Read Mousgoum Pi zi tiki 28 Bible Online

Pi zi tiki 28 - Mousgoum bible

Pi zi tiki 28

¹Isaak a yika Yakob a ɓakaŋ, a sini gadai maini nɵa: Aga ku tikiti ahiyagwi na Kanaan aŋ muni kai.

²Faka amai, hala midini hlai na plas na Mezopotamiya ahani Betuwel n’apiɗi amuku. Ku tikasi ktai arbaɗi alini Laban na kinaku par aŋ muniku.

³Alaw zi spak paŋ a ɓukuku, a sisiɗuku viya, a bunduku viya kapai ku bunda aŋ vok na wiiɗi ɗai viya.

⁴A suku ɓiki na wiini Abraham wiiku tuku gaini pinzibaku, kapai ku tika afti na ku sumna midini aŋ zak, afti n’Alaw a siŋni wiini Abraham ɗa.

⁵Isaak a tikini pini Yakob a hala midini hlai na plas, ahani Laban n’ahini Betuwel na Mezopotamiya par, na tawalɗi Rebekka n’emini Yakob gaini Ezaw.

⁶Ezaw a sɗa ɓa, Isaak a ɓaka Yakob ta, a ɵinaŋ edi midini hlai na plas na Mezopotamiya aŋ tikitisi muni woni par. A sɗa ɓa won hlai n’a ɓakn ta ɗa a sini gadai maini nɵa: Aga ku tikiti ahiyogoi na Kanaan par aŋ muni kai.

⁷Yakob a ɵina pini epini gaiɗi emini a hala midini hlai na plas na Mezopotamiya.

⁸A yima midini Ezaw ɓa, ɓulamai na Kanaan ɗa Isaak n’epini a na diriɗi kai.

⁹A hala sini Ismayel, buri a dara a tikiti muni na zamai pra. Nɵa a tikitisi Mahalat n’ahini Ismayel n’ahini Abraham na tawalni Nebaiot.

¹⁰Yakob a fakasi a Beer-Seba par buri a hala a Haran.

¹¹Futi te nawaŋ war hlai ktai. A tika ahi-fuŋ na woni ktai, a tikaŋ azumai midini, a fana war hlai ni ɗa.

¹²War duvuk weseŋ a pɵaŋ, a tala saga gai ɗiyi zaw, pini azumai midini afti par tiɓ, merfeŋni haa amai arni ɗugul ta. Ɗai zi ɵeŋ na wiini Alaw e niyi amai, e niyisi azumai lai sini ɗaw.

¹³A tala EPIƊ-ƊAI a ɗiya ɵimani saga zaw a miɗini: Mu ta m’Epiɗ-ɗai Alaw na wiini tiyiku Abraham, Alaw na wiini Isaak lai, afti na ku fana midini aga mu suŋku aŋ wiiku gaiɗi pinzibaku.

¹⁴Pinzibaku aga a sisiɗa viya maini alogodo na midini afti nɵa, aga ku wa tuku edi war gal na piɗi futi na koskoi sek, na piɗi futi na dawai par sek, na azumai sek, na amai sek lai, warku war pinzibaku par lai, ɗai na midiɗi yai paŋ aga e nivi ɓiki.

¹⁵Tala mu na gaiku, aga mu giɗimuku woɗi paŋ n’aga ku halan, aga mu wuyukusi pra midini afti hanɗa buri aga mu hunuku edi kai haa wala paŋ na mu muɗuŋku a va li amai haw.

¹⁶Yakob a ɵiyasi amai war weseŋni par a ɗuula a muɗa: EPIƊ-ƊAI aŋ wonna gazi gazi, amma ta mu sɗaŋ ɵa kai.

¹⁷A huna a ɗuula a muɗa: Hlai hanɗa a zi dawaŋ kai, hanɗa a dalamni Alaw, a mini magala na wiini fuŋ-n’Alaw.

¹⁸Yakob a ɵiya amai gorof, a tika ahi-fuŋ n’a tikaŋ azumai midini, a bundaŋ aŋ ahi-fuŋ z'alaw, a ma emel amai par midini lai.

¹⁹A sini yiki wiini hlai hanɗa ɓa Betel, a dara a muɗa dalamni Alaw. Amma wuzani mefeŋ hanɗa par, fuŋ n’abai hanɗa yikini ɓa: Luz.

²⁰Asakal par Yakob a za ɵinini-ha a muɗa: Na ɓa Alaw aŋ gaya, na ɓa a giɗimaŋa warɗi morkoiŋa na m’aŋ warɗi hanɗa, na ɓa a saŋa wala zi simi gaini sapa zi wii si,

²¹na ɓa mu wayasi aha war dalamni apa jam, EPIƊ-ƊAI aga a bunda aŋ Alawŋa.

²²Ahi-fuŋ na mu zaŋ aŋ ahi-fuŋ z'alaw hanɗa, aga a bunda aŋ dalamni Alaw, wala paŋ n’aga ku saŋŋa paŋ ɗa, aga mu suku doogoni.