Read Mousgoum Pi zi tiki 29 Bible Online

Pi zi tiki 29 - Mousgoum bible

Pi zi tiki 29

¹Yakob a faka aŋ hili, a hala midini afti na piɗi futi na dawai par,

²Mefeŋ ktai a niviti kiliŋi edi war basga tiɓ, farani adumai gaini haakai ɵimani gaini pi tiɓ tiɓ hu, buri e sini yem warɗi kiliŋi hanɗa par. Miɗi kiliŋi aŋ gaini gûgi gaiɗi fukuni n’amai duk.

³Won hlai na farani farai ɗa a tapasi li woni, ɗai e likititi fukuni n’amai ɗa edi miɗi kiliŋi par, e sini yem wiini agumai, asakal par e wiyini fukuni miɗi kiliŋi ta.

⁴Yakob a zilbiɗi ɗai zi giɗimi: Tawalakaya ki ɗi na wata par ɗa? E wiyini seŋ: Tiyi mi ɗi na Haraŋ par.

⁵A miɗiɗi: Ki siɗi Laban n’ahini Nakor ɗa ya ɗi? E wiyini seŋ: Mi siɗiŋ ya.

⁶A zilbiɗi: A na jam hekɗi, e wiyini seŋ a na jam kadai, tala ahini na Rakel ɗa maa te na halasi gaini adumai na wiini tuku na.

⁷A muɗa: Tili futi te na hai, a sarti na ki tipi adumai woni kai, sini yem wiini adumai asakal par ki wiyiŋ edi a suma kuzum pra.

⁸E wiyini seŋ: Mi kiɗi aŋ zi hanɗa kai, na ɓa farani adumai aga a diŋgasi paŋ kafa kai ɗa. Won hlai n’a diŋgasi li, mi likititi fukuni edi miɗi kiliŋi par, mi sini yem wiini adumai.

⁹Ni a na muɗa gaiɗi ɗai hai, Rakel te cosi gaini adumai na wiini epiɗi, buri na t'ahiyagoy zi giɗimi farai.

¹⁰Woni hlai na Yakob a tiliti Rakel ahini Laban na kinani, gaini adumai na wiini Laban na kinani, a halasi a likititi fukuni edi miɗi kiliŋi par, a sini yem wiini adumai na wiini Laban na kinini ɗa.

¹¹Yakob a gûbiti Rakel, e yimi marɗi, a tuwa gaini wulani amai.

¹²Yakob a siŋka sini wiiɗi Rakel ɓa a zigelni epiɗi, a ahiɗi Rebeka, te lawa te ka seŋ hanɗa wiini epiɗi.

¹³Won hlai na Laban a ɵina nlabarni Yakob n’ahiɗi tawalni a lawa miɗi e yimi marɗi kiŋ kiŋ a kaŋsi ahani, Yakob a virnini seŋ na aza paŋ.

¹⁴Laban a miɗini: Tuku ku keɵkeŋa gaini neŋ-sa lai jre jre. Yakob a sumna gaini tile ɗaw.

¹⁵Mefeŋ ktai, Laban a miɗini wiini Yakob: Aga ku zina pa kadai buri ɓa ku zigelŋa ɗi, muɗaŋa haw vrakku aga a za maɵa ta ɗa?

¹⁶Amma Laban a nafu gaiɗi ali na falakai sulu, n’amai yikiɗi Leya, na wulaɗi yikiɗi Rakel,

¹⁷Leya arɗi a wa juf kai, amma Rakel te wa juvi, ku dara ku bunda arku edi siɗi par kai.

¹⁸Yakob a diriti Rakel, a muɗa: Buriɗi Rakel n’ahiku n’agwi aga mu zuku sda buza muguzak.

¹⁹Laban a muɗa: Buriya ta ɗa, a pɗem ɓa mu sutuku a suwa na mu sitini wiini ɗif zamai, sumna gaya.

²⁰Yakob a za sda buriɗi Rakel buza muguzak, a talaŋ arni aŋ mefeŋ n’agwi kadai buri a diriti gara.

²¹Nɵa Yakob a miɗini wiini Laban: Sitiŋa muniya ɗa, sartiŋa a va li, mu dara mu kititi.

²²Laban a tipiɗi ɗai na war fuŋ ni paŋ a ziti fet zi tiki n’amai.

²³Hlai na futi te nawa li, Laban a yimiti ahini na Leya a kitini wiini Yakob, Yakob a yimiti sini.

²⁴Laban a siti bagaini na Zilpa wiiɗi ahini aŋ bagaiɗi,

²⁵Dawai par Yakob a bunda hiyak won hlai n’a tiliti te Leya, a miɗini wiini Laban: Na ku zaŋŋa hanɗa a maɗa, mu zuku sda buriɗi Rakel kai, ku duulaŋa buri maɗa?

²⁶Laban a wiyini seŋ a muɗa: De na wiyi woni n’a na ɵa kai, ku siti ahi n’agwi wiini wus wuza tawalɗi n’amai ɗa kai.

²⁷Vada draiɗi na kosku ɗaw vat, na ktai lai aga te sa suku pini sda zamai n’aga ku zaŋ ahaya burini buza muguzak pra.

²⁸Yakob a za maini nɵa a vada draiɗi Leya na kosku ɗaw vat, Laban a sitini ahini na Rakel aŋ muni.

²⁹Laban a sitiɗi bagaini na Bilha aŋ bagai wiiɗi ahini na Rakel.

³⁰Yakob a tikiti Rakel, a diriti gara te sûwiti Leya, a za sda zamai wiini Laban buza muguzak pra.

³¹Won hlai n’EPIƊ-ƊAI a sɗa ɓa Leya ɗa e firiyiti kai ɗa a siɗi ali viya, Rakel te hina muɗaŋ kadai.

³²Leya te tika fel te wa ahi ktai, te sini yiki ɓa: Ruben, buri te muɗa: EPIƊ-ƊAI a tala miisiŋa, tiyana mafa aga a daraŋa.

³³Te tika fel katawai pra, te wa ahi ktai, te ɗuula te muɗa: Nkam, EPIƊ-ƊAI a sɗa ɓa e diriŋa kai, a saŋasi na hanɗa lai, te sini yiki ɓa: Simeyon.

³⁴Te tika fel katawai pra te wa ahi ktai, te muɗa: Tiyana par mafa aga a nagai sa ta buri mu wiini ali na maɵagai hu, buri hanɗa e sini yiki ɓa Levi.

³⁵Te tika fel pra te wa ahi ktai, te ɗuula te muɗa: Tiyana zaw aga mu kola EPIƊ-ƊAI, buri te sini yiki ɓa Yuda, te ɗiya gaini wii lai.