Read Mousgoum Pi zi tiki 38 Bible Online

Pi zi tiki 38 - Mousgoum bible

Pi zi tiki 38

¹Amma war mefeŋni ɗa, Yuda a halasi siɗi tawalakaini par ahani ɗif ktai na Adullam yikini Hirra.

²Woni Yuda a tiliti ahini ɗif na Ka naniya na yikini ɓa: Suwa. A tikitisi aŋ muni a fana gaiɗi.

³Te tika fel, te waa ahi ktai, a sini yikini ɓa: Er.

⁴Te tika fel zamai pra, te wa ahi ktai, te sini yikini ɓa: Onan.

⁵Asakal, azi ktai pra, te wa ahi te sini yiki ɓa: Sela. Yuda a nasi fu a Kezib, Won hlai na te poko Sela.

⁶A tikitini muni wiini ahini n’avut na Er, muni na yikiɗi ɓa: Tamar.

⁷Er a ahini Yuda n’avut, a za meefeŋ arni EPIƊ-ƊAI, EPIƊ-ƊAI a fuɗaŋ edi.

⁸Nɵa Yuda a miɗini wiini Onan: Hala siɗi munini tawalku, yimiti suku maini tawalni mafaɗi nɵa, zini seyem wiini tawalku n’a mra.

⁹Onan a sɗa ɓa ali n’a wiiɗi li ɗa e ɗi wiini kai, won hlai n’a fana gaiɗi munini tawalni a hina sini a ka azumai kadai kapai a za seyem wiini tawalni kai.

¹⁰Wala n’a zaŋ ɵa ɗa a firiya agulni EPIƊ-ƊAI kai, EPIƊ-ƊAI a fuɗa ni edi lai.

¹¹Yuda a miɗiɗi wiiɗi Tamar na munini ahini: Sumna warni greŋ ahani apuku, haa ahiya na Sela a za abai haw buri a hiina ɓa kapai ahi hanɗa lai a mra maiɗi tawalakaini nɵa kai. Tamar te hala te sumna ahani epiɗi.

¹²Mefeŋ a za yaw ahini Suwa na munini Yuda te mra. Won hlai na tuwiɗi a vada li, Yuda a hala amai a Timna gaini marmaini na Hirra na Dullam par, ahaɗi ɗai zi ɗûkli ayirni adumaini na war farani.

¹³Ɗai e miɗiɗi wiiɗi Tamar maini nɵa: Tala suwulku a na hala amai a Timna aŋ ɗukla ayirni adumai edi,

¹⁴te mula sapaɗi zi groho edi, te faaɗa siɗi gaini alfai, te bunda ɗif a siɗiti kai, te sumna mini magalani fuŋ n’abai na Enaiim n’a na warɗi futi na Timna. Buri nɵa te sɗa ya ɓa Sela a za abai ya, amma te sa sini aŋ munini kai.

¹⁵Yuda a tiliti, a yimiti aŋ muni zi zawar, buri te bara wala arɗi bar,

¹⁶A ɵiɓa kona siɗi ɗaw a miɗiɗi: He! mu halasi aŋ piyuku, buri a siɗiti ɓa te munini ahini nɵa kai. Te waya seŋ te muɗa: Kapai ku fana gaya ɗa, wala na ku saŋa ɗa a maɗa?

¹⁷A muɗa, aga mu ɵunukusi ahi hek n’a na war faraŋa par ktai. Te muɗa: A siɗa aŋ za, na ɓa ku zag'aŋa li wala ktai zak haa sini ɵeŋni hek hanɗa.

¹⁸A muɗa: N'aga mu zukuku ɗa a maɗa? Te waya seŋ: Tampon na wiini yikuku, samya na pini gaiɗi amaraŋai na t'aŋ tuku. A siŋɗi, a fana gaiɗi, a yimiɗi fel.

¹⁹Te faka amai te hala, te mula alfai na siɗi edi, te mula sapaɗi zi groho siɗi.

²⁰Yuda a ɵina ahini hek tini marmaini na Dullam par, kapai a miliniɗi wazagai n’a zag'aŋɗi edi tiɗi muni par lai. Marmaini a nivitisi kai.

²¹A zilbiɗi ɗai zi fuŋ na woni: Muni zi zawar na te naka ɵimani futi na Enaiim t'aŋ wata ɗa? E wiyini seŋ: Zawar te naka ahaɗi na duk kai.

²²A wayasi sini Yuda a miɗini: Mu nivitisi kai, ɗai zi fuŋ maa e miɗi ɓa zawar te nafu ahaɗi duk kai.

²³Yuda a muɗa: A seŋɗi kiiɗi! Zumu sumu aŋ yewere kai, ta na mu ɵiniɗi ahini hek kaalai, tuku na ku nivitisi kai ɗa kaalai!

²⁴Amma tile hu asakal, e kinisi labar wiini Yuda ɓa: Tamar na munini ahiku te za maɵara, a ni ta kai, gaini maɵaraɗi te yima fel kaai. Yuda a muɗa: E yimitisi anene, e yiti edi.

²⁵Won n’e ɗa e yimitisi anene, te ɵina pini suwulɗi aŋ miɗini: Mu yima fel ɗa gaini epin-gezani wazagai hanɗa. Asakal par te muɗa: Tala haw! Tampon hanɗa gaini samiya gaiɗi amaraŋai ɗa a wiini asiya ɗa?

²⁶Yuda a sɗaŋ a muɗa: Jre na wiiɗi n’a suwaŋa ta, buri mu sitini wiini ahiya na Sela kai. Amma a fana gaiɗi kir kai.

²⁷Amma war mefeŋɗi zi pûkû e ɗifu warɗi e ɗi teyek,

²⁸War pûkûɗi Tamar, ktai arbaɗi teyekai a witisi tini edi, muni zi pûkû te yimiti, te rga sogom na mekele hirra siɗi te muɗa: Hanɗa a ni n’a niyasi edi avut.

²⁹Asakal par a wiyiti tini amai: A niyasi edi a tawalni ɗa, te muɗa: Ku bula ɗa a baŋa na maɵa, e sini yiki ɓa Peres a dara a muɗa baŋa zi bili.

³⁰Tawalni a niyasi asakal par, ni na gaini sogom na mekele hirra wulani tini, a sini yiki ɓa Zera.