Read Mousgoum Pi zi tiki 34 Bible Online

Pi zi tiki 34 - Mousgoum bible

Pi zi tiki 34

¹Dina ahini Yakob n’a wûti gaiɗi Lea te niya anene aŋ tiliɗi ali falakai na midini afti ni ɗa.

²Sikem n’ahini pai Hamor, na war pinziba Hivit a tiliti a yimiti gaini gdaŋ a fana gaiɗi aŋ gdaŋ.

³Suŋfaɗi agulni paŋ a sa edi midiɗi Dina n’ahini Yakob, dirini a va amai midiɗi ɓulumi hanɗa gara, a firya ɓa te sitini agulɗi.

⁴Sikem a miɗini wiini Hamor n’epini: Tikitiŋa ahiyagwi hanɗa aŋ muni.

⁵Yakob a ɵina ya ɓa e tûûriti Dina n’ahini kok. Amma won hlai n’alini e ɗisi edi war basga gaini farai zi geɗam ɗa hai, a muɗa wala ktai kai, haa e wiyisi aha.

⁶Hamor n’epini Sikem ahalasi ahani Yakob aŋ muɗa gaini.

⁷Alini yakob e wiyisi edi war basga par. Won hlai n’e ɵini seŋ hanɗa e tiliŋ siɗi maini tirki nɵa, e fiki gaini hiy na gdaŋ gara, buri won hlai na Sikem a fana gaiɗi ahini Yakob ɗa a za ɗa a wala zi siyer n’abai aha war Izrayel, a wala n’a sɗa aŋ za kai.

⁸Hamor a muɗa gaiɗi maini nɵa: Sikem n’ahiya agulni te sa edi midiɗi ahiki gara, ki sitini aŋ muni ta kai ɗi?

⁹Zi bonu gaiyi war tiki, kapai ki siɗiyi alaiki na falakai, kapai ki miliɗi na wiyi aŋ wiiki lai.

¹⁰Kapai ki simni gaiyi afti paŋ a hina tiki, aŋ zi maini ki diri nɵa, ki simni midini, ki zi cakala midini, ki bindi aŋ tamaini afti lai

¹¹Sikem a miɗini wiini epiɗi ɓulumi gaiɗi tawalakaiɗi: Hiniŋa mu nava yim wuzani arki, wala paŋ na ki piyiŋ ta aga mu siŋki.

¹²Farai na firyi ɓa mu saŋ aŋ tiyi ɗa, ki miɗiŋŋa gaini katu zamai zamai na mu saŋ ɗa lai, amma ki sitiŋa ahiki aŋ muni ta.

¹³Alini Yakob e dûûli Sikem gaini Hamor n’epini gai dûûli, buri ɓa Sikem a tûûriti Dina na tawalɗi kok, a binditi hi-hiri.

¹⁴E miɗiɗi: Mi kiɗi mi siti tawalyi wiini ɗif na ɵa gurgle kai kai, buri ɓa a wala zi siyer buriyi.

¹⁵Mi kiɗi mi sitiki ɗa, sai na ɓa, ki zi li pin wala na mi zilbiki midini na ɗa, ɗaiki na maɵagai ɗa, e ɵi gurgle paŋ kafa.

¹⁶Nɵa, tiyi aga mi siɗiki aliyi na falakai, aga mi miliɗi aliki na falakai ɗa lai, aga mi zi fuŋ gaiki, mu bundumu aŋ ɗai ktai

¹⁷Na ɓa ki yimi ɵini gurgle na mi miɗiki gaini na kai ɗa, aga mi yimiti ahiyi, mi hili wiyi.

¹⁸Seŋɗi n’e miɗiŋ ɗa a firiya agulni Hamor gaini Sikem n’ahini.

¹⁹Gawla ɗa a baiya kai aŋ za pini wala n’e miɗiŋ ɗa, epini a daraŋ a sûwiɗi ɗai n’ahani paŋ lai

²⁰Hamor gaini Sikem n’ahini, e hili war faada na wiini fuŋ n’abai ɗa, e miɗiɗi wiiɗi ɗai na war fuŋɗi ɗa maini nɵa:

²¹Ɗai hanɗa, e firyi e simni gaimu war ɵeɗ. Nɵa mu hunuɗumu e simni wiiɗi, e zi cakalaɗi wiiɗi, afti a na viya kadai, a sûwiɗi gai suwai, tumu aga mu tukuɗumu aliɗi na falakai lai, nagai aga e tikiɗi na wiimu lai.

²²Amma e firyi ɓa, kapai e zi fuŋ gaimu, mu bundumnu aŋ ɗai ktai lai ɗa, sai alimu na maɵagai ɗa e ɵi gurgle maiɗi nagai ɵa.

²³Nɵa farani farai na wiiɗi gaini der na wiiɗi lai, wazagaiɗi paŋ aga a bunda aŋ wiimu kai ɗi? Yimumu seŋɗi ɗa wiimu, hunuɗumu e zi fuŋ arbamu.

²⁴Nagai paŋ n’e hili anene war faada, n’e ɵini seŋni Hamor gaini Sikem n’ahini ɗa, e yimi seŋ hanɗa. Maɵagai na war fuŋ n’abai ɗa taaha e ɵi gurgle.

²⁵E zi mefeŋ sulu, mefeŋ n’ag'aŋ hu, won hlai n’e ɗa siɗi gir ɗa, Simeyon gaini Levi, na tawalakaiɗi Dina, arbaɗi alini Yakob par, ɗif paŋ a tika kaɵkarni tini, e niyi aha war fuŋ n’abai ɗa gai hangalɗi, e fiɗiɗi ɗai na maɵagai ɗa edi.

²⁶E fiɗi Hamor gaini Sikem n’ahini edi gaini kaɵkar, e yimitisi Dina na tawalɗi piɗi e hilisi gaiɗi.

²⁷Alini Yakob e fiki e mili wazagai na wiiɗi ɗai zi wuruk gaiɗi n’e mri mini kaɵkar ɗa, buri ɓa e tûûriti tawalɗi kok, e binditi hi-hri.

²⁸E milisi adumaiɗi gaini hakaiɗi gaini ɵaakaiɗi gaini ablehökaiɗi n’aha war fuŋ n’abai gaini n’edi war basga par lai.

²⁹E yimi falakaiɗi gaiɗi aliɗi, e virmi wazagaiɗi paŋ, haa amlai war dalamɗi paŋ.

³⁰Nɵa Yakob a miɗini wiini Simeyon gaini Levi, ki bindiŋa li aŋ ɗif na meefeŋ wuzani arɗi Kanaaniyakai gaiɗi Perizzitekai na midini afti hanɗa, tumu mu ɗumu vok n’agwi kadai, aga e tipi mada, e fiɗiŋa edi, aga e vidiŋa edi gaini pinzibaŋa paŋ lai.

³¹E wiyini seŋ: Kapai e ziti tawalyi wiiɗi maiɗi muni zi zawar ɵa kir kai ɗi?