Read Mousgoum Pi zi tiki 35 Bible Online

Pi zi tiki 35 - Mousgoum bible

Pi zi tiki 35

¹Alaw a miɗini wiini Yakob: Faka amai, hala amai a Betel, sumna woni, ku rga gûwiŋ zi yi ɓaka burini Alaw n’a siŋka sini arku won hlai na ku naka aŋ pra edi wuzani Ezaw na tawalku

²Yakob a miɗiɗi wiiɗi ɗai n’ahani gaiɗi nagai n’e ɗa pini paŋ lai: Mili alawai na morkokoi n’aŋ tiki ɗa edi, zi siki edi aŋ hilu, bindi sapakai na siki lai.

³Hulumu amai a Betel, aga mu rga ûwiŋ zi yi ɓaka woni wiini Alaw n’a ɵina ma war mefeŋ zi gir na wiya ɗa, a nafu gya woɗi futi na mu hala woɗi.

⁴E sini alawai na morkokoi n’aŋ tiɗi gaini adoŋo 'a na ɵimani lai wiini Yakob. Yakob a paŋ azumai pini luwuŋ n’abai z'alaw gobi gaiɗi Sikem.

⁵E fikisi woni par e hili. Alaw a hina hunai n’abai war fuŋ n’abakai n’a ûniɗi paŋ, ɗif a kiɗa aŋ tika futi piɗi alini Yakob kai.

⁶Yakob a cosi a Luz na te na midini afti a Kanaan, a dara a muɗa a Betel, ni gaiɗi ɗai na pini paŋ lai.

⁷A rga gûwiŋ zi yi ɓaka woni, a sini yiki ɓa El-Betel buri Alaw a siŋka sini arni woni won hlai n’a na pra edi wuzani tawalni ɗa.

⁸Debora, muni na te wiliti Rebeka amai te mra, e piti azumai par piɗi Betel, pini luwuŋ n’abai na Yakob a sini yiki ɓa: Luwuŋ n’abai zi tuwi.

⁹Alaw a siŋka sini arni Yakob pra, won hlai n’a wayasi midini hlai na plas na Mezopotamiya par a ɓakaŋ.

¹⁰Alaw a miɗini: Yikuku ɓa Yakob, aga e yikuku gaini yiki na ɓa Yakob ɗa kir kai, amma yikuku aga a bunda ɓa: Izrayel. A sini yki ɓa: Izrayel.

¹¹Alaw a miɗini: Muta m’Alaw zi spak, ku wa ali viya, ku sisiɗa viya, ku bunda aŋ piniziba. Vokɗi pinziba viya aga a niyasi edi suku par, paakai aga e niyisi edi war pinzibaku par lai.

¹²Aftina mu siŋni wiini Abraham gaini Isaak ɗa aga mu suŋku aŋ wiiku, asakal sek ɗa aga mu suŋku, asakal sek ɗa aga mu siŋni wiini pinzibaku.

¹³Alaw a yima warni amai gaigai sini hlai n’a muɗa gaini woni.

¹⁴Yakob a rga a rga wala zi siŋki ktai woni hlai n’Alaw a muɗa gaini woni ɗa, a wala zi rgi n’a rgaŋ gaini ahi-fuŋ, a ma vin midini, a ma emel midini lai kapai a za aŋ wiini Alaw.

¹⁵Yako a yika hlai n’Alaw a muɗa woni ɓa: Betel, a dara a muɗa dalam na wiini Alaw.

¹⁶E fikiɗi a Betel par, hlai a hina wuzaɗi agwi kapai e gi a Öfrata, woni hlai ni Rakel te poko, pûkûɗi a za gaini gir agwi

¹⁷Amma won hlai na te na poko gaini gir ɗa, muni na te pûkûti te miɗiɗ ku huna kai, buri ahi n’aŋ warku ɗa a wus pra

¹⁸Won hlai na suŋfaɗi a dara a wa edi, hlai na te ŋa ta aŋ mra, te sini yiki ɓa: Ben-Oni a dara a muɗa "ahi zi marava".

¹⁹Rakel te mra, e piti ɵimani futi na Öfrata sek, a dara a muɗa: Betlehem.

²⁰Yakob a rga wala zi siŋki ktai midini yeɵɗi, a wala zi siŋki, a wala zi siŋki na wiini yeɵɗi Rakel aŋ woni ɵa haa girna.

²¹Izrayel a faka woni par, a pa gumuni amai par midiɗi Migdal-Eder.

²²Amma hlai na Izrayel aŋ woni hlai hanɗa dam, Ruben a hala a fana gaiɗi Bilha na marmaini epini. Izrayel a ɵina seŋ hanɗa. Alini Yakob e ɗa paŋ doogo.

²³Aliɗi Leya: Ruben, ahini Yakob n’abai, Simeyon, Levi, Yuda, Isakar gaini Zabulon.

²⁴Aliɗi Rakel: Yosef gaini Benyamin.

²⁵Aliɗi Bilha na bagaiɗi Rakel: Dan gaini Neftali

²⁶Aliɗi Zilpa na bagaiɗi Leya: Gad gaini Aser. Hanɗa e ɗi alini Yakob n’a wiiɗi aha war hlai na plas na Mezopotamiya ɗa.

²⁷Yakob a cosi ahani Isaak n’epini a mamre, na war Kiryat-Arba, a dara a muɗa: Hebron, hlai na Abraham gaini Isaak e simnika woni.

²⁸Isaak a mra sek ɗa buzani a za miya gaini doogo doogo mitwis,

²⁹Sunfani a wa edi, a mra, e tipiŋ gaiɗi tiyakaini. A mra gaini zi wel kro kro, gaini vi gaini buza lai. Ezaw gaini Yakob n’alini e piŋ.