Read Mousgoum Pi zi tiki 32 Bible Online

Pi zi tiki 32 - Mousgoum bible

Pi zi tiki 32

¹Laban a faka amai gorof, a ɵiɓiɗi wuti wiiɗi tiyakaini gaiɗi alini na falakai. A ɓikiɗi a waya aha

²Won hlai na Yakob a n’a hala wuzani sek ɗa, ɗai zi ɵeŋ na wiini Alaw e hilisi e nivi gaini.

³Tizaw won hlai n’a tiliɗi a muɗa: Hanɗa a kaŋ na wiini Alaw, a sini yiki ɓa: Maha naiim.

⁴Yakob a ɵina ɗai wuzani sini Ezaw na tawalni midini afti na Seyir edi war basga na wiiɗi Edom.

⁵A siɗi gadai a miɗiɗi, aga ki miɗini wiini epin-geza Ezaw maini nɵa: Yakob na begeku a na muɗasi maini nɵa: Mu nasi fu ahani Laban, mu fanasi woni viya haa girna.

⁶M'aŋ gaini ɵaakai, gaini ablehökai, adumai gaini haakai, bagakai na mɵagai gaiɗi na falakai lai. Mu ɵinaɗi ɗai sini epin-geza Ezaw na ɗa na ɗa buri e zini zaida ta, kapai a za yim sa ta.

⁷Ɗai n’e ɵiniɗi e wiyisi sini Yakob e miɗi: Mi hili ahani Ezaw na tawalku ya, ni lai a na halasi arku. Aŋ gaiɗi ɗai pini miya puɗu.

⁸Yakob a huna gara, hunai n’abai a yimaŋ. A ɓirwiɗi ɗai na gaini vok sulu: Haakai gaini ɵaakai gaini ɵigini ɗa lai.

⁹A muɗa gaini warni ɓa: Na ɓa ezaw a cosi li sini vok na ktai, a ɵaraŋ edi tekeɗeɗi, vok n’a hina aga a ka sini.

¹⁰Asakal par Yakob a muɗa: Alaw na wiini tiya Abraham, na wiini apa Isaak, tuku EPIƊ-ƊAI na ku muɗaŋa ɓa wai a midini aftiku sini pinzibaku aga mu zuku pɗem ɗa,

¹¹ta m’agwi gara burini yim na ku zaŋ sa gaini jre-ɗikat na ku zaŋ sini ɗifku zi sda ɗa. Buri avut mu vuga Yurdan gaiɗi amaraŋaiŋa ktai pal. Tiyana m’aŋ gaini vok pa sulu.

¹²Za barka, plaŋa edi war tinitawala par, war tini Ezaw buri hunai pa wuzani ta. Mu huna ɓa aga e hilisi e fiɗiyi edi gaiɗi falakaia, gaiɗi aliya lai.

¹³Tuku ku muɗaŋa ɓa: Aga mu za pɗem suku, aga mu bunda pinzibaku viya maini kaikai n’agoɗom war ra nɵa, n’a sɗa aŋ pɵa kai buri a na viya.

¹⁴Yakob a fana war hlai ni ɗa, Pini farai n’aŋ tini ɗa, a mula zamai buri a siŋni wiini Ezaw na tawalni aŋ katu.

¹⁵A mula afkasai miya sulu, baŋgarakai caaɓa, adumai na falakai miya sulu, adumai na maɵagai caaɓa lai,

¹⁶ɵigini na falakai zi fiyaw na gaini ali pini doogo doogo hu, ɵaakai doogo doogo puɗu, garakai doogo, ablehökai na falakai caaɓa, na maɵagai doogo lai.

¹⁷A saŋ tiɗi ɗaini zi sda. Fara paŋ arni edi kiini kiini, a miɗiɗi: Vigiɗi wuza, ki hini baŋa arbani fara su su.

¹⁸Asakal par a sa gadai wiini ɗif zi sda n’avut a muɗa: Won hlai na Ezaw na tawala a nava li gaiku a zilbuku li ɓa: Tuku ku wiini asiya ɗa, ku hala fu wata ɗa? Fara n’aŋ wuzaku ɗa a wiini asiya ɗi ɗa?

¹⁹Aga ku wiyini seŋ ɓa a wiini Yakob na ɵeŋku. A katu n’a ɵiniŋnisi wiini epin-geza Ezaw, ni gaini midini dama a na halasi pini par.

²⁰A sa gadai hanɗa wiini ɗif zi sda n’ag'aŋ sulu, asakal par wiini n’ag'aŋ hu, asakal par wiiɗi nagai paŋ n’e hili pini fara paŋ, a muɗa: Sai ki miɗi maini na hanɗa nɵa bas, won hlai na ki nivi li gaini Ezaw ɗa

²¹Aga ki miɗini pra ɓa: Yakob na ɵeŋku a na halasi piyi par. A muɗa gaini warni ɓa: Nɵa aga mu wiyini haŋgalni n’a tuura azumai, won hlai na mu ɵina like hanɗa li wuza, asakal par aga mu nava gaini, ablaŋtaŋkai aga a yimaŋa gaini firiyi ɗi?

²²Katu ɗa a vugaɗi wuzani, amma duvuk ni ɗa, ni gaini midini a fana ɗa warni kaŋ.

²³War duvuk hanɗa dama a faka amai, a miliɗi falakaini na sulu, bagakai na wuzaɗi na sulu, alini na doogo pi ktai lai, a vuga hlai zi hiwi na Yabbok.

²⁴A miliɗi a kiɗi anene duɓani yem par. Asakal par a bunda wazagaini anene paŋ lai.

²⁵Yakob a hina kiini pal, ɗif ktai a daba was gaini haa gorof na hlai rum rum.

²⁶Won hlai n’a tala ɓa aga a rɗa amai midini kai, a daba Yakob sini doŋolaini, doŋolaini a hurɗa, won hlai n’e ɗa dibi was.

²⁷A miɗini wiini Yakob: Hinaŋa buri hlai a sɗasi edi ɓa. Yakob a wiyini seŋ: Na ɓa ku ɓakaŋa kai ɗa aga mu hinuku kai.

²⁸A miɗini: Yikuku maɵa ɗa: A wiyini seŋ: E yikiŋa ɓa Yakob.

²⁹Ɗif a muɗa pra: Aga e yikuku ɓa Yakob kir kai, amma Izrayel, buri ku daba was gaini Alaw, gaiɗi ɗai lai, ku rɗa amai midiɗi.

³⁰Yakob a zilbaŋ: Za barka, siŋkaŋa yikuku ta. Ɗif a miɗini: Ku zilba yikiŋa buri ma ɗa? Won hlai ni dama a ɓaka Yakob.

³¹Yakob a yika hlai hanɗa ɓa: Peniyel, a dara muɗa wuzani arni Alaw; buri gaini Alaw mi tili arɗi maryi, m’aŋ kara lai.

³²Won hlai na Yakob a vuga Peniyel, futi te diyasi amai, a tupula burini doŋolaini.

³³Buri hanɗa alini Izrayel e limi sirdai n’a taɓa arbani ɓalak gaini hoŋor kai, haa girna buri Yakob a nava wuruk sin sirdai hanɗa.