Read Mousgoum Pi zi tiki 27 Bible Online

Pi zi tiki 27 - Mousgoum bible

Pi zi tiki 27

¹Isaak a za wel kroh kroh, arni a bunda huruf, a kiɗa aŋ tala kir kai. A yika ezaw ahini n’abai a miɗini: "Ahiya" Ezaw a waya seŋ: "M'an na"

²Isaak a muɗa: Ku talaŋa na ɗa mu za wel gara ta. Mu sɗa mefeŋa zi mri ɗa kai.

³Hlai a cosi ya. Tiyana mula wazagaiku zi ɵar: Taŋku gaini ɓarawku, lawa edi basga, payaŋasi neŋni salak ta.

⁴Ku daŋa simi na pɗem maini na mu daraŋ ɵa ɗa, ku kaŋasi; mu suma ta kapai ta dama mu ɓukuku wuzani mriŋa.

⁵Rebekka te ɵina seŋ hanɗa won hlai na Isaak a na miɗini wiini Ezaw n’ahini. Ezaw a hala edi basga aŋ ɵar kapai a kasi neŋni salak ɗa.

⁶Rebeka te miɗini wiini Yakob n’ahiɗi, tala mu ɵina seŋ ktai n’apuku a miɗiŋni wiini tawalku Ezaw, a miɗini ɓa:

⁷"Paiaŋasi neŋni salak ta, ku daŋasi simi na pɗem kapai mu suma ta. Asakal par aga mu ɓukuku wuzani arni EPIƊ-ƊAI, wuzani mriŋa ta".

⁸Tiyana ɗa ahiya, ɵina seŋ na mu muɗuŋku na ɗa, za wala na mu muɗuku midini lai,

⁹hala arbani fara ɗa, ku yimasi alini afkasai na pɗamai sulu, aga mu dini simi na pɗem wiini apuku maini n’a daraŋ nɵa,

¹⁰ku kiŋni wiini apuku a suma ta kapai a ɓukuku wuzani mrini.

¹¹Yakob a wiyiɗi seŋ wiiɗi Rebekka n’emini: A siɗa aŋ za; amma Ezaw tawala a ɗif n’ayir sini, amma ta ayir sa kai koo!

¹²Apa a kiɗa a titimaŋa, a yimaŋa lai ɓa, mu duulaŋ na ɗa a dûûli, aga mu kasi maɗa a ɓiki kir kai, amma a tusa.

¹³Emini te miɗini: Ahiya, tusa na muduku a pɵasi mada, koo a za gir maɵa ɗi, ɵina seŋŋa na mu muɗuŋku haw le! Hala kaŋasi wala mu muɗuku gaini ɗa.

¹⁴A hala, a yimasi alini afkasai, a waisi siɗi emini. Te da simi na pɗem maini na epini a firyaŋ ɗa nɵa.

¹⁵Asakal par, Rebekka te mula sapa na wiini Ezaw ahiɗi n’abai, na wûrini abai n’a na aha tiɗi, te wiŋni sini Yakob ahiɗi n’agwi ɗa ca.

¹⁶Te faɗɗa amurni afkasai wulani tini tika tika, sin wulani na gilɓu su lai.

¹⁷Te sini simi na pɗem na te daŋ gaini peŋ na te zaŋ ɗa lai war tini Yakob n’ahini.

¹⁸A niya amlai ahani epini a muɗa: Apa. Epini a waya seŋ "m’an na ahiya", ku siya ɗa?

¹⁹Yakob a miɗini wiini epini: Muta Ezaw, ahiku n’abai, mu zasi wala na ku muɗaŋa midini ya, fakasi amai, sumna amai dam, suma neŋni salak na mu piyuŋkusi kapai tuku gaini muduku dama ku ɓakaŋa.

²⁰Isaak a wiyini seŋ wiini ahini: Ahiya, girna ku waisi witaw tar koo! Ahini a miɗini: Buri ɓa Epiɗ-ɗai Alaw na wiiku a kaŋasi wuza.

²¹Nɵa Isaak a miɗini wiini Yakob: Torasi sa gobi ahiya, mu titimuku haw. Ku tuku Ezaw n’ahiya tiɓ ɗi?

²²Yakob a torasi gobi sini Isaak n’epini. Isaak a titimaŋ a muɗa: Wule zi miɗi ɗa a na wiini Yakob, amma tiy a wiini Ezaw.

²³A siɗaŋ kai, buri tini a nafu gaini ayir maini na wiini tawalni na Ezaw ɗa nɵa, a ɓakaŋ.

²⁴A zilbaŋ: Ku tuku ahiya Ezaw tiɓ? A waya seŋ: Muta

²⁵A muɗa: Ahiya, saŋasi simi mu suma neŋni salak ta, kapai mu ɓukuku. Yakob a sini simi a suma, a kinisi vin a ca lai.

²⁶Nɵa Isaak n’epini a miɗini: Ahiya, torasi sa gobi, gobasi, sisiɓa ma lai.

²⁷A torasi sini gobi a goboŋ, a sisiɓa mini lai. Isaak a luguza lugos na wiini sapani, a ɓakaŋ a muɗa: Kai! Lugosni ahiya a na maini lugosni vuwai n’EPIƊ-ƊAI a ɓakaŋ nɵa.

²⁸EPIƊ-ƊAI a hinasi maɗai n’amai par muduku, a suku afti z'alam lai, a suku algama gaini vin na hehe viya.

²⁹Ɗai e bindi aŋ bagakaiku, pinzibaɗi ɗai e hûrgi azumai wuzaku. Ku ŋa midiɗi tawalakaiku paŋ aliɗi amuku paŋ e hûrgi azumai wuzaku Ni n’a tuusuku, tuusa aŋ midini Ni n’a ɓukuku, ɓiki aŋ midini lai.

³⁰Won hlai na Isaak a vada gaini ɓiki na wiini Yakob li, hlai na Yakob a fakaɗi sini Isaak n’epini par li, Ezaw na tawalni a cosi edi aŋ ɵar par lai.

³¹Ni lai a da simi na pɗem a kiŋni wiini epini, a miɗini: Apa, faka amai, suma neŋni salak na ta n’ahiku mu piyuŋkusi ɗa, kapai asakal par ku ɓakaŋa ta lai.

³²Isaak n’epini a zilbaŋ: Tuku ku siya ɗa? A miɗini: Mu ta Ezaw, n’ahiku n’abai.

³³Isaak a turla amai marmai, a tika pini a ziriya gdaŋ gara a muɗa: N'a hala edi aŋ ɵar n’a kaŋasi neŋni salak lai ɗa asiya ɗa? N'a saŋa simi na kiini kiini maa wuzani hlai na ku niyasi amlai na sek ɗa asiya ɗa? Mu ɓakaŋ ta ya, ɓiki aga a sumna midini lai.

³⁴Won hlai na Ezaw a ɵina seŋ na wiini epini, a ɗuula ɗuwal zi marava n’abai a miɗini wiini epini: Hai apa, ɓakaŋa ta ta lai.

³⁵Epini a waya seŋ: "Tawalku a halasi gaini yel a tika ɓiki na wiiku ɗaw.

³⁶Ezaw a muɗa: "Buri ɓa e yikiŋ Yakob ɗa zaw"! Azi sulu paŋ a tika balamŋa ɵa ɗawwa ɗawwa ɗa! A tikiti abaiŋa zi wii ɗaw, tiya n’a na pra, a tika ɓiki na wiya pra ɗa! Ku hinaŋa ka ɓiki zamai wiya kai ɗi?

³⁷Isaak a tika seŋ a miɗini wiini Ezaw: "Tala, mu zaŋ aŋ abaiku ta, mu siɗini tawalakaini paŋ aŋ bagakaini, mu sini algama gaini vin na hehe viya, n’aga mu za buriku zamai ɗa a ma kiɗi ɗa ahiyaŋ

³⁸Ezaw a wiyini seŋ wiini epini: Apa, ɓiki ɗ'aŋ tuku ktai bas ɗi? Ɓakaŋa ta ta lai! Ezaw a tuwa gara.

³⁹Nɵa Isaak a tika seŋ a muɗa: Tala hlaiku zi simni aga a za edi edi gaigai sini afti z'alam par, maɗai n’a halasi war hlai n’amai par aga a wa midini kai.

⁴⁰Aga ku sumna karku pin kaskarku, amma aga ku za aŋ begeni tawalku, war zûgiku na blaŋ blaŋ aga ku haɗa gaalaŋ na wiini n’aŋ wulaku edi.

⁴¹Ezaw a yima Yakob maini gawni nɵa buri ɓiki n’a navaŋ tini epini par. A rgaŋ warni ɓa: "Mri na wiini apa a ŋasi gobi, aga mu fuɗa Yakob na tawala edi".

⁴²Won hlai na Rebekka te sɗa hiinini Ezaw ahiɗi n’abai ɗa ɓa ɗa, te yika Yakob ahiɗi n’agwi te miɗini: Tala Ezaw na tawalku a dara a fuɗuku edi aŋ vurga na ku ziŋni ɗa.

⁴³Tiyana ahiya, ɵina seŋ na mu muɗuŋku ɗa, amai, lawa ahani tawala Laban war Haran.

⁴⁴Aga ku sumnasi gaini mefeŋ yaw, haa hiy na wiini tawalku a tika azumai.

⁴⁵Won hlai na hiy na wiini tawalku a tikali edi muduku par, na ɓa midini a wula li gaini wala na ku ziŋni lai ɗa, aga mu ɵinaɗi puku aŋ yimukusu edi won par. Aga mu biki tiki aliya na sulu paŋ edi war mefeŋ ktai buri ma ɗa?

⁴⁶Rebekka te miɗini wiini Isaak, simni na kara, a baza ara ta, buriɗi alini Hek na falakai hanɗa. Na ɓa Yakob a tikiti te ktai arbaɗi alini afti hanɗa pra ɗa, pɗemni simni na kara tiɓ ɗa aŋ wata ɗa?