Read Mousgoum Pi zi tiki 37 Bible Online

Pi zi tiki 37 - Mousgoum bible

Pi zi tiki 37

¹Yakob a sumna midini afti na Ka n’aŋ Won hlai na epini a halasi a sumna warni aŋ zak.

²Labar na midiɗi alini Yakob a na maini nɵa: Yosef, won hlai n’a za buza doogo pi muguzak li, a giɗima adumai gaini haakai gaiɗi tawalakaini Yosef a arwagwi n’a paya gaiɗi aliɗi Bilha gaiɗi Zilpa na falakaini epini. Yosef a kasi labar na meefeŋ na ɗai e miɗiŋ midiɗi paŋ wiini epini.

³Izrayel a firiya Yosef a sûwiɗi tawalakaini na zamai ɗa paŋ, buri a navaŋ war welni, a ɓilkini sapai na juvi gara zi pai wulani.

⁴Tawalakaini paŋ e siɗi a firiyaŋ a sûwiɗi nagai paŋ; e rgi warɗi midini, e kiɗi aŋ miɗini war wûle zi diri kir kai.

⁵Yosef, weseŋ a pɵaŋ. A virniŋɗi wiiɗi tawalakaini, e bili gaw sini a suwa pra.

⁶A miɗiɗi: Ziɓiri weseŋ n’a pɵaŋa:

⁷Mu ɗumufu edi war vuwai aŋ rgumu algama, won hlai hanɗa, vidi na wiya te ɗiya amai zaw, te hina amai zaw. Vidi na wiiki a gûniti azumai, a hurga azumai wuzaɗi.

⁸Tawalakaini e wiyini seŋ: Ku dara ku ŋa midiyi aŋ pai ɗi? Zaw ku ŋa midiyi aŋ n’epin gezaii ɗi. E bili gaw sini a suwa pra burini weseŋ zi pɵi gaini seŋni zi miɗi ɗa.

⁹Yosef, weseŋ a pɵaŋ pra, a virniŋɗi wiiɗi tawalakaini, a miɗiɗi: Tili weseŋ a pɵaŋa maini nɵa pra, futi, tile gaini meeɵek doogo pi ktai lai a hurga azumai wuza.

¹⁰A virniŋni wiini epini gaiɗi tawalakaini; epini a ɓaraŋ a miɗini: Weseŋ n’a puɵuku hanɗa a weseŋ na maɵa ɗa! Ta gaiɗi amuku gaiɗi tawalakaiku aga mi hilisi mi hûrgi azumai wuzaku kiɗi ɗi?

¹¹Tawalakaini e zi sile sini, amma epini a giɗima seŋ hanɗa warni.

¹²Tawalakaini e hili a Sikem aŋ giɗimi farai na wiini epiɗi.

¹³Nɵa epiɗi a miɗini wiini Yosef: Tawalakaiku e ɗi na edi war hlai zi simi farai na Sikem tiɓ ɗi? Halasi mu ɵunuku piɗi. A waya seŋ: M'an na.

¹⁴A miɗini: Hala tiliɗisi tawalakaiku ɗa gaini farai ɗa lai e ɗa maɵa ɗa, kapai ku kaŋasi labar. A ɵinaŋɗi war Huduk na Hebron par, Yosef a co a Sikem.

¹⁵Ɗif ktai a navaŋ aŋ giliŋa blaŋ edi war basga a zilbaŋ: Ku paya ɗa a maɗa?

¹⁶A waya seŋ a muɗa: Mu piyiɗi e ɗi tawalakaya. Siŋkaŋa hlai n’e simi faraiɗi woni ta kai ɗi.

¹⁷Ɗif a wiyini seŋ: E zûgûɗi woni na par zok, buri mu ɵina miɗi e ɗa miɗi ɓa: Hulumu a Dotan. Yosef a tika futi piɗi tawalakaini, a niviɗi a Dotan.

¹⁸E tiliŋɗi edi gaigai par, wuzani hlai n’a cosi gobi gaiɗi, e rgi miɗi buri e fiɗiŋ edi.

¹⁹E miɗi arbaɗi marɗi: Tili epini weseŋ zi pɵi a na halasi.

²⁰Daaba kiɗi, mu fuɗuŋmu edi, mu buluŋmu warɗi kiliŋi ktai su. Mu muɗumu ɓa: Wala na buza na tuwur a luma ta, kapai mu tulumu sdani weseŋ zi pɵi n’aga a za ɗa.

²¹Ruben a ɵina hanɗa a firiya a kurɗaŋ tiɗi par, a muɗa: Mu fuɗuŋmu kai.

²²Kapai a sɗa aŋ koraŋ edi tiɗi par, aŋ wayaŋ aha sini epini lai, Ruben a miɗiɗi: Ki mi fel edi kai, biliŋ warɗi kiliŋi na te na edi war basga hanɗa su, ki fiɗiŋ kai.

²³Amma Won hlai na Yosef a cosi amai siɗi, e yimiŋ, e wûti sapai na sini edi, sapai na juvi gara zi pai na te nafu sini,

²⁴e biliŋ azumai warɗi kiliŋi, kiliŋi na ɗa te nafu kadai yem warɗi kai.

²⁵Asakal par e simni azumai aŋ simi. Won na e yimi arɗi amai, e tili vok na wiiɗi ɗai zi sakala e hilisi a Galaad par duɓani ɵiginiɗi, e sikilisi sugoy zi ɗûgûdi zi lûgûzi, gaini fiyawni luwoŋai n’e zûûli ɗai gaini n’e girdiŋ sini kopoŋ kapai a hofa kai ɗa lai, aŋ kiŋ aha warɗi Egipte.

²⁶Yuda a miɗiɗi wiiɗi tawalakaini: Na ɓa mu fuɗumu tawalmu edi, mu ŋuyumu felni lai, dermu na woni ɗa a ma ɗa?

²⁷Hulumu, mu wuruŋmu edi tiɗi Ismaielitekai, mu zunumu wala na meefeŋ kai, buri ɓa tawalmu a neŋ sumu. Tawalakaini e ɵini mini.

²⁸Ɗai zi sakala na Madiyanitekai n’e ɗa vii woni na ɗaw e yimisi Yosef amai warɗi kiliŋi par, e wiriŋ edi tiɗi Ismaielitekai arzaŋ Sikel caaɓa, nagai e hili gaini aha war Egipte.

²⁹Won na Ruben a wayasi miɗi kiliŋi, a navasi Yosef warɗi kai. A ŋirwa sapa na sini edi.

³⁰A wayasi siɗi tawalakaini a muɗa: Arwagwi ɗa aŋ kai! Ta kapai mu za maɵa ɗa?

³¹E militi sapaini Yosef, Won hlai n’e fiɗi hek li, e zibiti arni fel ɗa,

³²e siktitini sapai na juvi wiini epiɗi e miɗi: Tiyi mi niviti edi na puk, tiliti haw, te wiini ahiku tiɓ zaw, te na kai ɗi.

³³A siɗiti ɓa te na, a ɗuula a muɗa: Te sapaini ahiya ɗa, wala na buza na tuwur a fuɗaŋ su, a lumaŋ ta!

³⁴Yakob a ŋiruwa sapa na sini edi, a rga sapa warni, a za groho na wiini ahini mefeŋ viya.

³⁵Won n’alini na maɵagai gaiɗi na falakai e hilisi buri e sini arai zi pi, a dara a yima arai zi pi kai. A muɗa: Aga mu niya azumai pini ahiya, war hlaiɗi ɗai zi mri gaini tuwi ɵa; Yakob hina pini tuwi ɵa.

³⁶Madiyanitekai e wûriŋ aha war Egipte tini Potifar, abaiɗi askarai zi gɗam na wiini pai, ɗif na kɓur na wiini Faraw.