal n’Abraham a wa Isaak li,

²⁰Isaak won hlai n’a za buza doogo doogo puɗu a tikiti Rebekka n’ahini Betuwel na Mezopotamiya par midini afti na plas, tawalni Laban lai aŋ munini.

²¹Isaak a siiwa EPIƊ-ƊAI buriɗi munini, buri te nafu muɗaŋ. EPIƊ-ƊAI a hiina haw burini, Rebeka na munini te tika fel.

²²Amma aliɗi e digiɵi siɗi marɗi amlai war gutɗi, te ɗuula te muɗa: Na ɓa a na nɵa, mu nava tiɓ ɗa a maɗa. Te hala te zilba dirini EPIƊ-ƊAI;

²³EPIƊ-ƊAI a wiyiɗi seŋ: Pinziba sulu a na amlai warku, pinzibaɗi ɗai sulu aga e ɓûrwi siɗi marɗi par won hlai n’aga e niyisi edi siɗi marɗi par. Pinziba na ktai gdaŋni aga a suwa na zamai ɗa, N'abai aga a za aŋ begeni n’agwi.

²⁴Won hlai na hlaiɗi zi pûki a va amai li, te tala siɗi t'aŋ gaini teyek warɗi.

²⁵Na a niyasi edi avut ɗa a wa bogro, sini paŋ gaini ayir maini ayirni wazagai na gaini ezini puɗu puɗu nɵa, e sini yiki ɓa Ezaw.

²⁶Asakal par tawalni ɗa a niyasi edi lai, tini gai yimi sini digini-digini n’ezini Ezaw ɗa kai, e sini yiki ɓa Yakob. War wiiɗi ɗa, Isaak buzani doogo doogo ɵaara.

²⁷Aliyagoi e wili amai. Ezaw a ɗif n’a sɗa yelni ɵar gara, a firiya hili na blaŋ blaŋ edi war basga. Yakob ɗa a arwagwi zi yel gara n’a sumna aha.

²⁸Isaak a dara Ezaw, buri a firiya neŋni salak gara. Rebeka te dara ɗa a Yakob.

²⁹Mefeŋ ktai Yakob a da sugoi zi giwi, Ezaw a wayasi edi basga par, a kaya gara.

³⁰A miɗini wiini Yakob: Mu siiwuku, hinaŋa mu suma pini simiku na mekele hanɗa agwi buri gdaŋŋa aŋ kai. Buri hanɗa e sini yiki ɓa Edom a dara a muɗa: Mekele.

³¹Yakob a wiyini seŋ: Girna tar, wiritiŋa abaiku zi wii gaini sda na piɗi paŋ.

³²Ezaw a muɗa: Tala, mu dara mu mra, abai zi wii gaini sdaɗi na piɗi pɗemni na buriya, aŋ wata ɗa?

³³Yakob a muɗa: Haŋa wala muku girna tar. Ezaw a hini wala mini, a wiriti abaini zi wii gaini sdaɗi edi wiini Yakob.

³⁴Nɵa Yakob a sini peŋ gaini sugoi zi giwi na gaini a nai. A suma, a ca, a faka amai a hala. Ezaw a miisiti abaini gaini sdani lai maini hanɗa nɵa.