Read Mousgoum Pi zi tiki 33 Bible Online

Pi zi tiki 33 - Mousgoum bible

Pi zi tiki 33

¹Yakob a yima arni amai, a tala Ezaw a na halasi gaiɗi ɗai pini miya puɗu. A ɓirwiɗi aliyagoi arbaɗi Lea, Rakel gaiɗi bagakai na sulu lai.

²A miliɗi bagakai gaiɗi aliɗi edi avut, asakalɗi par Lea gaiɗi aliɗi, Rakel gaini Yosef lai.

³Ni gaini midini dama a halasi a ɵa edi wuzaɗi su. Haa hlai na cosi gobi sin tawalni ta ɗa, a hurga azumai midini afti azi muguzak.

⁴Ezaw a lawasi arni, a kɵa amai wulani, e yimi marɗi kiŋ kiŋ. E tûwi gaini suliɗi.

⁵Asakal par Ezaw a yima arni amai a tiliɗi falakai gaiɗi aliyagoi a muɗa: N'e ɗi gaiku na ɗa e ɗi miɗi asiya ɗa? Yakob a waya seŋ: E ɗi ali n’Alaw a siɗiŋa wiya ta na ɵeŋku.

⁶Bagakai e tûûrisi sini gaiɗi aliɗi e hûrgi azumai.

⁷Lea gaiɗi aliɗi lai e tûûrisi sini e hûrgi azumai. Asakal par, Yosef gaiɗi rakel e tûûrisi sini e hûrgi azumai lai

⁸Ezaw a muɗa: Farani wazagai na mu navaŋsi na paŋ ɗa a zi maɗa? Yakob a waya seŋ: Mu firya mu nava yim wuzani arku tuku n’epin-geza.

⁹Ezaw a waya a muɗa pra: Tawala m’aŋ war kiɗi na viya a suwa suwai. Nɵa wazagai na wiiku a hina aŋ wiiku.

¹⁰Yakob a ɗuula a muɗa: Zaw kai, mu siiwuku, na ɓa mu nava yim wuzani arku li, aga ku yima likeŋa war ta par. Buri mu tala wuzani arku maini n’e tili wuzani arni Alaw nɵa, pra ku yimaŋa suku gaini firiyi lai.

¹¹Nɵa yima katu n’e kiŋɗi suku ta par kai, buri Alaw a saŋ sa kadai, wazagai aŋ ta viya. A piŋni mini haa, Ezaw a yimaŋ lai.

¹²Ezaw a muɗa: Fukumu amai, hulumu aga mu ɵa wuzaku.

¹³Yakob a wiyini seŋ a muɗa: Epin-geza a sɗa ɓa aliyagoi gdaŋɗi gara kai, adumai gaini ɵaakai n’alini a na ca fiyaw aŋ pa, na ɓa mu zunumu gdaŋ li midini koo buri mefeŋ ktai tekeɗeɗi, adumai gaini haakai aga a mra edi kafa.

¹⁴A pɗem ɓa epin-geza a halaɗi ka wiini wuzani ɵeŋni zawa. Ta aga mu halaɗi gaini haŋgal haŋgal, warni kiɗini hilini fara n’aŋ pa gaiɗi aliyagoi lai, haa aga mu coɗi sini epin-geza war Seyir.

¹⁵Ezaw a muɗa: Mu firya ɓa, zamai arbaɗi ɗai n’e ɗi pa e hiniɗi gaiku. Yakob a waya seŋ a miɗini: Aŋ zi maŋ Na ɓa mu nava yim li arni epin-geza hanɗa a kiɗaŋa ta.

¹⁶Mefeŋni dama Ezaw a tikiti futi a Seyir sek.

¹⁷Amma Yakob a hala a Sukkot, woni a rgiti dilimini zi feŋ gaini dugo na burini farani faraini. Buri hanɗa a sini yiki wiini hlai ni ɓa: Sukkot a dara muɗa dugo.

¹⁸Yakob a wayasi edi war hlai na plas na Mezopotamiya par, a cosi aha war fuŋ n’abai na Sikem na te na midini afti na Kanaan jam. A sumna ɵimani fuŋ n’abai ɗa gobi.

¹⁹A wura galni vuwai agwi n’a pa gumuni woni tiɗi alini Hamor, n’a tikiti Sikem azumai, faraini sulai zi arzaŋ miya ɗaw.

²⁰A rga gûwiŋ zi ɓaka, a sini yikini ɓa: El, Alaw na wiini Izrayel.