Read Mousgoum Pi zi tiki 30 Bible Online

Pi zi tiki 30 - Mousgoum bible

Pi zi tiki 30

¹Won hlai na Rakel te tala ɓa te na wa ali gaini Yakob kai ɗa te za sile siɗi tawalɗi. Te miɗini wiini Yakob: Wa ali gaya lai, ɵa kai ɗa aga mu fuɗa sa muku

²Ta m’Alaw ɗi na kapai mu suku seyem war agulku ɗa?

³Te muɗa: Bilha na bagaiŋa te na, yimiti suku kapai te wiiɗiŋa ali n’aga mu wûliɗi amai.

⁴Te sitini Bilha na bagaiɗi aŋ munini, Yakob a yimiti sini

⁵Bilha te tika fel, te wiini ahi ktai.

⁶Rakel te muɗa: Alaw a hiina buriya li, a ɵina tûwiŋa, a saŋa ahi li, buri hanɗa te sini yiki ɓa: Dan.

⁷Bilha, bagaiɗi Rakel te tika fel pra, te wiini ahi wiini Yakob pra.

⁸Mu hitima hitimi na gdaŋ gaiɗi tawala haa mu rɗa amai midiɗi, te sini yiki ɓa: Neftali.

⁹Won hlai na Leya te sɗa ɓa te ɗiya gaini wii zaw te yimiti bagaiɗina Zilpa, te siti aŋ muni wiini Yakob.

¹⁰Zilpa bagai na wiiɗi Leya te wiini ahi wiini Yakob ktai,

¹¹Leya te ɗuula te muɗa: Haama luba, te sini yiki ɓa: Gad

¹²Asakal par Zilpa bagaiɗi Leya te wiini ahi n’ag'aŋ sulu wiini Yakob pra.

¹³Leya te ɗuula te muɗa: Haama ɓiki, falakai paŋ aga e miɗi mada ɓa, mu muni zi ɓiki, te sini yiki ɓa: Aser.

¹⁴War mefeŋ na wiini hiɗini algama, Rubeŋ a hala edi war vuwai aŋ paya ali luwuŋ n’a fiki si amai, a kiŋɗisi wiiɗi Leye n’emini. Rakel te siiwiti Leya te miɗiɗi: Saŋa pini ali luwuŋ zi fiki si amai na wiini ahiku agwi haw ɗa.

¹⁵Leya te wiyiɗi seŋ te muɗa: Ku yima mafa ta kaai a kuɗuku kai ɗi? Ku dara ku mula alini luwuŋ zi fiki-si amai na wiini ahiya pra ɗi? Rakel te muɗa: Pɗem duvukŋa Yakob a fana gaiku midini ali luwuŋ zi fiki-si amai na wiini ahiku

¹⁶Koskoi Yakob a wayasi edi war vuwai par girna, ku fana ɗa amlai ahaya, buri mu wura feŋ hanɗa gaini ali luwuŋ zi fiki si amai na wiini ahiya, a fana gaiɗi duvuk hanɗa lai.

¹⁷Alaw a ɵina tuwi na wiiɗi Leya, te tika fel te wa ahi n’ag'aŋ ɵim wiini Yakob.

¹⁸Leya te ɗuula te muɗa: Alaw a saŋa vrakŋa ya buri mu siti bagaiŋa wiini mafa ta, te sini yiki ɓa Isakar

¹⁹Leya te tika fel pra te wa ahi n’ag'aŋ ɵaara wiini Yakob.

²⁰Te ɗuula te muɗa: Alaw a saŋa like na pɗem, tiyana zaw ɗa mafa a kiɗa a saŋa kol buri mu wiini ali na maɵagai ɵaara, te sini yiki ɓa: Zabulon.

²¹Asakal par te wiiti ahi na muni ktai te siɗi yiki ɓa: Dina.

²²Alaw midini a kɵa gaiɗi Rakel, Alaw a ɵina tuwiɗi, te tika piɗi aŋ wa ali lai.

²³Te tika fel te wa ahi, te ɗuula te muɗa: Alaw a tika siyer na mada li edi kiɗi,

²⁴te sini yiki ɓa: Yosef, war hiini na ɓa EPIƊ-ƊAI a saŋasi ahi zamai ktai sini pra kai ɗi!

²⁵Won hlai na Rakel te w a Yosef su, Yakob a miɗini wiini Laban: Hinaŋa mu hala, mu waya aha midini aftiŋa.

²⁶Siɗiŋa aliya gaiɗi falakaia na mu zuku sda buriɗi, mu dara mu hala. Tuku ku sɗa sda na mu zuŋku edi gaglai.

²⁷Laban a miɗini: Hiina buriya, buri alawaiŋa e siŋkiŋa ɓa EPIƊ-ƊAI a ɓakaŋa na ɗa buriku.

²⁸Laban a waya a muɗa pra, ɗiyaŋa vrakku zaw kapai mu suŋku.

²⁹A wiyini seŋ a muɗa: Tuku dama ku sɗa ɵeŋku na mu zaŋ, ku sɗa ɓa adumaiku a bunda viya won hlai na mu tika gɗamni.

³⁰Faraiku a naka dai dai kadai wuza par ɗa, ɗif paŋ n’a talaŋ girna a bunda hiyak buri a sisiɗa viya won hlai na mu ɵa wuzani, EPIƊ-ƊAI a ɓukuku sini mefeŋ na mu cosi ahaku par kapai ta mu za sda burini dalamŋa dama kaswata ɗa

³¹Laban a muɗa: N'aga mu suku ɗa a maɗa? Yakob a waya seŋ sini: Aga ku saŋa wala kai. Na ɓa ku saŋa wala na mu na zilbaŋ na li ɗa, aga mu wayasi aŋ giɗima adumaiku pra.

³²Girna aga mu vuga arbani fara ɗa, alini adumai na balawai na sini gaini bili ɓlok paŋ, adumi na mirɗiki paŋ, afkisi na buluwi zaw na zarai paŋ aga mu tikini arni edi kiini, hanɗa a vrak na wiya ɗa.

³³Avut sek, won hlai n’aga ku halasi aŋ tala vrak na wiya, arbani afkasai ɗa, na ku niviti li zarai kai, zaw gaini bili ɓlok kai, zaw mirɗiki kai, arbani adumai nɵa lai, jre kai na wiya aga a siŋka edi, aga a bunda buriya aŋ wala zi hil.

³⁴Laban a muɗa pɗam a za maini na ku muɗaŋ na ɗa nɵa.

³⁵Mefeŋni tar Laban a vara bangarakai na zarakai, na balawai gaini afkasai na balawai na zarakai paŋ lai edi kiini. Na Laban a yimaŋ edi paŋ gaini adumai na murɗakai n’arbani marni lai a siŋɗi tiɗi alini.

³⁶A ɓirwiɗi edi siɗi marɗi gaini Yakob, arbaɗi mogoni hili mefeŋ hu, Yakob a hina aŋ giɗima farani Yakob.

³⁷Yakob a paya tini luwuŋ na agogoi na hirnaŋ na wiini luwuŋ pöpiliye na wiini luwuŋ amandiye gaini na wiini luwuŋ platan lai. A fawa sini edi arbani su su, a fawaŋ haa sini muɗukwiini ta ta.

³⁸A mula tini luwoŋai na zarai ɵimani palkaw wuzani arni haakai gaini adumai, ɵimani palkaw n’a ca yem warni, a zuvuna marni warni lai won hlai n’a halasi aŋ ca yem ca ca.

³⁹Farai a jivina marni wuzani tini luwoŋai hanɗa, na falakai a wa ali na zarakai zaw na balawai.

⁴⁰Adumai na Yakob a mulaŋ edi kiini a tapaŋ gaini na zarakai sek, adumai na murɗakai n’aŋ war fara na wiini Laban paŋ a zaŋ aŋ fara na kiini ta, a pɵaŋ arbani fara na wiini Laban ɗa kai.

⁴¹Hlai paŋ na farai na gaini liki a jivina warni, Yakob a milinisi tini luwuŋ na zarakai azumai wuzani arni wulani avakai kapai a jivina marni wuzani.

⁴²Won hlai na ɓa a farai na gaini hûgia mulaŋ azumai wuzani kai, farai na gaini hûgi a wiini Laban na gaini liki a wiini Yakob.

⁴³Yakob a za aŋ ɗif zi farai, a za gaini fara viya, bagakai na falakai gaiɗi na maɵagai, ɵigini gaini ablehökai viya lai.